ନୂଆଦିଲ୍ଲୀ: ମୁମ୍ବାଇ ଆତଙ୍କବାଦୀ ଆକ୍ରମଣର ଅଭିଯୁକ୍ତ ତହବୁର ରାଣାକୁ ଆମେରିକାରୁ ଭାରତ ଅଣାଯାଇଛି। ଆମେରିକା ପୋଲିସ ତହବୁର ରାଣାକୁ NIAକୁ ହସ୍ତାନ୍ତର କରିବାର ଗୋଟିଏ ଦିନ ପରେ ଏବେ ଏହାର ଚିତ୍ର ସାମ୍ନାକୁ ଆସିଛି। ଚିତ୍ରରେ ଦେଖାଯାଉଛି ଯେ, ଯେତେବେଳେ ତହବୁର ରାଣାଙ୍କୁ ଭାରତକୁ ହସ୍ତାନ୍ତର କରାଯାଇଥିଲା, ତାଙ୍କ ହାତରେ ହାତକଡି, ଗୋଡରେ ବେଡି ଏବଂ ତାଙ୍କ ଅଣ୍ଟାରେ ଏକ ଶିକୁଳି ଥିଲା।

ଫଟୋ ଗୁଡ଼ିକରେ ଦେଖାଯାଉଛି ଯେ, ରାଣାଙ୍କ ହାତ ଏବଂ ଗୋଡରେ ହାତକଡ଼ି ଲାଗିଛି। ଦୁର୍ବଳ ଦେଖାଯାଉଥିବା ରାଣାଙ୍କର କେଶ ଏବଂ ଦାଢ଼ି ଧଳା ଏବଂ ସେ ମାଟିଆ ରଙ୍ଗର ପୋଷାକ ପିନ୍ଧିଛନ୍ତି। କିନ୍ତୁ, ଫଟୋଟି ପଛରୁ ଉଠାଯାଇଥିବାରୁ ତାଙ୍କ ମୁହଁ ଦେଖାଯାଉ ନଥିଲା। ତାଙ୍କୁ ଲସ୍ ଆଞ୍ଜେଲସରେ ଭାରତୀୟ ଅଧିକାରୀ ମାନଙ୍କୁ ଆନୁଷ୍ଠାନିକ ଭାବରେ ହସ୍ତାନ୍ତର କରାଯାଇଥିବା ସମୟରେ ୟୁଏସ୍ ମାର୍ଶାଲ ମାନେ ଘେରି ରହିଛନ୍ତି। ଏହି ଫଟୋ ଗୁଡ଼ିକ ଆମେରିକାର ନ୍ୟାୟ ବିଭାଗ ଦ୍ୱାରା ସେୟାର କରାଯାଇଛି।

ତହବୁର ରାଣାଙ୍କ ପ୍ରତ୍ୟର୍ପଣକୁ "ଜଘନ୍ୟ ଆକ୍ରମଣରେ ପ୍ରାଣ ହରାଇଥିବା ଛଅ ଜଣ ଆମେରିକୀୟ ଏବଂ ଅନେକ ପୀଡିତଙ୍କ ପାଇଁ ନ୍ୟାୟ ପାଇବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ" ବୋଲି ଆମେରିକା ବର୍ଣ୍ଣନା କରିଛି । ଆମେରିକାର ବୈଦେଶିକ ବିଭାଗର ମୁଖପାତ୍ର ଟାମି ବ୍ରୁସ୍ ୱାଶିଂଟନରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, "ରାଷ୍ଟ୍ରପତି ଟ୍ରମ୍ପ କହିଛନ୍ତି ଯେ, ଆମେରିକା ଏବଂ ଭାରତ ଆତଙ୍କବାଦର ବିଶ୍ୱବ୍ୟାପୀ ଭୟଙ୍କର ମୁକାବିଲା ପାଇଁ ଏକାଠି କାମ କରିବା ଜାରି ରଖିବେ।

ପାକିସ୍ତାନ ନିଜକୁ ତହବୁର ରାଣାଙ୍କ ଠାରୁ ଦୂରେଇ ରହିଛି ଏବଂ କହିଛି ଯେ ଏହା ସ୍ପଷ୍ଟ ଯେ ସେ ଜଣେ କାନାଡିଆନ୍ ନାଗରିକ। ଏକ ସାମ୍ବାଦିକ ସମ୍ମିଳନୀରେ ଏକ ଅନ୍ତର୍ଜାତୀୟ ଗଣମାଧ୍ୟମର ପାକିସ୍ତାନ ବ୍ୟୁରୋ ମୁଖ୍ୟଙ୍କ ପ୍ରଶ୍ନର ଉତ୍ତରରେ, ପାକିସ୍ତାନ ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ, ରାଣା "ଦୁଇ ଦଶନ୍ଧିରୁ ଅଧିକ ସମୟ ଧରି ତାଙ୍କର ପାକିସ୍ତାନୀ ଡକ୍ୟୁମେଣ୍ଟ ନବୀକରଣ କରିନାହାଁନ୍ତି।" ସେ ଆହୁରି ମଧ୍ୟ କହିଛନ୍ତି ଯେ ରାଣାଙ୍କ କାନାଡିଆନ୍ ନାଗରିକତା ବହୁତ ସ୍ପଷ୍ଟ।

ଇସ୍ରାଏଲ ରାଣାଙ୍କ ପ୍ରତ୍ୟର୍ପଣକୁ ଏକ "ଅତି ଗୁରୁତ୍ୱପୂର୍ଣ୍ଣ ପଦକ୍ଷେପ" ବୋଲି ବର୍ଣ୍ଣନା କରିଛି। ଇସ୍ରାଏଲୀ ରାଷ୍ଟ୍ରଦୂତ ରୁଭେନ ଆଜାର କହିଛନ୍ତି, "୨୬/୧୧ ମୁମ୍ବାଇ ଆକ୍ରମଣର ଅପରାଧୀଙ୍କୁ ନ୍ୟାୟ ପାଇଁ ଭାରତ ସରକାରଙ୍କ ପ୍ରୟାସ ପାଇଁ ଆମେ ଧନ୍ୟବାଦ ଦେଉଛୁ। ଅନେକ ଜୀବନ ନେଇଥିବା ଭୟଙ୍କର ଆକ୍ରମଣ ପାଇଁ ଉତ୍ତରଦାୟିତ୍ୱ ପ୍ରତି ଏହି ପଦକ୍ଷେପକୁ ଆମେ ସ୍ୱାଗତ କରୁଛୁ ।