ମୁମ୍ବାଇ ୨୮/୦୬: ଅସ୍କାର ଏକାଡେମୀର ସଦସ୍ୟ ହେବେ ଦେଶର ଅନ୍ୟତମ ଲୋକପ୍ରିୟ ଅଭିନେତା କମଲ ହାସନ ଓ ଆୟୁଷ୍ମାନ ଖୁରାନା। ଅସ୍କାର ଏକାଡେମୀ ଏହି ଦୁଇ ଅଭିନେତାଙ୍କୁ ସଦସ୍ୟତା ପାଇଁ ନିମନ୍ତ୍ରଣ ପଠାଇଛି । ଉଭୟଙ୍କୁ ଏକାଡେମୀ ନିଜର କଳାକାର ଶାଖାରେ ସଦସ୍ୟତା ପାଇଁ ନିମନ୍ତ୍ରଣ ପଠାଇଛି । ସେହିପରି, ଫିଲ୍ମ ନିର୍ମାତା ପାୟଲ କପାଡ଼ିଆଙ୍କୁ ଲେଖକ ଶାଖାରେ ସଦସ୍ୟତା ପାଇଁ ନିମନ୍ତ୍ରଣ ଦେଇଛି ଏକାଡେମୀ ।
ଏହା ପୂର୍ବରୁ ଅନୁରାଗ କଶ୍ୟପ, ଅନୁପମ ଖେର, ବିଦ୍ୟା ବାଲନ, ଜୋୟା ଅଖତର, ତାମିଲ ଅଭିନେତା ସୂର୍ଯ୍ୟାଙ୍କ ଭଳି ସେଲିବ୍ରିଟିଙ୍କୁ ଏକାଡେମୀର ସଦସ୍ୟତା ନିମନ୍ତେ ନିମନ୍ତ୍ରଣ ମିଳିଥିଲା । ସିନେମା ଜଗତରେ ଏହି ସଦସ୍ୟତାକୁ ଖୁବ୍ ସମ୍ମାନଜନକ ଭାବେ ବିବେଚନା କରାଯାଏ । ଅସ୍କାର ପୁରସ୍କାର ବିଶ୍ୱର ସବୁଠୁ ପ୍ରତିଷ୍ଠିତ ସିନେମା ସମ୍ମାନ ଭାବେ ବିବେଚିତ । ଏକାଡେମୀ ଅଫ୍ ମୋସନ ପିକ୍ଚର ଆର୍ଟସ୍ ଆଣ୍ଡ ସାଇନ୍ସେଜ୍’ ଏହି ସମ୍ମାନ ପ୍ରଦାନ କରେ । ଏହି ପୁରସ୍କାର ଏକାଡେମୀ ଆୱାର୍ଡ ନାମରେ ସର୍ବବିଦିତ । ଏଥିରେ ଫିଲ୍ମ ନିର୍ମାଣ ଜଗତର ଭିନ୍ନ ଭିନ୍ନ ମୋଟ୍ ୧୯ଟି ଶାଖା ଅଛି । ଅଭିନୟ, ନିର୍ଦ୍ଦେଶନା, ସଙ୍ଗୀତ ଓ ସିନେମାଟୋଗ୍ରାଫି ଭଳି ବିଭାଗରେ ଏକାଡେମୀ ପୁରସ୍କାର ପ୍ରଦାନ କରାଯାଏ । ବିଶ୍ୱରେ ସିନେମା ସହ ସଂଶ୍ଳିଷ୍ଟ ଲୋକ ଏକାଡେମୀର ଅଲଗା ଅଲଗା ବ୍ରାଞ୍ଚ୍ର ସଦସ୍ୟ ଅଛନ୍ତି ଏବଂ ନିଜ ବ୍ରାଞ୍ଚ୍ରେ ଅସ୍କାର ନୋମିନେସନ୍ ପାଇଁ ଭୋଟ୍ କରନ୍ତି । ଏହା ଜରିଆରେ ବିଭିନ୍ନ ବିଭାଗ ପାଇଁ ବିଜେତାଙ୍କୁ ଚୟନ କରାଯାଏ । ଏହି ପ୍ରକ୍ରିୟା ଯୋଗୁ ଅସ୍କାରକୁ ଅନ୍ୟ ଫିଲ୍ମ ପୁରସ୍କାର ତୁଳନାରେ ଅଧିକ ସମ୍ମାନ ପ୍ରଦାନ କରାଯାଏ ।
ଏକାଡେମୀର ସଦସ୍ୟଙ୍କ ମୁଖ୍ୟ କାମ ହେଉଛି ସେମାନେ ନିଜ ବ୍ରାଞ୍ଚ୍ରେ ଅସ୍କାର ନୋମିନେସନ୍ ପାଇଥିବା ଫିଲ୍ମ ପାଇଁ ଭୋଟ୍ କରନ୍ତି ଏବଂ ଚୂଡ଼ାନ୍ତ ବିଜେତା ଚୟନ କରନ୍ତି । ଅର୍ଥାତ୍ ଏ ବର୍ଷ ଅଭିନେତା ଶାଖାରେ ଏକାଡେମୀର ସଦସ୍ୟତା ପାଇଥିବା କମଲ ହାସନ ଓ ଆୟୁଷ୍ମାନ ଖୁରାନା ଶ୍ରେଷ୍ଠ ଅଭିନେତା ବିଭାଗରେ ଅସ୍କାର ପୁରସ୍କାର ପାଇଁ ନୋମିନେଟ୍ ହୋଇଥିବା ଅଭିନେତାଙ୍କ ପାଇଁ ଭୋଟ୍ କରିବେ । ଅନ୍ୟକୁ ଜଜ୍ କରିବା ପାଇଁ ସିନେମାରେ ନିଜ ନିଜ କ୍ଷେତ୍ରରେ ପର୍ଯ୍ୟାପ୍ତ ଅନୁଭବ ଓ ଜ୍ଞାନ ଥିବା ବ୍ୟକ୍ତିଙ୍କୁ ହିଁ ସଦସ୍ୟତା ପାଇଁ ଏକାଡେମୀ ଚୟନ କରେ ।
