ରାଇରଙ୍ଗପୁର,୧୪/୦୮: ମୟୂରଭଞ୍ଜ ଜିଲ୍ଲା ତିରିଂ ଥାନା ଅନ୍ତର୍ଗତ ଏକାଧିକ ଅଞ୍ଚଳରେ ଅବକାରୀ ବିଭାଗର ଚଢାଉ । ଏହି ରେଡ୍ରେ ୪୬୬ ଲିଟର ଦେଶୀ ରନ୍ଧା ମଦ, ୧୦.୫୦୦ ଲିଟର ବିଦେଶୀ ମଦ ଏବଂ ୯୩୦୦ ଲିଟର ମହୁଲ ପୋଚ ଜବତ ହୋଇଛି । ଏଥିରେ ସମ୍ପୃକ୍ତ ଥିବା ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଗିରଫ ଆସାମୀ ମାନେ ହେଲେ ତିରିଂ ଥାନା ଅନ୍ତର୍ଗତ ହେସେଲଡ଼ିହି ଗ୍ରାମର ଲଖ୍ମଣ ମୁର୍ମୁ, ପୋଡ଼ା ଚାକିଡ଼ି ଗ୍ରାମର ଶ୍ୟାମସୁନ୍ଦର ଟୁଡୁ, କୁଲୁଘୁଟୁ ଗ୍ରାମର ଦାମୁ ଆଲଦା, ପାଣ୍ଡୁପାଣି ଗ୍ରାମର ବୁଧୁ ହାଁସଦା ଓ ଗୋବିନ୍ଦ ମୁର୍ମୁ ।
ସୂଚନା ମୁତାବକ, ଅବକାରୀ ଅଧିକ୍ଷକ ପ୍ରଶାନ୍ତ କହଁରଙ୍କ ନିର୍ଦ୍ଦେଶକ୍ରମେ ଓ ରାଇରଙ୍ଗପୁର ଅବକାରୀ ଉପ-ଅଧିକ୍ଷକ ସୌମ୍ୟରଞ୍ଜନ ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରାଇରଙ୍ଗପୁର ଅବକାରୀ ରେଞ୍ଜ ପକ୍ଷରୁ ବହଳଦା ଅବକାରୀ ଥାନା ଭାରପ୍ରାପ୍ତ ଅଧିକାରୀ ରଣଜିତ ସବରଙ୍କ ନେତୃତ୍ୱରେ ଗଠିତ ଏକ ସ୍ୱତନ୍ତ୍ର ଟିମ୍ ଏହି ରେଡ୍ କରିଥିଲା । ତିରିଂ ଥାନା ଅନ୍ତର୍ଗତ ବାଡେପୋଟକା, ବାଗେଡ଼ିହି, ନନ୍ଦାବସା, ହେସେଲଡ଼ିହି, ପଡାଚାକିଡ଼ି, ପାଣ୍ଡୁପାଣି, କୁଲୁଘୁଟୁ ଗ୍ରାମ ଅଞ୍ଚଳରେ ଚଢ଼ାଉ କରି ୪୬୬ ଲିଟର ଦେଶୀ ରନ୍ଧା ମଦ, ୧୦.୫୦୦ ଲିଟର ବିଦେଶୀ ମଦ ଏବଂ ୯୩୦୦ ଲିଟର ମହୁଲ ପୋଚ ଜବତ କରିଥିଲା । ଏହା ସହିତ ଏଥିରେ ସମ୍ପୃକ୍ତ ମୋଟ ୫ ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଜବତ ଦେଶୀ ରନ୍ଧା ମଦ, ବିଦେଶୀ ମଦ ଓ ମହୁଲ ପୋଚର ଆନୁମାନିକ ମୂଲ୍ୟ ୭ ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ ବୋଲି ଅବକାରୀ ବିଭାଗ ସୂଚନା ଦେଇଛି । ଉକ୍ତ ଚଢ଼ାଉରେ ବିଶୋଇ ଅବକାରୀ ଥାନା ଭାରପ୍ରାପ୍ତ ଅଧିକାରୀ ପିଙ୍କି ମାରାଣ୍ଡି, ସହ ଉପ-ନିରୀକ୍ଷକ ସୁଧାଂଶୁ କୁମାର ବେହେରା, କନେଷ୍ଟବଳ ବୁଦ୍ଧଦେବ ମହ ସାମିଲ ହୋଇଥିଲେ ।
