ତିଗିରିଆ,୨୭/୦୬: ଆଜି ବିଶ୍ୱ ପ୍ରସିଦ୍ଧ ଘୋଷଯାତ୍ରା । ରତ୍ନବେଦୀରୁ ଜନ୍ମବେଦୀକୁ ଯାତ୍ରା କରିବେ ଶ୍ରୀଜିଉ । ଏହି ପରିପ୍ରେକ୍ଷୀରେ ପ୍ରଭୁ ଶ୍ରୀଜଗନ୍ନାଥଙ୍କ ମୁଖ୍ୟ ଅଙ୍ଗବସ୍ତ୍ର ଗୀତଗୋବିନ୍ଦ ଖଣ୍ଡୁଆ ପାଟ ପୁରୁଷୋତ୍ତମ କ୍ଷେତ୍ର କୁହାଯାଉଥିବା ତିଗିରିଆରୁ ଶ୍ରୀକ୍ଷେତ୍ରକୁ ପଠା ଯାଇଛି । ଏହା ଶ୍ରୀମନ୍ଦିର ପରମ୍ପରା ।
ବର୍ଷ ତମାମ ଶ୍ରୀକ୍ଷେତ୍ରରେ ଚତୁର୍ଦ୍ଧାମୂର୍ତ୍ତିଙ୍କ ବିଭିନ୍ନ ବେଶ ପାଇଁ ଖଣ୍ଡୁଆ ପାଟ ଲୋଡ଼ା ପଡ଼ିଥାଏ । ଏହି ପାଟକୁ ମହାପ୍ରଭୁଙ୍କ ପାଇଁ ସ୍ୱତନ୍ତ୍ର ଭାବେ କଟକ ଜିଲ୍ଲା ତିଗିରିଆ ବ୍ଲକ୍ ଅଧୀନ ହସ୍ତତନ୍ତ ପ୍ରସିଦ୍ଧ ନୂଆପାଟଣାର ବୁଣାକାରମାନେ ପ୍ରସ୍ତୁତ କରିଥାନ୍ତି । ୭/୮ଟି ବୁଣାକାର ପରିବାର ଅତି ନିଷ୍ଠାର ସହ ଶୁଦ୍ଧପୂତ ଭାବେ ମହାପ୍ରଭୁଙ୍କ ଶ୍ରୀଅଙ୍ଗ ପାଇଁ ଏହି ବସ୍ତ୍ର ତିଆରି କରିଥାନ୍ତି । ଶତାବ୍ଦୀ ଶତାବ୍ଦୀ ଧରି ପୁରୀ ଶ୍ରୀକ୍ଷେତ୍ରକୁ ନୂଆପାଟଣାରୁ ଖଣ୍ଡୁଆ ଯିବାର ପରମ୍ପରା ରହିଛି । ବିଧିମତେ ସ୍ନାନ କାର୍ଯ୍ୟ ଶେଷ କରିବା ପରେ ହିଁ ଗୀତଗୋବିନ୍ଦ ଖଣ୍ଡୁଆ ପାଟ ପ୍ରସ୍ତୁତ କରିଥାନ୍ତି ବୁଣାକାର ।
କେବଳ ସେତିକି ନୁହେଁ, ପୂରା ପରିବାର ହବିଷ୍ୟାନ୍ନ ଭୋଜନ କରିଥାନ୍ତି । ଏଥିସହ ସମ୍ପୃକ୍ତ ପରିବାରରେ ଆମିଷ ପଶେ ନାହିଁ ବୋଲି ବୟୋଜ୍ୟେଷ୍ଠ ବୁଣାକାର ତ୍ରିଲୋଚନ ଦାସ କହିଛନ୍ତି । ପୁରୁଷ ପୁରୁଷ ଧରି ସେମାନେ ମହାପ୍ରଭୁଙ୍କ ଶ୍ରୀଅଙ୍ଗ ବସ୍ତ୍ର ପ୍ରସ୍ତୁତି ସେବାରେ ନିୟୋଜିତ ହୋଇଥିବାରୁ ନିଜକୁ ଭାଗ୍ୟବାନ ମନେ କରନ୍ତି । ମହାପ୍ରଭୁ ସେମାନଙ୍କ ହାତ ତିଆରି ଗୀତଗୋବିନ୍ଦ ଖଣ୍ଡୁଆ ପରିଧାନ କରି ଘୋଷଯାତ୍ରାରେ ବାହାରିଲେ ସେମାନେ ଖୁସିରେ ଆତ୍ମବିଭୋର ହୋଇପଡ଼ୁଥିବା ପ୍ରକାଶ କରିଛନ୍ତି । ଗୀତଗୋବିନ୍ଦର ପଦାବଳିକୁ ଏହି ପାଟବସ୍ତ୍ରରେ ଅତି ଯତ୍ନର ସହକାରେ ବର୍ଣ୍ଣନା କରାଯାଇଥାଏ । ଶ୍ରୀଜିଉଙ୍କ ଅନବସର ନୀତିଠୁ ଆରମ୍ଭ କରି ଘୋଷଯାତ୍ରା ପର୍ଯ୍ୟନ୍ତ ପ୍ରଭୁଙ୍କ ଅଙ୍ଗରେ ଲାଗିହୁଏ ଏହି ବସ୍ତ୍ର । ଏଣୁ ବେଶ୍ ନିଷ୍ଠାର ସହ ବୁଣାକାର ପରିବାର ଏହାକୁ ଗୁରୁତ୍ୱ ଦେଇ କରୁଥିବା ଜଣାଯାଏ ।
