ନୂଆଦିଲ୍ଲୀ,୦୧/୦୫: ପହଲଗାମ୍ ଆକ୍ରମଣ ପରଠୁ ପାକିସ୍ତାନ ଉପରେ ଭାରତର ଆକ୍ରୋଶ ବଢ଼ିବାରେ ଲାଗିଛି । ଫିଲ୍ମ ଇଣ୍ଡଷ୍ଟ୍ରିର ଲୋକେ ପାକିସ୍ତାନ ବିରୋଧରେ ବୟାନ ଦେଉଛନ୍ତି । ଇତିମଧ୍ୟରେ କରୀନା କପୁର ଖାନ୍ଙ୍କର ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ସେ ଜଣେ ପାକ୍ ଡିଜାଇନର୍ଙ୍କ ସହ ଡିନର୍ କରୁଥିବା ନଜର ଆସିଛନ୍ତି । ଫଟୋ ଦେଖି ଲୋକେ କରୀନାଙ୍କ ଉପରେ ଖୁବ୍ ରାଗିଯାଇଛନ୍ତି । କିଛି ତାଙ୍କୁ ଗଦ୍ଦାର ମଧ୍ୟ କହୁଛନ୍ତି । ନିକଟରେ ଫିଲ୍ମ ଫେଡେରେସନ୍ ଘୋଷଣା କରିଥିଲା, ପାକିସ୍ତାନୀ କଳାକାରଙ୍କ ସହ କାମ କରୁଥିବା ବ୍ୟକ୍ତିଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହେବ ।
ଫଟୋରେ କରୀନା ଯାହା କାନ୍ଧରେ ହାତ ରଖିଛନ୍ତି, ସେ ପାକିସ୍ତାନୀ ଡିଜାଇନର୍ ଫରାଜ ମନ୍ନାନ । ପହଲଗାମ୍ ଆତଙ୍କବାଦୀ ଆକ୍ରମଣ ପରେ ୨୭ ଏପ୍ରିଲରେ କରୀନା ଦୁବାଇ ଯାଇଥିଲେ । ସେଠାରେ ସେ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ । ସେଥିରେ ଫରାଜ ମଧ୍ୟ ସାମିଲ ହୋଇଥିଲେ । ଫରାଜ ଏହି ସାକ୍ଷାତର ଫଟୋ ନିଜେ ସୋସିଆଲ ମିଡିଆରେ ପୋଷ୍ଟ୍ କରିଥିଲେ, ଯାହା ଏବେ ଭାଇରାଲ ହେଉଛି । ଏକ୍ସ ପ୍ଲାଟ୍ଫର୍ମରେ ଜଣେ ୟୁଜର୍ ଫଟୋ ପୋଷ୍ଟ୍ କରି ଲେଖିଛନ୍ତି, ଗୋଟିଏ ପଟେ ଭାରତ ପାକିସ୍ତାନ ବିରୋଧରେ ଲଢ଼େଇ କରୁଛି । ଅନ୍ୟପକ୍ଷେ, କରୀନା କପୁର ପାକିସ୍ତାନୀ ଡିଜାଇନର୍ଙ୍କ ସହ ଦୁବାଇରେ ଫଟୋସୁଟ୍ରେ ବ୍ୟସ୍ତ ଅଛନ୍ତି । ସେ ପୂର୍ବରୁ ମଧ୍ୟ ତାଙ୍କ ସହ କାମ କରିଛନ୍ତି । ଗତ ବର୍ଷ କରୀନା ପାଲେଷ୍ଟାଇନ୍କୁ ସମର୍ଥନ କରିଥିଲେ । କିନ୍ତୁ ଏବେ ଦେଶ ପାଇଁ ଠିଆ ହେଉନାହାନ୍ତି । ବଲିଉଡ୍ ସେଲିବ୍ରିଟିଙ୍କର କ’ଣ ନିଜ ଦେଶ ପାଇଁ କୌଣସି କର୍ତ୍ତବ୍ୟ ନାହିଁ ବୋଲି ବ୍ୟକ୍ତି ପଚାରିଛନ୍ତି ।
ସୂଚନାଯୋଗ୍ୟ, କରୀନା କେବଳ ଫରାଜଙ୍କ ସହ କାମ କରିନାହାନ୍ତି, ବରଂ ତାଙ୍କର ଜଣେ ଭଲ ବନ୍ଧୁ । ଅନେକ କାର୍ଯ୍ୟକ୍ରମରେ ଫରାଜଙ୍କ ସହ ସେ ପୋଷ୍ଟ୍ ମଧ୍ୟ ଶେୟାର କରିଛନ୍ତି । ପାକ୍ ଡିଜାଇନର୍ ମନ୍ନାନ ଦୁବାଇର ଜଣେ ପ୍ରସିଦ୍ଧ ଡିଜାଇନର୍ । କରୀନାଙ୍କ ପୂର୍ବରୁ ଅନେକ ଭାରତୀୟ ସେଲିବ୍ରିଟି ତାଙ୍କ ସହ କାମ କରିଛନ୍ତି । ଏମାନଙ୍କ ମଧ୍ୟରେ କିଆରା ଆଡ଼ଭାନି, ଅନନ୍ୟା ପାଣ୍ଡେ, ରଣବୀର କପୁର, ଆଲିୟା ଭଟ୍ଟ, ତାରା ସୁତାରିଆଙ୍କ ଭଳି ସେଲିବ୍ରିଟି ବି ଅଛନ୍ତି ।
