ମୁମ୍ୱାଇ, ୧୮।୧: ବଲିଉଡ୍ ଅଭିନେତା ସୈଫ୍ ଅଲ୍ଲୀ ଖାନଙ୍କୁ ଆକ୍ରମଣ ଘଟଣା । ଏନେଇ କରିନା କପୁରଙ୍କ ବଡ଼ ବୟାନ । କହିଲେ ପୋଲିସକୁ ଦେଇଥିବା ବୟାନରେ ମୋର ଏହି ବୟାନ ରେକର୍ଡ ହୋଇନି । ବଲିଉଡ ଅଭିନେତା ସୈଫ ଅଲ୍ଲୀ ଖାନଙ୍କ ଉପରେ ହୋଇଥିବା ଆକ୍ରମଣର ତଦନ୍ତ କରୁଛି ମୁମ୍ବାଇ ପୋଲିସ । ଏନେଇ କରିନା କପୁର ତାଙ୍କର ବୟାନ ଦେଇଛନ୍ତି । କରିନା ବାନ୍ଦ୍ରା ପୋଲିସକୁ କହିଛନ୍ତି ଯେ, ସୈଫ୍ ଏକାକୀ ଆକ୍ରମଣକାରୀଙ୍କୁ ସାମ୍ନା କରିଥିଲେ । ଯେତେବେଳେ ଆକ୍ରମଣ ହୋଇଥିଲା ସେତେବେଳେ ସୈଫ୍ ଘରେ ଥିବା ପିଲା ଓ ମହିଳାମାନଙ୍କ ସୁରକ୍ଷା ପାଇଁ ବିଲ୍ଡିଂର ୧୨ ମହଲାକୁ ପଠାଇଦେଇଥିଲେ । ସେ ସମସ୍ତଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ । ସୈଫ୍ ଆକ୍ରମଣକାରୀ ସାମନା କରିବାରୁ ଦୁର୍ବୃତ୍ତ ତାଙ୍କ ପୁଅ ପାଖରେ ପହଞ୍ଚି ପାରିନଥିବା ସେ କହିଛନ୍ତି । କରିନା ଏହା ମଧ୍ୟ କହିଥିଲେ ଯେ, ଆକ୍ରମଣକାରୀ ଘରୁ କୌଣସି ଜିନିଷ ଚୋରି କରି ନାହିଁ, କେବଳ ସୈଫଙ୍କୁ ଅନେକ ଥର ଆକ୍ରମଣ କରିଥିଲା । କେଉଁ ଉଦ୍ଦେଶ୍ୟରେ ସୈଫଙ୍କ ଘରେ ପଶିଥିଲା ଚୋର ? କରିନାଙ୍କ ଏଭଳି ବୟାନ ପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି ହେଉଛି ।
କହିରଖୁ କି, ମୁମ୍ବାଇ ପୋଲିସ ଅଭିଯୁକ୍ତର ସିସିଟିଭି ଫୁଟେଜ୍ ଜାରି କରିଥିଲା । ଏହି ସିସିଟିଭି ଫୁଟେଜଗୁଡ଼ିକ ମଧ୍ୟରୁ ଗୋଟିଏ ସତଗୁରୁ ଶରଣ ବିଲ୍ଡିଂର ଷଷ୍ଠ ମହଲାର, ଯେଉଁଥିରେ ସନ୍ଦିଗ୍ଧ ବ୍ୟକ୍ତି ଖାଲି ପାଦରେ ସିଡ଼ି ଚଢ଼ୁଥିବାର ଦେଖାଯାଉଛି । ଅନ୍ୟ ଏକ ସିସିଟିଭି ଫୁଟେଜରେ, ସନ୍ଦିଗ୍ଧ ବ୍ୟକ୍ତି ବାନ୍ଦ୍ରା ରେଳ ଷ୍ଟେସନ ନିକଟରେ ଏକ ହଳଦିଆ ସାର୍ଟ ପିନ୍ଧିଥିବା ଦେଖାଯାଇଥିଲା । ସେ ନିରନ୍ତର ସ୍ଥାନ ପରିବର୍ତ୍ତନ କରୁଛି । ଘଟଣାର ଗୋଟିଏ ଦିନ ପରେ ଆକ୍ରମଣକାରୀର ପ୍ରଥମ ସିସିଟିଭି ଫୁଟେଜରେ, ସେ ନୀଳ ସାର୍ଟ ପିନ୍ଧିଥିବାର ଦେଖାଯାଇଥିଲା । ଯେତେବେଳେ କି ଘଟଣା ରାତିରେ ସେ କଳା ରଙ୍ଗର ଟି-ସାର୍ଟ ପିନ୍ଧିଥିଲେ । ମୁମ୍ବାଇ ପୋଲିସ କହିଛି ଯେ, ଆକ୍ରମଣକାରୀ ସମ୍ଭବତଃ ବାନ୍ଦ୍ରାରୁ ଏକ ଲୋକାଲ୍ ଟ୍ରେନ୍ ନେଇ ମୁମ୍ବାଇର ଅନ୍ୟ କୌଣସି ଅଞ୍ଚଳକୁ ଯାଇଛି ବୋଧେ । ସନ୍ଦିଗ୍ଧ ବ୍ୟକ୍ତିଙ୍କୁ ଖୋଜିବା ପାଇଁ ଅନେକ ପୋଲିସ ଟିମ୍ ସହରର ବିଭିନ୍ନ ରେଳ ଷ୍ଟେସନର ସିସିଟିଭି ଫୁଟେଜକୁ ସ୍କାନ କରୁଛନ୍ତି ।
