କରାଚୀ: ପାକିସ୍ତାନର ସବୁଠାରୁ ବଡ଼ ସହର କରାଚୀରେ ଚଳିତ ବର୍ଷ ଜୁନ୍ ମାସରେ ୬୦ ଥର ଭୂମିକମ୍ପ ଝଟକା ଅନୁଭୂତ ହୋଇଛି। ଯାହା ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଆତଙ୍କ ସୃଷ୍ଟି କରିଛି। ଏହି ଲଗାତାର ଭୂମିକମ୍ପ ଯୋଗୁଁ ସହରବାସୀ ଆତଙ୍କିତ ଅବସ୍ଥାରେ ଅଛନ୍ତି। ଅନେକେ ଲୋକ ନିଜ ଘର ଛାଡ଼ି ଖୋଲା ଜାଗାରେ ରହୁଛନ୍ତି।
ପାକିସ୍ତାନ ମେଟେରୋଲୋଜିକାଲ ଡିପାର୍ଟମେଣ୍ଟ (ପିଏମଡି) ଅନୁଯାୟୀ, ଏହି ଭୂମିକମ୍ପଗୁଡ଼ିକର ତୀବ୍ରତା ରିକ୍ଟର ସ୍କେଲରେ ୨.୧ରୁ ୩.୬ ମଧ୍ୟରେ ରହିଛି। ଏହା ମଧ୍ୟରେ ସବୁଠାରୁ ଶକ୍ତିଶାଳୀ ଝଟକା ୩.୬ ମାଗ୍ନିଚ୍ୟୁଡର ଥିଲା। ଯାହା ଫଳରେ ମଲିର ଜେଲର ଏକ କାନ୍ଥ ଆଂଶିକ ଭାଙ୍ଗିବାରେ କାରଣ ହୋଇଥିଲା। ଏହି ଘଟଣାରେ ୨୧୬ ଜଣ କଏଦୀ ଜେଲରୁ ପଳାୟନ କରିଥିଲେ।
କରାଚୀର ମଲିର, କୋରାଙ୍ଗୀ ଓ କ୍ୱାଇଦାବାଦ ଅଞ୍ଚଳରେ ଏହି ଝଟକାଗୁଡ଼ିକ ଅଧିକ ଅନୁଭୂତ ହୋଇଛି। ପିଏମଡିର ମୁଖ୍ୟ ମେଟେରୋଲୋଜିଷ୍ଟ ଆମୀର ହାଇଦର କହିଛନ୍ତି ଯେ ଏହି ଝଟକାଗୁଡ଼ିକ ଲାଣ୍ଡି ଅଞ୍ଚଳରେ ସକ୍ରିୟ ଫଲ୍ଟ ଲାଇନ ଯୋଗୁଁ ହେଉଛି। ସେ ଆହୁରି କହିଛନ୍ତି ଯେ ଏହି ଝଟକାଗୁଡ଼ିକର ତୀବ୍ରତା ଧୀରେ ଧୀରେ କମୁଛି ଏବଂ ଆଗାମୀ ସପ୍ତାହ ମଧ୍ୟରେ ସ୍ଥିତି ସ୍ଥିର ହେବାର ସମ୍ଭାବନା ରହିଛି।
ଲଗାତାର ଭୂମିକମ୍ପ ଯୋଗୁଁ କରାଚୀର ବାସିନ୍ଦାମାନେ ଭୟଭୀତ ଅବସ୍ଥାରେ ରହିଛନ୍ତି। ସୋସିଆଲ ମିଡିଆରେ ଅନେକ ପୋଷ୍ଟରେ ଲୋକେ ନିଜର ଭୟ ଓ ଚିନ୍ତା ପ୍ରକାଶ କରିଛନ୍ତି। କେତେକ ଅଞ୍ଚଳରେ ମସଜିଦମାନଙ୍କରୁ ଆଜାନର ଶବ୍ଦ ଶୁଣାଯାଇଥିଲା, ଏବଂ ଲୋକେ ଆତଙ୍କରେ ଘର ଛାଡ଼ି ରାସ୍ତାକୁ ବାହାରି ଆସିଥିଲେ।
ଜଣେ ସ୍ଥାନୀୟ ବାସିନ୍ଦା କହିଛନ୍ତି, "ପ୍ରତିଦିନ ଝଟକା ଅନୁଭବ ହେଉଛି। ଆମେ ରାତିରେ ଶୋଇବାକୁ ଭୟ କରୁଛୁ, କାରଣ କେତେବେଳେ ବଡ଼ ଭୂମିକମ୍ପ ଆସିପାରେ ତାହା କେହି ଜାଣିନାହାଁ।"
ଏନେଇ ଭୂତତ୍ତ୍ୱବିତ୍ମାନେ କହିଛନ୍ତି ଯେ କରାଚୀ ତିନୋଟି ପ୍ରମୁଖ ଟେକ୍ଟୋନିକ ପ୍ଲେଟ—ଆରବୀୟ, ୟୁରୋ-ଏସୀୟ ଏବଂ ଭାରତୀୟ ପ୍ଲେଟର ସଂଗମ ସ୍ଥଳରେ ଅବସ୍ଥିତ, ଯାହା ଏହାକୁ ଭୂମିକମ୍ପ ପ୍ରବଣ କରିଛି। କିଛି ବିଶେଷଜ୍ଞ ମତ ଦେଇଛନ୍ତି ଯେ ଏହି ଛୋଟ ଝଟକାଗୁଡ଼ିକ ଟେକ୍ଟୋନିକ ପ୍ଲେଟରେ ଜମା ହୋଇଥିବା ଶକ୍ତିକୁ କମ କରୁଛି, ଯାହା ବଡ଼ ଭୂମିକମ୍ପର ସମ୍ଭାବନାକୁ କମାଇପାରେ। କିନ୍ତୁ ଅନ୍ୟ କେତେକ ଭୂତତ୍ତ୍ୱବିତ୍, ଯେମିତି ଶାହବାଜ ଲାଘାରୀ, ଚେତାବନୀ ଦେଇଛନ୍ତି ଯେ ଏହି ଛୋଟ ଝଟକାଗୁଡ଼ିକ ଏକ ବଡ଼ ଭୂମିକମ୍ପର ପୂର୍ବାଭାସ ହୋଇପାରେ।
ପିଏମଡି ଓ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ସ୍ଥିତି ଉପରେ ନଜର ରଖିଛନ୍ତି ଏବଂ ଲୋକଙ୍କୁ ଶାନ୍ତ ରହିବାକୁ ଅପିଲ କରିଛନ୍ତି। ତଥାପି, ସ୍ଥାନୀୟ ଭୂମିକମ୍ପ ନିରୀକ୍ଷଣ ବ୍ୟବସ୍ଥାର ଅଭାବ ଏବଂ ଅନ୍ତର୍ଜାତୀୟ ସଂସ୍ଥା ଯେମିତି ୟୁଏସଜିଏସ ଓ ଏନସିଏସରେ ଏହି ଝଟକା ରେକର୍ଡ ନହେବା ସ୍ଥାନୀୟ ବ୍ୟବସ୍ଥାର ଦୁର୍ବଳତାକୁ ଦର୍ଶାଇଛି।
