କେନ୍ଦ୍ରାପଡ଼ା,୩୧/୦୫: କେନ୍ଦ୍ରାପଡ଼ାର ‘ଜରି ମାଉସୀ’ ଭାବେ ପରିଚିତ କମଳା ମହାରଣା ଅସୁସ୍ଥ ହୋଇ କଟକର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । କମଳାଙ୍କ ଘର କେନ୍ଦ୍ରାପଡ଼ା ଜିଲ୍ଲା ସଦର ବ୍ଲକ୍ ଅଧୀନ ଗୁଲନଗର ପଞ୍ଚାୟତ ଖଇରାବାଦ ଗ୍ରାମରେ । ଗତ ଏପ୍ରିଲ ୨୮ ତାରିଖରେ ଅସାବଧାନତା ହେତୁ ଘରେ ପଡ଼ିଯିବା ପରେ କମଳାଙ୍କ ବାମ ଜଂଘ ଭାଙ୍ଗି ଯାଇଥିବା ପରିବାର ଲୋକେ କହିଛନ୍ତି । ତେବେ ବର୍ତ୍ତମାନ କମଳାଙ୍କ ସ୍ୱାସ୍ଥ୍ୟବସ୍ଥା ସ୍ଥିର ଥିବା ଜଣାପଡ଼ିଛି । ବ୍ୟବହୃତ ପଲିଥିନ୍ରୁ ଘରକରଣା ସାମଗ୍ରୀ ତିଆରି କରି ଚର୍ଚ୍ଚାରେ ଥିଲେ ୬୬ ବର୍ଷୀୟା କମଳା ମହାରଣା । ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କମଳାଙ୍କୁ ମନ୍ କୀ ବାତ୍ କାର୍ଯ୍ୟକ୍ରମରେ ପ୍ରଶଂସା କରିଥିଲେ । ନିକଟରେ କମଳା ‘ଅପରେସନ ସିନ୍ଦୂର'ରେ ଭାରତର ସଫଳତା ପରେ ଖୁସିରେ ସ୍ଥଳସେନା, ବାୟୁସେନା ଏବଂ ନୌସେନା ମୁଖ୍ୟଙ୍କୁ ଉପହାର ପଠାଇଥିଲେ । ନିଜ ହାତତିଆରି ଟୋପି ଓ ଚିଠି ପଠାଇ ଶୁଭେଚ୍ଛା ଜଣାଇଥିଲେ ।
୨୦୨୩ ମସିହା ଫେବ୍ରୁୟାରୀ ୨୬ ତାରିଖରେ ତାଙ୍କର ୯୮ତମ ମନ୍ କୀ ବାତ୍ର ସଂସ୍କରଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କମଳାଙ୍କ ପ୍ରଶଂସା କରିଥିଲେ । ପରେ ଜୁନ୍ ମାସରେ ପ୍ରଧାନମନ୍ତ୍ରୀ କେନ୍ଦ୍ରାପଡ଼ାକୁ ନିର୍ବାଚନ ବେଳେ ଆସିବା ସମୟରେ କମଳାଙ୍କୁ ଆଣ୍ଠେଇ ନମସ୍କାର କରିଥିଲେ । ପରେ ପ୍ରଧାନମନ୍ତ୍ରୀ କମଳାଙ୍କୁ ସାଧାରଣତନ୍ତ୍ର ଦିବସ ପରେଡ୍ରେ ଦିଲ୍ଲୀ ଡାକିଥିଲେ । କମଳା ଅଦରକାରୀ ବସ୍ତୁରୁ ସୁନ୍ଦର ଘରୋଇ ଉପକରଣ ତିଆରି କରି ଚର୍ଚ୍ଚାରେ ଥିଲେ।
