ଫ୍ଲୋରିଡା: ପ୍ରସିଦ୍ଧ ପେଶାଦାର କୁସ୍ତିଯୋଦ୍ଧା ତଥା WWE ହଲ୍ ଅଫ୍ ଫେମର ହଲ୍କ ହୋଗାନ (ଟେରୀ ଜିନ ବୋଲେଆ) ଗୁରୁବାର ଦିନ ଫ୍ଲୋରିଡାର କ୍ଲିୟରୱାଟରସ୍ଥିତ ନିଜ ବାସଭବନରେ ହୃଦ୍ଘାତ ଯୋଗୁଁ ୭୧ ବର୍ଷ ବୟସରେ ପରଲୋକ ଗମନ କରିଛନ୍ତି। ଆନ୍ତର୍ଜାତୀୟ ଗଣମାଧ୍ୟମ TMZ ସ୍ପୋର୍ଟସ ଅନୁଯାୟୀ, ଗୁରୁବାର ସକାଳେ ତାଙ୍କ ଘରେ ହୃଦ୍ଘାତ ସମ୍ବନ୍ଧୀୟ ଏକ ଜରୁରୀ କଲ୍ ପାଇଁ ଚିକିତ୍ସା ଓ ପୁଲିସ କର୍ମୀ ପହଞ୍ଚିଥିଲେ। ହୋଗାନଙ୍କୁ ଷ୍ଟ୍ରେଚରରେ ଆମ୍ବୁଲାନ୍ସ ଯୋଗେ ମର୍ଟନ ପ୍ଲାଣ୍ଟ ହସ୍ପିଟାଲକୁ ନିଆଯାଇଥିଲା। କିନ୍ତୁ ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା।
୧୯୫୩ ମସିହା ଅଗଷ୍ଟ ୧୧ ତାରିଖରେ ଜର୍ଜିଆର ଅଗଷ୍ଟାରେ ଜନ୍ମଗ୍ରହଣ କରିଥିବା ହଲ୍କ ହୋଗାନ ୧୯୭୯ରେ ପେଶାଦାର କୁସ୍ତି ଜଗତରେ ପାଦ ଥାପିଥିଲେ। ୧୯୮୦ ଦଶକରେ ତାଙ୍କର ବ୍ୟକ୍ତିତ୍ୱ, ହଳଦିଆ-ଲାଲ ପୋଷାକ, “ରିଅଲ ଆମେରିକାନ” ପ୍ରବେଶ ସଙ୍ଗୀତ ଏବଂ “ହଲ୍କାମାନିଆ” ନାମକ ଜନପ୍ରିୟ ସ୍ଲୋଗାନ ତାଙ୍କୁ ବିଶ୍ୱବ୍ୟାପୀ ପରିଚିତ କରାଇଥିଲା। ୧୯୮୪ରେ ମ୍ୟାଡିସନ ସ୍କୋୟାର ଗାର୍ଡେନରେ ଆୟର୍ନ ଶେଖଙ୍କୁ ପରାସ୍ତ କରି ସେ ପ୍ରଥମ WWF ଚାମ୍ପିଅନସିପ ଜିତିଥିଲେ, ଯାହା “ହଲ୍କାମାନିଆ”ର ଆରମ୍ଭ ଥିଲା। ସେ ପ୍ରଥମ ନଅଟି ରେଷ୍ଟଲମେନିଆ ଇଭେଣ୍ଟରୁ ଆଠଟିରେ ମୁଖ୍ୟ ଆକର୍ଷଣ ଥିଲେ, ଯାହା ଏକ ଅନନ୍ୟ ରେକର୍ଡ। ୧୯୮୭ରେ ରେଷ୍ଟଲମେନିଆ IIIରେ ଆନ୍ଦ୍ରେ ଦି ଜାଏଣ୍ଟଙ୍କୁ ବଡ଼ିସ୍ଲାମ କରିବା ତାଙ୍କ କ୍ୟାରିଅରର ଏକ ଐତିହାସିକ ମୁହୂର୍ତ୍ତ ଥିଲା। ଯାହା ତାଙ୍କୁ ପେଶାଦାର କୁସ୍ତି ଇତିହାସରେ ଅମର କରି ରଖିବ।
