ପୁରୀ,୩୦/୦୬: ମହାବେଦିରେ ବିଜେ ମହାବାହୁ । ବର୍ଷକ ବ୍ୟବଧାନରେ ଚତୁର୍ଦ୍ଧାମୂର୍ତ୍ତି ଜନ୍ମବେଦିକୁ ବାହୁଡ଼ିଛନ୍ତି । ରବିବାର ରାତିରେ ରଥାରୂଢ଼ ଶ୍ରୀବିଗ୍ରହଙ୍କୁ ସେବକମାନେ ଗୋଟି ପହଣ୍ଡିରେ ନେଇ ଆଡ଼ପ ମଣ୍ଡପରେ ବିଜେ କରାଇଛନ୍ତି । ଏଣୁ ଗୁଣ୍ଡିଚା ଘରେ ପୁଣି ଭିଡ଼ ଆରମ୍ଭ ହୋଇଯାଇଛି । ସୋମବାର ଠାରୁ ଭକ୍ତ ପାଇବେ ଠାକୁରଙ୍କ ଆଡ଼ପ ଦର୍ଶନ ଓ ଆଡ଼ପ ଅବଢ଼ା । ଏହି ସୌଭାଗ୍ୟ ଲଭିବାକୁ ଉତ୍କଣ୍ଠାର ସହ ଲକ୍ଷ ଲକ୍ଷ ଭକ୍ତ ଅପେକ୍ଷା କରିଥାନ୍ତି । ତେବେ ଠାକୁରଙ୍କ ବନକଲାଗି ତଥା ଶ୍ରୀମୁଖ ସିଂହାର ପାଇଁ ସୋମବାର ରାତିରେ ୫ ଘଣ୍ଟା ଠାକୁରଙ୍କ ଦର୍ଶନ ବନ୍ଦ ରହିବ । ମଧ୍ୟାହ୍ନ ଧୂପ ପରେ ପଛ ଭୋଗ ମଣ୍ଡପ ଶେଷ ହୋଇ ବନକଲାଗି ଅନୁଷ୍ଠିତ ହେବ । ଦତ୍ତମହାପାତ୍ର ସେବକମାନେ ଠାକୁରଙ୍କ ବନକଲାଗି କରିବେ । ଏଥିପାଇଁ ସୋମବାର ରାତି ୯ଟାରୁ ୨ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
ଶ୍ରୀଗୁଣ୍ଡିଚା ଠାରୁ ତିନି ଦିନ ଧରି ପାଗ ମେଘାଛନ୍ନ ତଥା ଅନୁକୂଳ ରହିଛି । ଏଣୁ ଶରଧାବାଲିକୁ ଛୁଟିଛି ଭକ୍ତଙ୍କ ସୁଅ । ଅଗଣିତ ଭକ୍ତଙ୍କ ଗହଣରେ ଥିଲେ ଦାରୁବ୍ରହ୍ମ । ଚାଲିଥିଲା ସଂକୀର୍ତ୍ତନ ମଣ୍ଡଳୀଙ୍କ ଭଜନ କୀର୍ତ୍ତନ । ଅଘଟଣ ପରେ ପୂର୍ବାହ୍ନରୁ ଭକ୍ତଙ୍କ ସୁରକ୍ଷା ଦୃଷ୍ଟିରୁ ପୁଲିସକର୍ମୀ ସଜାଗ ଥିଲେ । ଏଣୁ ଲକ୍ଷାଧିକ ଭକ୍ତ ତଳେ ଥାଇ ଠାକୁରଙ୍କ ଦର୍ଶନ କରିଥିଲେ । ଇତିମଧ୍ୟରେ ରଥାରୂଢ଼ ଠାକୁରଙ୍କ ମଙ୍ଗଳ ଆଳତି ନୀତି ବଢ଼ି ଅବକାଶ, ରୋଷହୋମ, ସୂର୍ଯ୍ୟପୂଜା, ଗୋପାଳବଲ୍ଲଭ ଭୋଗ, ସକାଳଧୂପ, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି ହୋଇ ଅପରାହ୍ନ ୨ଟା୪୫ମିନିଟ୍ରେ ସନ୍ଧ୍ୟାଧୂପ ବଢ଼ିଥିଲା । ଏହା ପରେ ଶ୍ରୀବିଗ୍ରହଙ୍କ ପହଣ୍ଡିପାଇଁ ସଜବାଜ ହୋଇଥିଲା । ରଥରୁ ଘୋଡ଼ା ଫିଟାଯାଇ ଚାରମାଳ ଲାଗିବା ଆରମ୍ଭ ହୋଇଥିଲା ।
