ନୂଆଦିଲ୍ଲୀ ୧୯/୦୧: ମହାକୁମ୍ଭରେ ସାଧୁ-ସନ୍ଥ ଓ ଶ୍ରଦ୍ଧାଳୁଙ୍କ ଫଟୋ ଓ ଭିଡିଓର ଚର୍ଚ୍ଚା ହେଉଛି । ଏହି କ୍ରମରେ ମହାକୁମ୍ଭ ମେଳାକୁ ଆସିଥିବା ଜଣେ ଝିଅକୁ ନେଇ ସବୁଠି ଚର୍ଚ୍ଚା । ତା’ର ଶ୍ୟାମଳ ରଙ୍ଗ ଓ ଧୂସର ଆଖି ସମସ୍ତଙ୍କୁ ଆକର୍ଷିତ କରୁଛି । ତାକୁ ଦେଖିବାକୁ ଓ ତା’ ସହ ସେଲ୍ଫି ନେବାକୁ ଲୋକେ ଭିଡ଼ ଜମାଉଛନ୍ତି । ଝିଅର ନାଁ ମୋନାଲିସା । କୁମ୍ଭମେଳାରେ ସେ ମାଳା ବିକ୍ରି କରୁଛନ୍ତି । ତାଙ୍କ ସୌନ୍ଦର୍ଯ୍ୟରେ ମୁଗ୍ଧ ହୋଇ ଦୁଇଗୁଣ ମୂଲ୍ୟ ଦେଇ ଲୋକେ ତାଙ୍କଠୁ ମାଳା କିଣୁଛନ୍ତି । ୧୬ ବର୍ଷୀୟା ମୋନାଲିସାଙ୍କ ପ୍ରାକୃତିକ ସୌନ୍ଦର୍ଯ୍ୟ ଲୋକଙ୍କୁ ମୋହିତ କରିଛି । ତାଙ୍କ ଭିଡିଓ ଇଣ୍ଟର୍ନେଟ୍ରେ ଖୁବ୍ ଭାଇରାଲ ହେଉଛି ।
ଇନ୍ଦୋର ବାସିନ୍ଦା ମୋନାଲିସା କହିଛନ୍ତି, ଇନ୍ଷ୍ଟାଗ୍ରାମ୍ରେ ତାଙ୍କର ଆକାଉଣ୍ଟ୍ ଅଛି । ଏଠାରେ ତାଙ୍କର ବହୁ ସଂଖ୍ୟାରେ ଫଲୋଅର୍ ଅଛନ୍ତି। କିନ୍ତୁ ତାଙ୍କ ସହ ସେଲ୍ଫି ନେବା ପାଇଁ ଲୋକେ ଭିଡ଼ ଜମାଉଥିବାରୁ ଅନେକ ସମୟରେ ସେ ବିରକ୍ତ ହେଉଛନ୍ତି । ତାଙ୍କର ଅନେକ ଭିଡିଓ ଇଣ୍ଟର୍ନେଟ୍ରେ ଭାଇରାଲ ହେଉଛି । ଶିବମ୍ ବିକାନେରୀ ଅଫିସିଆଲ ନାମକ ଏକ ଇନ୍ଷ୍ଟା ହ୍ୟାଣ୍ଡେଲ୍ ପକ୍ଷରୁ ମୋନାଲିସାଙ୍କର କିଛି ଭିଡିଓ ଶେୟାର କରାଯାଇଛି । ଏଥିରେ ୟୁଟୁବର୍ ମୋନାଲିସାଙ୍କ ସହ କଥା ହେଉଥିବା ନଜର ଆସିଛନ୍ତି । ତାଙ୍କୁ ବିବାହ କଥା ପଚାରିଛନ୍ତି ।
ଜବାବରେ ମୋନାଲିସା କହିଛନ୍ତି, ସେ ଏବେ ବହୁତ ଛୋଟ ଅଛନ୍ତି । ଏତେ ପ୍ରଶଂସକଙ୍କ ମଧ୍ୟରେ କାହାକୁ ପସନ୍ଦ କରିଛ ବୋଲି ପଚାରିବାରୁ ମୋନାଲିସା କହିଛନ୍ତି, ଆମ ସମ୍ପ୍ରଦାୟରେ ଏଭଳି ହୁଏ ନାହିଁ । ଆମେ ମା’ବାପାଙ୍କ ଇଚ୍ଛା ଅନୁସାରେ ହିଁ ବିବାହ କରୁ।
