ତେହରାନ: ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନି ନିଜ ବୈଦେଶିକ ମନ୍ତ୍ରୀଙ୍କୁ ଆଲୋଚନା ପାଇଁ ମସ୍କୋ ପଠାଇଥିବା ଜଣାପଡିଛି। ଇସ୍ରାଏଲ ଓ ଇରାନ ମଧ୍ୟରେ ଚାଲିଥିବା ସଂଘର୍ଷ ଓ ୧୯୭୯ ମସିହାର ବିପ୍ଲବ ପରେ ଦେଶ ଉପରେ ହୋଇଥିବା ଆମେରିକାର ସବୁଠୁ ବଡ ଆକ୍ରମଣ ପରବର୍ତ୍ତୀ ସହାୟତା ପ୍ରଦାନ ସମ୍ୱଦ୍ଧରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଆଲୋଚନା ପାଇଁ ଖାମେନିଙ୍କ ନେତୃତ୍ତ୍ୱରେ ଏହି ଗସ୍ତ ଆରମ୍ଭ ହୋଇଥିବା ନେଇ ସୂଚନା ମିଳିଛି।
ଇରାନରେ ସରକାର ପରିବର୍ତ୍ତନ ପାଇଁ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଇସ୍ରାଏଲର ନେତ୍ରୁବୃନ୍ଧ ଖାମେନିଙ୍କୁ ହତ୍ୟା କରିବା ପାଇଁ ସର୍ବସାଧାରଣରେ ଘୋଷଣା କରିଛନ୍ତି। ଉଭୟ ଦେଶର ଏପରି ଘୋଷଣା ପରେ ଋଷିଆ ମଧ୍ୟ ଚିନ୍ତାରେ ପଡିଛି। କାରଣ ମିଡିଲ ଇଷ୍ଟର ପ୍ରାୟ ଅଞ୍ଚଳରେ ଆମେରିକାର ଚାପ ରହିଥିବା ବେଳେ ଇରାନ ଏକମାତ୍ର ଦେଶ ଭାବେ ଋଷିଆ ସମର୍ଥନରେ ଚାଲୁରହିଥିଲା। ଏଣୁ ଇରାନର କିଛି ହେଲେ ଋଷିଆ ମିଡିଲ ଇଷ୍ଟରୁ ନିଜ ପତିଆରା ହରାଇବା ଭୟରେ ରହିଛି।
ଏହି ପରିପ୍ରେକ୍ଷିରେ ଇରାନ ଉପରେ ଇସ୍ରାଏଲ ଦ୍ୱାରା ହୋଇଥିବା ଆକ୍ରମଣକୁ ପୁଟିନ ନିନ୍ଦା କରିଥିବା ବେଳେ ଆମେରିକାର ଆକ୍ରମଣକୁ ନେଇ ସେ ଏଯାଏ ମୁହଁ ଖୋଲି ନାହାନ୍ତି। ଗତ ସପ୍ତାହରେ ସେ ଇରାନ ଆକ୍ରମଣ ମାମଲାରେ ଉଭୟ ଦେଶକୁ ଶାନ୍ତ ରହିବାକୁ ପରାମର୍ଶ ଦେଇଥିବା ବେଳେ ପରମାଣୁ ପ୍ରୋଗ୍ରାମ ମାମଲାରେ ମସ୍କୋ ଉଭୟ ଦେଶ ମଧ୍ୟରେ ମଧ୍ୟସ୍ଥତା କରିବାକୁ ପ୍ରସ୍ତାବ ଦେଇଥିଲେ। ଏନେଇ ଋଷର ଜଣେ ବରିଷ୍ଠ ଅଧିକାରୀ ଖବର ସରବରାହ ସଂସ୍ଥା ରୟଟର୍ସକୁ ସୂଚନା ଦେଇ କହିଛନ୍ତି ଯେ ଇରାନର ବୈଦେଶିକ ମନ୍ତ୍ରୀ ଅବ୍ବାସ ଆରଘଛି ଖାମେନିଙ୍କ ଦ୍ୱାରା ପଠାଯାଇଥିବା ଏକ ପତ୍ର(ଲେଟର) ନେଇ ପୁଟିନଙ୍କ ନିକଟକୁ ସାକ୍ଷାତକାର କରିବାକୁ ଆସୁଛନ୍ତି। ସମ୍ପ୍ରତ୍ତି ଚାଲୁଥିବା ସଂଘର୍ଷ ମଧ୍ୟରେ ଇରାନ ଋଷଠୁ ସମର୍ଥନ ପାଇବା ପାଇଁ ଏହି ସମ୍ଭାବ୍ୟ ଗସ୍ତ ହୋଇଥାଇ ପାରେ ବୋଲି ସେ କହିଛନ୍ତି।
ତେବେ ପୁଟିନ ଓ ଆରଘଛିଙ୍କ ମଧ୍ୟରେ ହୋଇଥିବା ଆଲୋଚନା ସମ୍ପର୍କରେ କ୍ରେମଲିନ କିଛି ଗୋଷମା କରିନଥିବା ବେଳେ ଆରଘଛି ଯୁଦ୍ଧ ପାଇଁ ଉଭୟ ଦେଶ ମଧ୍ୟରେ ଆଲୋଚନା ହୋଇଥିବା ନେଇ ସୂଚନା ଦେଇଛନ୍ତି। ଋଷିଆ ଓ ତେହରାନ ମଧ୍ୟରେ ବହୁ ପୂର୍ବରୁ ଭଳ କୂଟନୈତିକ ସମ୍ପର୍କ ରହି ଆସିଛି। ଏମିତିକି ୟୁଏନର ସିକ୍ୟୁରିଟି କାଉନସିଲରେ ମଧ୍ୟ ଋଷିଆ ତେହରାନକୁ ସବୁବେଳେ ସମ୍ରଥନ କରିଆସିଛି। ଏଣୁ ଇରାନ ବୈଦେଶିକ ମନ୍ତ୍ରୀଙ୍କ ଏହି ଗସ୍ତ ପରେ ଇରାନ ସଂଘର୍ଷରେ ଋଷିଆ ମଧ୍ୟସ୍ଥତା କରିପାରେ ବୋଲି ବିଶେଷଜ୍ଞମାନେ ଅନୁମାନ ଲଗାଉଛନ୍ତି।