୧୯୯୪ରେ ସେ ବିଶ୍ୱ ଚାମ୍ପିଅନସିପ ରେଷ୍ଟଲିଂ (WCW)ରେ ଯୋଗ ଦେଇଥିଲେ ଏବଂ ୧୯୯୬ରେ “ହଲିଉଡ” ହଲ୍କ ହୋଗାନ ଭାବେ ଏକ ଖଳନାୟକ (ହୀଲ) ଚରିତ୍ର ଗ୍ରହଣ କରି ନିଉ ଓ୍ୱାର୍ଲଡ ଅର୍ଡର (NWO) ଗଠନ କରିଥିଲେ। ଯାହା WCWକୁ ୧୮ ମାସ ପାଇଁ ଟେଲିଭିଜନ ରେଟିଂରେ WWEକୁ ପଛରେ ପକାଇ ଦେଇଥିଲା। ୨୦୦୨ରେ ସେ ପୁଣି WWEକୁ ଫେରି ଡ୍ୱେନ “ଦି ରକ” ଜନସନଙ୍କ ସହ ରେଷ୍ଟଲମେନିଆ X8ରେ ଏକ ଐତିହାସିକ ମ୍ୟାଚରେ ଅଂଶଗ୍ରହଣ କରିଥିଲେ।
କୁସ୍ତି ବ୍ୟତୀତ ହୋଗାନ ହଲିଉଡରେ ମଧ୍ୟ ନିଜ ଛାପ ଛାଡ଼ିଥିଲେ। ସେ “ରକି III” (୧୯୮୨), “ନୋ ହୋଲ୍ଡସ ବାର୍ଡ” (୧୯୮୯), “ସବଅର୍ବାନ କମାଣ୍ଡୋ” (୧୯୯୧) ଏବଂ “ମିଷ୍ଟର ନାନୀ” ଭଳି ଚଳଚ୍ଚିତ୍ରରେ ଅଭିନୟ କରିଥିଲେ। ତାଙ୍କର ରିଅଲିଟି ଶୋ “ହୋଗାନ ନୋଜ ବେଷ୍ଟ” VH1 ଚ୍ୟାନେଲରେ ଜନପ୍ରିୟ ହୋଇଥିଲା।
ହୋଗାନଙ୍କ ମୃତ୍ୟୁ ଖବର ପ୍ରକାଶ ପାଇବା ପରେ WWE ଏକ ବିବୃତିରେ କହିଛି, “WWE ହଲ୍ ଅଫ୍ ଫେମର ହଲ୍କ ହୋଗାନଙ୍କ ମୃତ୍ୟୁ ଖବରରେ ଆମେ ଦୁଃଖିତ। ୧୯୮୦ ଦଶକରେ ହୋଗାନଙ୍କ ଯୋଗଦାନ ଦ୍ୱାରା WWE ବିଶ୍ୱବ୍ୟାପୀ ପରିଚିତି ଲାଭ କରିଥିଲା। ଆମେ ତାଙ୍କ ପରିବାର, ବନ୍ଧୁ ଓ ପ୍ରଶଂସକଙ୍କ ପ୍ରତି ସମବେଦନା ଜଣାଉଛୁ।” ପେଶାଦାର କୁସ୍ତି ଜଗତରେ ତାଙ୍କର ସାଙ୍ଗ ରିକ ଫ୍ଲେୟାର ତାଙ୍କୁ ଶ୍ରଦ୍ଧାଞ୍ଜଳି ଦେଇ କହିଛନ୍ତି, “ହଲ୍କ ମୋର ଜୀବନର କଠିନ ସମୟରେ ମୋ ପାଖରେ ଥିଲେ। ସେ ଜଣେ ଅସାଧାରଣ କ୍ରୀଡ଼ାବିତ, ପ୍ରତିଭାବାନ ବ୍ୟକ୍ତି ଓ ବନ୍ଧୁ ଥିଲେ।” X ପ୍ଲାଟଫର୍ମରେ ପ୍ରଶଂସକ ଓ ସହକର୍ମୀମାନେ ତାଙ୍କୁ “ଆମେରିକୀୟ ପପ୍ ସଂସ୍କୃତିର ଆଇକନ” ଭାବେ ସ୍ମରଣ କରୁଛନ୍ତି।
ସୂଚନା ଅନୁଯାୟୀ, ମୃତ୍ୟୁ ସମୟରେ ସେ ନିଜ ପରିବାର ସଦସ୍ୟଙ୍କ ସହ ଥିଲେ। ହଲ୍କ ହୋଗାନଙ୍କ ମୃତ୍ୟୁ ପେଶାଦାର କୁସ୍ତି ଜଗତ ପାଇଁ ଏକ ଅପୂରଣୀୟ କ୍ଷତି। ତାଙ୍କର ଅବଦାନ ଏବଂ “ହଲ୍କାମାନିଆ” ଚିରସ୍ମରଣୀୟ ହୋଇ ରହିବ।
