ପୁରୀ, ୩୦/୦୮: ବେଧଡ଼କ ଭାବେ ଚାଲିଥିଲା ନିଶା କାରବାର । ଖବର ପାଇ ପୁରୀ ଜିଲ୍ଲା ଚନ୍ଦନପୁର ଥାନା ଅଞ୍ଚଳରେ ଅତର୍କିତ ଚଢାଉ କଲା ପୁଲିସ । ବନ୍ଧା ହେଲେ ୩ ବ୍ରାଉନ ସୁଗର ବେପାରୀ । ଗରଫ ହୋଇଥିବା ଅଭିଯୁକ୍ତମାନେ ହେଲେ ପ୍ରଦୀପ ରୁମାର ପଣ୍ଡା (୨୨ ବର୍ଷ), ଲିଟୁ ପ୍ରଧାନ (୪୦ ବର୍ଷ), ନିରଞ୍ଜନ ପରିଡ଼ା (୩୦ ବର୍ଷ) । ସେମାନଙ୍କ ନିକଟରୁ ମୋଟ ୧୫୭.୩୮ ଗ୍ରାମ୍ର ବ୍ରାଉନ ସୁଗର, ନଗଦ ୧ ଲକ୍ଷ ୬୩ହଜାର ୫୨୦ ଟଙ୍କା, ୨ଟି ବାଇକ୍ ସହ ଗୋଟିଏ ସ୍କୁଟି ଓ ୩ଟି ମୋବାଇଲ ଫୋନ୍, ମରଣାସ୍ତ୍ର ଜବତ କରିଛି ଚନ୍ଦନପୁର ପୁଲିସ । ଏନେଇ ପୁରୀ ଏସପିଙ୍କ କାଯ୍ୟଳୟରେ ଏକ ସାମ୍ବାଦିକ ସମ୍ମିଳନୀ କରି ଏସପି ପ୍ରତୀକ ସିଂ ସୂଚନା ପ୍ରଦାନ କରିଛନ୍ତି ।
ସୂଚନା ମୁତାବକ, ୩ ଜଣ ଯୁବକ ଚନ୍ଦନପୁର ଥାନା ଅଞ୍ଚଳରେ ବ୍ରାଉନ ସୁଗର ବିକ୍ରି କରୁଥିବା ନେଇ ଚନ୍ଦନପୁର ପୁଲିସ ବିଶେଷ ସୂତ୍ରରୁ ଖବର ପାଇଥିଲା । ଏହା ପରେ ଚନ୍ଦନପୁର ଥାନା ଆଇଆଇସି ଏବଂ ତାଙ୍କ ଟିମ୍ ଉକ୍ତ ସ୍ଥାନରେ ଅତର୍କିତ ଚଢାଉ କରିଥିଲେ । ପୁଲିସକୁ ଦେଖି ସଂମ୍ପୃକ୍ତ ଯୁବକମାନେ ଖସି ପଳାଇ ଯିବାକୁ ଚେଷ୍ଟା କରିଥିଲେ। ହେଲେ ପୁଲିସ ସେମାନଙ୍କୁ କାବୁ କରିବାରେ ସଫଳ ହୋଇଛି । ସେମାନଙ୍କୁ ଗିରଫ କରି ମୋଟ ୧୫୭.୩୮ ଗ୍ରାମ୍ର ବ୍ରାଉନ ସୁଗର ଜବତ କରିଛି । କେବଳ ସେତିକି ନୁହେଁ, ଲକ୍ଷାଧିକ ଟଙ୍କା, ୨ ଟି ଗାଡ଼ି ଏବଂ ୩ ଟି ମୋବାଇଲ୍ ଫୋନ୍ ମଧ୍ୟ ଜବତ କରାଯାଇଛି । ଏହି ୩ ଯୁବକ ୨ ଜଣ ସ୍ଥାନୀୟ ଡ୍ରଗ୍ ବେପାରୀଙ୍କ ଲିଙ୍କ୍ରେ ଥିଲେ ବୋଲି ଜଣାପଡ଼ିଛି । ପୁଲିସ ବର୍ତ୍ତମାନ ସେମାନଙ୍କୁ ଧରିବାକୁ ବିଭିନ୍ନ ସ୍ଥାନରେ ରେଡ୍ କରୁଛି । ଅଭିଯୁକ୍ତମନେ ଖୋର୍ଦ୍ଧା ଅଞ୍ଚଳରୁ ବ୍ରାଉନ ସୁଗର ଆଣି ପୁରୀରେ ବିକ୍ରି କରିବାକୁ ଯୋଜନା ହୋଇଥିଲା l ତେବେ ଏହାର ଚେର କେଉଁଆଡେ ଲମ୍ବିଛି ତାହାର ତଦନ୍ତ କରୁଛି ପୋଲିସ l
