ଯାଜପୁର,୦୯/୧୧: ଯାଜପୁର-ବରୁହାଁ ମୁଖ୍ୟରାସ୍ତା ଖରସ୍ରୋତା ସେତୁ ଉପରେ ଅଜଣା ପୋକଙ୍କ ଉପଦ୍ରବ ବଢ଼ିବାରେ ଲାଗିଛି । ସନ୍ଧ୍ୟା ହେଲେ ପୋକ ନଦୀପଠାରୁ ଆସି ସେତୁ ଉପରେ ପ୍ରବଳ ମାତ୍ରାରେ ଉଡ଼ିବା ସହ ରାସ୍ତାରେ ଏକ ଆବରଣ ସୃଷ୍ଟି କରୁଛନ୍ତି । ପୋକ ଏହି ରାସ୍ତାରେ ଯାଉଥିବା ଯାତ୍ରୀଙ୍କ ଦେହ ଓ ଆଖିରେ ମାଡ଼ ହେବା ଯୋଗୁ ଯାତାୟାତ ଏକରକମ ସନ୍ଧ୍ୟା ପରେ ଠପ୍ ହୋଇଯାଉଛି ।
ଗତବର୍ଷ ସମାନ ଭାବେ ଏହି ରାସ୍ତାରେ ଅଜଣା ପୋକ ଆତଙ୍କ ଖେଳାଇଥିଲେ । ଚଳିତ ବର୍ଷ ମଧ୍ୟ ଗତ ଦୁଇଦିନ ହେବ ଅଜଣା ପୋକ ସନ୍ଧ୍ୟା ପରେ ସେତୁ ଉପରେ ଉଡ଼ୁଥିବା ଦେଖିବାକୁ ମିଳୁଛି । ଅନ୍ୟ କେଉଁସ୍ଥାନରେ ଏଭଳି ଘଟଣା ଘଟୁନଥିବା ବେଳେ ସନ୍ଧ୍ୟା ପରେ ଏହି ରାସ୍ତା ଦେଇ ଯାଉଥିବା ଗାଡ଼ି ଗୁଡ଼ିକ ବହୁ ଅସୁବିଧାର ସମ୍ମୁଖୀନ ହେଉଛି । ବିଶେଷ କରି ଦୁଇ ଓ ତିନି ଚକିଆ ଚାଳକ ଓ ଯାତ୍ରୀ ପୋକଙ୍କ ଶିକାର ହେଉଛନ୍ତି । ପୋକ ଆଖି ଓ ଦେହରେ ମାଡ଼ ହେବା ଯୋଗୁ ଗାଡ଼ି ଚାଳକ ଭାରସାମ୍ୟ ହରାଇ ଦୁର୍ଘଟଣାର ଶିକାର ହେଉଥିବା ବେଳେ ରାସ୍ତାରେ ଆବରଣ ସଦୃଶ ପୋକ ପଡ଼ୁଥିବାରୁ ଗାଡ଼ି ଚାଳକ ଭାରସାମ୍ୟ ହରାଇ ଦୁର୍ଘଟଣା ଘଟାଉଥିବା ଦେଖିବାକୁ ମିଳିଛି । ତେବେ ପୋକଙ୍କ ସେତୁ ଉପରକୁ ଆସିବାର କାରଣ ଜଣାପଡ଼ିନଥିବା ବେଳେ ସନ୍ଧ୍ୟା ପରେ ଏହି ରାସ୍ତାରେ ଗାଡ଼ିମୋଟର ଚଳାଚଳ ଏକରକମ ଠପ୍ ହୋଇଯାଉଥିବା ଜଣାପଡ଼ିଛି।
