ନିମାପଡ଼ା,୦୪/୧୧: ନିମାପଡ଼ା ଖେଲାର ଅଞ୍ଚଳରେ ଅପରାଧିକ କାର୍ଯ୍ୟ ବୃଦ୍ଧି ଫଳରେ ପୂର୍ବତନ ଥାନାଧିକାରୀଙ୍କ ଉଦ୍ୟମରେ ଏକ ପୁଲିସ୍ ସହାୟତା କେନ୍ଦ୍ର ସ୍ଥାପନ ହୋଇଥିଲା । ଏହା ବର୍ଷେ ହେବ ଅଳିଆ ଗଦାରେ ପଡ଼ିଛି । ଏଠାରେ ଜଣେ ଏଏସ୍ଆଇଙ୍କୁ ନିଯୁକ୍ତି ଦିଆଯାଇଥିଲା। ଏହା ଆଇନଶୃଙ୍ଖଳା ରକ୍ଷା ଦିଗରେ ସହାୟକ ହେଉଥିଲା । ଏବେ ଅଳିଆ ଗଦାରେ ପଡ଼ିଥିବା ପୁଲିସ ସହାୟତା କେନ୍ଦ୍ର ଉପରେ ବିଭିନ୍ନ ପ୍ରକାର ଅନାବନା ଗଛ ଉଠିଗଲାଣି । ଭାଙ୍ଗିରୁଜି ଗଲାଣି ।
ସୂଚନା ଅନୁଯାୟୀ, ଖେଲାର ବଜାରରେ ଦୁଇଶହରୁ ଊଦ୍ଧ୍ୱର୍ ବ୍ୟବସାୟୀ ରହିଥିବା ବେଳେ ଏହା ନିମାପଡ଼ା ଅଞ୍ଚଳର ଏକ ପ୍ରମୁଖ ବଜାର । ନିମାପଡ଼ାରୁ ପିପିଲିକୁ ସଂଯୋଗ ହୋଇଥିବା ମୁଖ୍ୟ ରାସ୍ତା ଖେଲାର ବଜାର ଦେଇଯାଇଛି । ପ୍ରତିଦିନ ହଜାର ହଜାର ସଂଖ୍ୟକ ଗାଡ଼ି ଚଳାଚଳ କରୁଛି । ଖେଲାର ବଜାର ନିକଟରେ କଲେଜ, ସ୍କୁଲ, ହାଟ, ପେଟ୍ରୋଲ ପମ୍ପ୍ଠାରୁ ଆରମ୍ଭ କରି ବିଭିନ୍ନ କାର୍ଯ୍ୟାଳୟ ରହିଛି । ଏହାକୁ ଦୃଷ୍ଟିରେ ରଖି ନିମାପଡ଼ା ଥାନାର ପୂର୍ବତନ ଥାନାଧିକାରୀ ସେଠାରେ ଏକ ପୁଲିସ ସହାୟତା କେନ୍ଦ୍ର ସ୍ଥାପନ କରିଥିଲେ । ଜଣେ ଠିକାଦାର ଏହାକୁ ସେଠାରୁ ଉଠାଇ ଏକ ପରିତ୍ୟକ୍ତ ସ୍ଥାନରେ ଫୋପାଡ଼ି ଦେଇଛନ୍ତି । କାହା ଆଦେଶରେ ସେଠାରୁ ପୁଲିସ ସହାୟତା କେନ୍ଦ୍ର ହଟାଯାଇଛି, ଠିକାଦାର ବିରୋଧରେ କ'ଣ ପାଇଁ ଆଇନଗତ କାର୍ଯ୍ୟାନୁଷ୍ଠାନ ନିଆଯାଇନାହିଁ ବୋଲି ଲୋକଙ୍କ ମନରେ ପ୍ରଶ୍ନ ଉଠିଛି । ଏଠାରେ ପୁନର୍ବାର ସହାୟତା କେନ୍ଦ୍ର ସ୍ଥାପନ କରି କର୍ମଚାରୀ ନିଯୁକ୍ତି ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି । ଏ ଦିଗରେ ଏସ୍ପି ଦୃଷ୍ଟି ଦେବାକୁ ଅଞ୍ଚଳବାସୀ କହିଛନ୍ତି।
