ନୂଆଦିଲ୍ଲୀ: ମୁମ୍ବାଇର ପ୍ରସିଦ୍ଧ ଲୀଳାବତୀ ହସ୍ପିଟାଲରେ ଗୁଣିଗାରେଡିର ଏକ ଆଶ୍ଚର୍ଯ୍ୟଜନକ ଘଟଣା ଏବେ ସାମ୍ନାକୁ ଆସିଛି। ଏହା ସହିତ, ଲୀଳାବତୀ ହସ୍ପିଟାଲ ଟ୍ରଷ୍ଟର ବର୍ତ୍ତମାନର ସଦସ୍ୟ ମାନେ ପୂର୍ବତନ ଟ୍ରଷ୍ଟିମାନଙ୍କ ଉପରେ ୧୨ ଶହ କୋଟି ଟଙ୍କା ହଡ଼ପ କରିବାର ଅଭିଯୋଗ ଆଣିଛନ୍ତି। କେବଳ ଏତିକି ନୁହେଁ ଏହା ମଧ୍ୟ ଅଭିଯୋଗ ହୋଇଛି ଯେ,ବର୍ତ୍ତମାନର ଟ୍ରଷ୍ଟ ସଦସ୍ୟଙ୍କ କାର୍ଯ୍ୟାଳୟ ତଳେ ହାଡ଼ ଏବଂ ମଣିଷ ଲୋମରେ ଭର୍ତ୍ତି ୮ ଟି କଳସ ମିଳିଛି, ଯାହାକୁ ନେଇ ଏବେ ସେଠାରେ ଉତ୍ତେଜନା ସୃଷ୍ଟି ହୋଇଛି। ଏହି ମାମଲାରେ ପୋଲିସ ଏକ ଏଫଆଇଆର ରୁଜୁ କରିଛି।
ମୁମ୍ବାଇର ପୂର୍ବତନ ପୋଲିସ କମିଶନର ପରମବୀର ସିଂହ ବର୍ତ୍ତମାନ ଲୀଳାବତୀ ହସ୍ପିଟାଲର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅଛନ୍ତି। ପୂର୍ବତନ କମିଶନର ଲୀଳାବତୀ ହସ୍ପିଟାଲର ପୂର୍ବତନ ପରିଚାଳନା ଉପରେ ୧୨୦୦ କୋଟି ଟଙ୍କାର ଘୋଟାଲା କରିଥିବା ଅଭିଯୋଗ ଆଣିଛନ୍ତି ବୋଲି ସୂଚନା ରହିଛି । ଏନେଇ ମୁମ୍ବାଇର ବାନ୍ଦ୍ରା ପୋଲିସ ଷ୍ଟେସନରେ ୧୭ ଜଣଙ୍କ ବିରୋଧରେ ମାମଲା ରୁଜୁ କରାଯାଇଛି, ଯେଉଁଥିରେ ପରିଚାଳନା ସହ ଜଡିତ ଲୋକ ମଧ୍ୟ ସାମିଲ ଅଛନ୍ତି। ତେବେ ହସ୍ପିଟାଲରେ ଘୋଟାଲା ହୋଇଥିବା ନେଇ ଆଭ୍ୟନ୍ତରୀଣ ଅଡିଟ୍ ପରେ ଏହି ଘଟଣା ସାମ୍ନାକୁ ଆସିଛି।
ଏହି ମାମଲାରେ, ଲୀଳାବତୀ କୀର୍ତ୍ତିଲାଲ ମେହେଟା ମେଡିକାଲ୍ ଟ୍ରଷ୍ଟ ପୋଲିସ ଏବଂ ଇଡି ନିକଟରେ ଅଭିଯୋଗ କରିଛି ଏବଂ ଟଙ୍କା ଫେରସ୍ତ ପାଇବା ପାଇଁ କୋର୍ଟର ଦ୍ୱାରସ୍ଥ ହୋଇଛି। ଟ୍ରଷ୍ଟ ଅଭିଯୋଗ କରିଛି ଯେ, ପାଣ୍ଠିର ଏହି ଅଭାବ ଯୋଗୁଁ ହସ୍ପିଟାଲରେ ଦୈନିକ ହଜାର ହଜାର ରୋଗୀଙ୍କୁ ଯୋଗାଇ ଦିଆଯାଉଥିବା ସେବା ପ୍ରଭାବିତ ହେଉଛି। ଗୁରୁବାର ଗଣମାଧ୍ୟମ ସହିତ କଥାବାର୍ତ୍ତା ସମୟରେ, ଲୀଳାବତୀ ହସ୍ପିଟାଲର କାର୍ଯ୍ୟନିର୍ବାହୀ ନିର୍ଦ୍ଦେଶକ ପରମବୀର ସିଂହ କହିଛନ୍ତି ଯେ ଦାୟୀ ଟ୍ରଷ୍ଟିମାନେ ବେଲଜିୟମ ଏବଂ ଦୁବାଇରେ ଅଛନ୍ତି।
ବର୍ତ୍ତମାନ, ମାମଲାଟି ମୁମ୍ବାଇର ଅର୍ଥନୈତିକ ଅପରାଧ ଶାଖା (EOW)କୁ ସ୍ଥାନାନ୍ତରିତ କରାଯାଇଛି। ପରମବୀର ସିଂହ କହିଛନ୍ତି ଯେ ପୂର୍ବତନ ଟ୍ରଷ୍ଟିମାନେ ମଧ୍ୟ ହସ୍ପିଟାଲରେ କଳାଯାଦୁ କରିଥିଲେ ଏବଂ ହାଡ଼ ଏବଂ ମଣିଷ କେଶରେ ଭର୍ତ୍ତି କଳସ ମଧ୍ୟ ମହଲା ତଳେ ମିଳିଛି। କିଛି ପୁରୁଣା କର୍ମଚାରୀ ତାଙ୍କୁ ଏହି ସମ୍ପୂର୍ଣ୍ଣ ଠକେଇ ବିଷୟରେ କହିଥିଲେ।