ପହଣ୍ଡି ପୂର୍ବରୁ ରଥ ଉପରେ ସିଂହାସନ ମାଜଣା ହୋଇ ପୁଷ୍ପାଞ୍ଜଳି ଅର୍ପଣ ହେଲା । ଏହାପରେ ବିଜେ କାହାଳି ବାଜି ସନ୍ଧ୍ୟା ୬ଟା୫୦ରେ ପ୍ରାୟ ପହଣ୍ଡି ଆରମ୍ଭ ହେଲା । ଘଣ୍ଟ ଓ ମର୍ଦ୍ଦଳର ଧ୍ୱନି ସାଙ୍ଗକୁ ଉପସ୍ଥିତ ହଜାର ହଜାର ଭକ୍ତଙ୍କ ଜୟଜଗନ୍ନାଥ ଧ୍ୱନିରେ ଗୁଞ୍ଜରି ଉଠିଥିଲା ଶରଧାବାଲି । ପ୍ରଥମେ ତାଳଧ୍ୱଜ ରଥରୁ ଶ୍ରୀରାମକୃଷ୍ଣଙ୍କୁ ଓ ନନ୍ଦିଘୋଷରୁ ମହାପ୍ରଭୁଙ୍କ ଚଳନ୍ତି ପ୍ରତିମା ଶ୍ରୀମଦନମୋହନଙ୍କୁ ପହଣ୍ଡି କରାଯାଇଥିଲା । ଏହାପରେ ଦେବଦଳନ ରଥରୁ ଶ୍ରୀସୁଦର୍ଶନଙ୍କୁ ପହଣ୍ଡି କରାଇ ନିଆଗଲା । ଶ୍ରୀବଳଭଦ୍ରଙ୍କ ପହଣ୍ଡି ସାଢ଼େ ୭ଟା ପରେ ଆରମ୍ଭ ହୋଇଥିଲା । ସାଢ଼େ ୮ଟାରେ ମା'ସୁଭଦ୍ରା ଓ ଶେଷରେ ମହାପ୍ରଭୁ ଶ୍ରୀଜଗନ୍ନାଥ ପହଣ୍ଡି ହୋଇ ଆଡ଼ପ ମଣ୍ଡପରେ ଅଧିଷ୍ଠିତ ହୋଇଥିଲେ । ପହଣ୍ଡି ସମୟରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀଙ୍କ ସମେତ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
ଗୁଣ୍ଡିଚା ଘର ଆଡ଼ପ ମଣ୍ଡପରେ ବିଜେ ହେବାପରେ ଦଇତାପତି ସେବକମାନେ ସିଂହାସନରେ ଶ୍ରୀବିଗ୍ରହଙ୍କୁ ରୁନ୍ଧିଥିଲେ । ପରେ ବିଳମ୍ୱିତ ରାତିରେ ଠାକୁରଙ୍କ ସ୍ୱତନ୍ତ୍ର ନୀତି ଅନୁଷ୍ଠିତ ହୋଇଥିଲା । ସୋମବାର ଠାରୁ ଶ୍ରଦ୍ଧାଳୁମାନେ ଶ୍ରୀଗୁଣ୍ଡିଚା ଘରେ ଠାକୁରଙ୍କ ଆଡ଼ପ ମଣ୍ଡପ ଦର୍ଶନ ସମେତ ଆଡ଼ପ ଅବଢ଼ା ପାଇବେ । ଆସନ୍ତା ଜୁଲାଇ ୧ ତାରିଖ ମଙ୍ଗଳବାର ହେରାପଞ୍ଚମୀ ନୀତି ହେବ । ୨ ତାରିଖ ବୁଧବାର ରଥ ଦକ୍ଷିଣ ମୋଡ଼ । ୪ ତାରିଖ ଶୁକ୍ରବାର ସନ୍ଧ୍ୟାଦର୍ଶନ ଅନୁଷ୍ଠିତ ହେବ । ସେହି ଦିନ ପର୍ଯ୍ୟନ୍ତ ଠାକୁରେ ଆଡପମଣ୍ଡପରୁ ଭକ୍ତଙ୍କୁ ଦର୍ଶନ ଦେବେ । ୫ ତାରିଖ ଶନିବାର ଶ୍ରୀମନ୍ଦିର ଅଭିମୁଖେ ମହାପ୍ରଭୁଙ୍କ ବାହୁଡା ବିଜେ ।
ଦୁଇ ସିନ୍ଦୁକରେ ଆସିଛି ବେଶ ଓ ନୀତି ସଜ
ମହାପ୍ରଭୁଙ୍କ ଅନନ୍ୟ ରୀତିନୀତି ପାଇଁ ଲୋଡ଼ା ସମସ୍ତ ସାମଗ୍ରୀ । ଯାତ୍ରା ସମୟରେ ରଥରେ ଦୁଇଟି ବିଶାଳ ସିନ୍ଦୁକରେ ଆସିଛି ଠାକୁରଙ୍କ ନୀତି ଓ ବେଶ ସଜ । ଗୋଟିଏରେ ଥାଏ ଠାକୁରଙ୍କ ୬ ମୂର୍ତ୍ତି ଆଦି ଆବଶ୍ୟକ ସୁବର୍ଣ୍ଣ ଅଳଙ୍କାର । ବେଶଭୂଷା ଅଳଙ୍କାର ଆଦି ଭଣ୍ଡାର ମେକାପ ସେବକଙ୍କ ତତ୍ତ୍ୱାବଧାନରେ ରହିଥାଏ । ଅନ୍ୟଟିରେ ରୁପା ପିଙ୍ଗଣ, ବଟା, ବିଭିନ୍ନ ପାତ୍ର ଓ ପାଟବସ୍ତ୍ର ଆଦି ସଜ ରହିଥାଏ । ଏହା ଚାଙ୍ଗଡ଼ା ମେକାପଙ୍କ ଅଧୀନରେ ରହେ । କୋଠସୁଆଁସିଆ ସେବକମାନେ ସିନ୍ଦୁକକୁ ନେବାଆଣିବା କରୁଛନ୍ତି ।
