ମୁମ୍ବାଇ ୧୮/୦୮: ଅମିତାଭ ବଚ୍ଚନଙ୍କ କୁଇଜ୍ ରିଆଲିଟି ଶୋ’ ‘କୌନ୍ ବନେଗା କରୋଡପତି’ ସିଜିନ୍ -୧୭ ପରଦାକୁ ଫେରିଛି। ଶୋ’ର ନୂଆ ସିଜିନ୍ ଅଗଷ୍ଟ ୧୧ ତାରିଖରେ ଆରମ୍ଭ ହୋଇଛି। ଶୋ’ର ପ୍ରଥମ ସପ୍ତାହରେ ଏପରି ଅନେକ ମୁହୂର୍ତ୍ତ ଦେଖିବାକୁ ମିଳିଛି ଯାହା ଲୋକଙ୍କ ମଧ୍ୟରେ ଉତ୍ସାହ ବୃଦ୍ଧି କରିଛି। ଏହି ସିଜିନର ବିଶେଷ କଥା ହେଉଛି କି ପ୍ରଥମ ସପ୍ତାହରେ ହିଁ ଶୋ’କୁ ପ୍ରଥମ କୋଟିପତି ମିଳିଯାଇଛି। ଚ୍ୟାନେଲଟି ସୋସିଆଲ ମିଡିଆରେ ଏହାର ପ୍ରୋମୋ ମଧ୍ୟ ସେୟାର କରିଛି। 

ତେବେ ଶୋ'ର ପ୍ରଥମ କୋଟିପତି ହେଉଛନ୍ତି ଉତ୍ତରାଖଣ୍ଡର ଆଦିତ୍ୟ କୁମାର। ଆଦିତ୍ୟ ଏହି ଶୋ’ର ପ୍ରଥମ କୋଟିପତି। ବିଶେଷ କଥା ହେଉଛି କି ପ୍ରୋମୋରେ ଆଦିତ୍ୟ ୭ କୋଟି ଟଙ୍କାର ଜ୍ୟାକପଟ୍ ପ୍ରଶ୍ନ ପାଇଁ ମଧ୍ୟ ଚେଷ୍ଟା କରୁଛନ୍ତି। ତଥାପି, ସେ ୭ କୋଟି ଟଙ୍କା ଜିତିବେ କି ନାହିଁ ତାହା ଜାଣିବା ପାଇଁ ଆମକୁ ଏପିସୋଡ୍ ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ ପଡିବ। ପ୍ରୋମୋ ଦେଖିବା ପରେ, ଲୋକମାନେ ଏହାକୁ ନେଇ ଖୁବ୍‌ ଉତ୍ସାହିତ ଅଛନ୍ତି।

ପ୍ରୋମୋରେ, ଆଦିତ୍ୟ ଅମିତାଭ ବଚ୍ଚନଙ୍କ ସହ କଥା ହେଉଥିବାର ଦେଖାଯାଉଛି। ସେ ତାଙ୍କ କଲେଜ ଦିନକୁ ମନେ ପକାଇ କହୁଛନ୍ତି, 'ମୋର କଲେଜ ସମୟରେ, ମୁଁ ମୋର ସମସ୍ତ ବନ୍ଧୁମାନଙ୍କୁ କହିଥିଲି ଯେ ମୁଁ KBC ପାଇଁ ଚୟନ ହୋଇସାରିଛି ଏବଂ ମୁଁ ଗୋଟିଏ ସପ୍ତାହ ଧରି ଏହି ପ୍ରାଙ୍କ୍ କରିଥିଲି। ଯେତେବେଳେ ମୁଁ ସେମାନଙ୍କୁ କହିଲି ଯେ KBC ଟିମ୍‌ ଗୋଟିଏ ସପ୍ତାହ ମଧ୍ୟରେ ଭିଡିଓ ସୁଟିଂ କରିବାକୁ ଆସିବ, ସମସ୍ତେ ପ୍ରସ୍ତୁତ ହୋଇଗଲେ। କିଏ ନୂଆ ପ୍ୟାଣ୍ଟ ତିଆରି କଲେ ତ ଆଉ କିଏ ନୂଆ ସାର୍ଟ । ଗୋଟିଏ ସପ୍ତାହ ପରେ, ଯେତେବେଳେ ସେମାନେ ମୋତେ ପଚାରିଲେ ଯେ କେହି କାହିଁକି ଆସିଲେ ନାହିଁ, ମୁଁ ସେମାନଙ୍କୁ କହିଲି ଯେ ମୁଁ ମଜା କରୁଛି। ହେଲେ ଏଥର ଯେତେବେଳେ ମୋତେ ଫୋନ୍‌ ଆସିଲା, କେହି ବିଶ୍ୱାସ କଲେ ନାହିଁ। ମୁଁ ସେମାନଙ୍କୁ ମେସେଜ୍ ଦେଖାଇବା ପରେ ସେମାନେ ବିଶ୍ୱାସ କଲେ ଆଉ କହିଲେ ଇଏ ତ ସତରେ ପହଞ୍ଚିଯାଇଛି।'

ଏହା ପରେ ଅମିତାଭ ବଚ୍ଚନ କହିଛନ୍ତି- 'ତୁମେ କେବଳ ପହଞ୍ଚି ନାହଁ, ବହୁତ ଉପରେ ପହଞ୍ଚିଛ।' ଆଦିତ୍ୟ କହୁଛନ୍ତି ଯେ ସାର୍ ମୁଁ ବିଶ୍ୱାସ କରିପାରୁନାହିଁ। ଏହା ଉପରେ ବିଗ୍ ବି କହୁଛନ୍ତି ଯେ ତୁମେ ଉପର ପର୍ଯ୍ୟନ୍ତ ଯିବ …ସାତ କୋଟି । ଏହା ପରେ ଆଦିତ୍ୟ ୭ କୋଟିର ପ୍ରଶ୍ନ ଖେଳି ରିସ୍କନେବାକୁ ଯାଉଛନ୍ତି। ଏବେ ଦେଖିବା ବାକି ଅଛି ଯେ ସେ ଜିତିପାରିବେ କି ନାହିଁ।