କଟକ, ୨୩/୦୬ : କଟକ ସହରରେ ଦୀର୍ଘ ଦିନ ହେବ ରହି ଆସୁଥିବା କିନ୍ନରମାନଙ୍କୁ ସରକାରୀ ସୁବିଧା ପ୍ରଦାନ କରିବା ଦାବିରେ କଟକ ମହାନଗର ନିଗମର ବିକାଶ ଭବନ କାର୍ଯ୍ୟାଳୟ ପରିସରରେ ଧାରଣା ଦେଇଛନ୍ତି। ବର୍ତ୍ତମାନ ସହରରେ ୩୦୦ରୁ ଅଧିକ କିନ୍ନର ବସବାସ କରୁଛନ୍ତି। ପୂର୍ବରୁ କଟକ ସହରର ବିଭିନ୍ନ ସ୍ଥାନରେ ରହି ଆସୁଥିବା ବେଳେ ସମ୍ପ୍ରସାରଣ ଆଳରେ ସେମାନଙ୍କୁ ଉଚ୍ଛେଦ କରାଯାଇଥିଲା। କିନ୍ତୁ ଆଜି ପର୍ଯ୍ୟନ୍ତ ସେମାନଙ୍କୁ ଥଇଥାନ କରିବା ପାଇଁ କୌଣସି ପଦକ୍ଷେପ ଗ୍ରହଣ କରାଯାଇ ନଥିବା ଅଭିଯୋଗ ହୋଇଛି।
ଏନେଇ କିନ୍ନର ସଙ୍ଘ ପକ୍ଷରୁ ବିଭାଗୀୟ ଅଧିକାରୀଙ୍କଠାରୁ ମନ୍ତ୍ରୀଙ୍କ ପର୍ୟ୍ୟନ୍ତ ସମସ୍ତଙ୍କୁ ଦାବିପତ୍ର ଦିଆଯାଇଛି । କିନ୍ତୁ ଆଜି କାଲି କହି ସେମାନଙ୍କୁ ହଇରାଣ କରୁଥିବା ଅଭିଯୋଗ କରିଛନ୍ତି । ଏମିତିକି ନୂଆ କମିଶନର ଆସିଲେ ଏ ଉପରେ ପଦକ୍ଷେପ ନେବେ କହି ଚାଲିଛନ୍ତି କର୍ତ୍ତୃପକ୍ଷ। ଏହାପରେ ଆଜି ବାଧ୍ୟ ହୋଇ କିନ୍ନରମାନେ ବିକାଶ ଭବନ ସ୍ଥିତ କମିଶନର ଅନାମ ଚରଣ ପାତ୍ରଙ୍କ କକ୍ଷ ସମ୍ମୁଖରେ ଧାରଣାରେ ବସିଛନ୍ତି । ସ୍ଥାୟୀ ସମାଧାନ ନହେବା ପର୍ଯ୍ୟନ୍ତ ଧାରଣା ଦିଆଯିବ ବୋଲି ଶୀତଲ କିନ୍ନର ସୂଚନା ଦେଇଛନ୍ତି।
