ନୂଆଦିଲ୍ଲୀ,୧୫/୦୮: ଉତ୍ତରାଖଣ୍ଡ ଉତ୍ତରକାଶୀର ଧରାଲୀ ପରେ ଏବେ ଜମ୍ମୁ-କାଶ୍ମୀରର କିସ୍ତୱାଡରେ ପ୍ରକୃତିର କରାଳ ରୂପ ଦେଖିବାକୁ ମିଳିଛି । ଏହି ପାହାଡ଼ିଆ ଅଞ୍ଚଳର ଚଶୋଟି ଗ୍ରାମ ମଚୈଲ ମାତା ଯାତ୍ରା ମାର୍ଗରେ ତାଣ୍ଡବ ରଚିଛି ବାଦଲଫଟା ବର୍ଷା । ଅଚାନକ ଜଳପ୍ରଳୟ ଯୋଗୁ ପ୍ରାୟ ୬୦ ଜଣଙ୍କ ମୃତ୍ୟୁ ଘଟିଛି । ସମୟ ବଢ଼ିବା ସହ ମୃତ୍ୟୁସଂଖ୍ୟା ବି ବଢ଼ି ବଢି ଚାଲିଛି । ମୃତକଙ୍କ ମଧ୍ୟରେ ୨ଯବାନ ରହିଛନ୍ତି । ୧୦୦ଜଣ ଆହତ ହୋଇଛନ୍ତି । ୨୦୦ରୁ ଅଧିକ ନିଖୋଜ ଅଛନ୍ତି ।
ଧରାଲି ପରେ କିସ୍ତୱାଡ଼ରେ ବାଦଲଫଟା ବର୍ଷା ଓ ବନ୍ୟା ସବୁ କିଛି ଛାରଖାର କରି ଦେଇଛି । କିସ୍ତୱାଡ଼ ପରେ ପହଲଗାମରେ ୨ଟି ସ୍ଥାନ ଏବଂ ଗାନ୍ଦରବଲରେ ବି ବାଦଲଫଟା ବର୍ଷା ହୋଇଥିବା ଜଣାପଡ଼ିଛି । ଗୁରୁବାର ପ୍ରାୟ ସାଢ଼େ ୧୨ଟାରେ ଚଶୋଟିରେ ଅଚାନକ ବାଦଲଫଟା ବର୍ଷା ହୋଇଥିଲା । ସେହି ସମୟରେ ହଜାର ହଜାର ଶ୍ରଦ୍ଧାଳୁ ମଚୈଲ ମାତା ଯାତ୍ରା ପାଇଁ କିସ୍ତୱାଡ଼ରେ ପଡ୍ଡର ଉପଖଣ୍ଡ ଚଶୋଟି ଗ୍ରାମରେ ପହଞ୍ଚିଥିଲେ । ହଠାତ୍ ବାଦଲ ଫାଟିବା ପରେ ସେଠାରେ ବନ୍ୟାଜଳ ମାଡି ଆସିଥିଲା । ଫଳରେ ଶ୍ରଦ୍ଧାଳୁଙ୍କ ବସ୍, ଟେଣ୍ଟ, ଲଙ୍ଗର ସମେତ ଅନେକ ଦୋକାନ ଭାସିଯାଇଥିଲା । ଘଟଣା ସମ୍ପର୍କରେ ସୂଚନା ମିଳିବା ପରେ ୩ ଜିଲ୍ଲା କିସ୍ତୱାଡ଼, ଡୋଡା ଓ ଭଦରୱାହରୁ ଆମ୍ବୁଲାନ୍ସ ସହ ଉଦ୍ଧାରକାରୀ ଦଳ ଉଦ୍ଧାରକାର୍ଯ୍ୟ ପାଇଁ ମଚୈଲ ଅଭିମୁଖେ ବାହାରିଥିଲେ । ଭାରତୀୟ ସେନା ଏବଂ ବାୟୁସେନା ସମେତ ସ୍ଥାନୀୟ ପ୍ରଶାସନ, ପୁଲିସ, ଏନ୍ଡିଆରଏଫ, ଏସ୍ଡିଆର୍ଏଫ୍ ଟିମ, ସିଆଇଏସଏଫ ଯବାନ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଆହତଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି ।
କିସ୍ତୱାଡ଼ରେ ପ୍ରକୃତି କୋପ କିପରି ଥିଲା ଭୟଙ୍କର ଛାତିଥରା କାହାଣୀ କହିଛନ୍ତି ପୀଡ଼ିତ । ବାଦଲଫଟା ବର୍ଷା ବୋମା ବିସ୍ଫୋରଣ ପରି ଥିଲା ବୋଲି କହିଛନ୍ତି ପ୍ରଭାବିତ ଲୋକ । ସେପଟେ ମୁଖ୍ୟମନ୍ତ୍ରୀ ଉମର ଅବଦୁଲ୍ଲାଙ୍କ ସହିତ କଥା ହୋଇ ସ୍ଥିତି ବାବଦରେ ଅବଗତ ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
