ବାରିପଦା, ୧୧/୦୧ : ବାରିପଦାରେ ବଢି ଚାଲିଛି ଚୋରି ଏବଂ ଛିନ୍ତାଇ। ନା ଅଛି ପୋଲିକୁ ଭୟ କି ଖାତିର୍। ଦିନ ଦ୍ଵିପ୍ରହରରେ ଥାନା ସମ୍ମୁଖରୁ ଝାମ୍ପିନେଲେ ସୁନା ଚେନ୍। ବାରିପଦା ଟାଉନ ଥାନା ସମ୍ମୁଖରୁ ଲୁଟ୍ ହୋଇଛି। ଏକ ବାଇକ୍ରେ ଆସି ମହିଳାଙ୍କ ବେକରୁ ଚେନ୍ ଝାମ୍ପନେଲେ ଦୁର୍ବୃତ୍ତ।
ସୂଚନାନୁଯାୟୀ, ବାରିପଦା ଟାଉନ ଥାନା ଅନ୍ତର୍ଗତ ବଡ଼ବଜାର ଅଞ୍ଚଳର ପୂର୍ଣ୍ଣମ ଖଣ୍ଡେଲଓଆଲ ଶ୍ୟାମ ବାବା କଳସ ଶୋଭାଯାତ୍ରାରେ ଯୋଗ ଦେଇ ଘରକୁ ଫେରୁଥିଲେ। ଦିନ ୧୧ଟା ବେଳେ ଦୁଇ ଜଣ ଦୁର୍ବୃତ୍ତ ଏକ ବାଇକ୍ରେ ଆସି ଥାନା ସମ୍ମୁଖରୁ ତାଙ୍କ ବେକରୁ ସୁନା ଚେନ୍ ଝାମ୍ପି ନେଇଛନ୍ତି। ସୁନା ଚେନ୍ଟି ୩୫ ରୁ ୪୦ ଗ୍ରାମର ଥିବା ଜଣାପଡ଼ିଛି। ଏନେଇ ସେ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଘଟଣାର ତଦନ୍ତ ଆରମ୍ଭ କରିଛି। ସ୍ଥାନୀୟ ଅଞ୍ଚଳର ସିସିଟିଭି ଫୁଟେଜ ଆଧାରରେ ପୋଲିସ ତନାଘନା ଆରମ୍ଭ କରିଛି।
ଆଜି ବାରିପଦା ସହରର ତିନୋଟି ସ୍ଥାନରେ ଏଭଳି ଛିନ୍ତାଇ ହୋଇଥିବା ସୂଚନା ମିଳିଛି। ସହରରେ ଆଇନ ଶୃଙ୍ଖଳା ସ୍ଥିତି ବିପର୍ଯ୍ୟସ୍ତ ହୋଇପଡିଛି। ଦିନକୁ ଦିନ ବଢି ଚାଲିଥିବା ଅପରାଧ ଉପରେ ପୋଲିସର ନିୟନ୍ତ୍ରଣ ରହୁନାହିଁ। ଯାହାକୁ ନେଇ ସ୍ଥାନୀୟ ଲୋକେ ପୋଲିସର ପାରିବା ପଣିଆ ଉପରେ ପ୍ରଶ୍ନ ଉଠାଇଛନ୍ତି। ସେପଟେ ସହରରେ ଦିନକୁ ଦିନ ବଢୁଥିବା ଚୋରି ଏବଂ ଲୁଟ୍ ଘଟଣା ଏବେ ପୋଲିସର ମୁଣ୍ଡବିନ୍ଧାର କାରଣ ପାଲଟିଛି।
