ପୁରୀ,୦୧/୦୯: ଶ୍ରୀମନ୍ଦିରରେ ରାଧାଷ୍ଟମୀ ପର୍ବ ପାଳନ ଅବସରରେ ମହାପ୍ରଭୁ ବଡ଼ଦେଉଳର ବାର୍ଷିକ ଆୟବ୍ୟୟର ହିସାବ ନେଇଛନ୍ତି । ଶ୍ରୀ ସୁଦର୍ଶନ ଦେବ ଠାକୁରଙ୍କ ପ୍ରତିନିଧି ଭାବେ ରବିବାର ଏହି ବିଧି ସମ୍ପନ୍ନ କରିଛନ୍ତି । ସେବାୟତ ଓ ଭକ୍ତଙ୍କ ଗହଣରେ ଚଉଦୋଳରେ ଶ୍ରୀସୁଦର୍ଶନ ଶ୍ରୀମନ୍ଦିରରୁ ବାହାରି ନଗର ପରିକ୍ରମା କରିବା ସହ ଗୌଡ଼ବାଡ଼ ସାହିସ୍ଥିତ ଜମ୍ବେଶ୍ୱରଙ୍କ ମନ୍ଦିରରେ ବିଜେ ହୋଇ ଶ୍ରୀଜମ୍ବେଶ୍ୱରଙ୍କଠାରୁ ଆୟ-ବ୍ୟୟର ହିସାବ ନେଇଥିଲେ । ବଡ଼ଦେଉଳ ପରମ୍ପରା ଅନୁସାରେ ଶ୍ରୀଜମ୍ବେଶ୍ୱର ମହାଦେବ ସମସ୍ତ ବିବରଣୀ ଦେଇଥିଲେ ।
ମଧ୍ୟାହ୍ନ ଧୂପ ପରେ ସୁଦର୍ଶନ ବିଜେ ନୀତି ଆରମ୍ଭ ହୋଇଥିଲା । ପୂଜାପଣ୍ଡା ସାମନ୍ତ ମହାପ୍ରଭୁଙ୍କ ଆଜ୍ଞାମାଳ ଆଣି ଶ୍ରୀସୁଦର୍ଶନଙ୍କୁ ଦେଇଥିଲେ । ଦଇତାପତିମାନେ ଶ୍ରୀସୁଦର୍ଶନଙ୍କୁ ଜଗମୋହନସ୍ଥିତ ଚଉଦୋଳରେ ବିଜେ କରାଇଥିଲେ । ଶ୍ରୀସୁଦର୍ଶନଙ୍କୁ ରୁନ୍ଧା ସହ ପାଟପତନୀ ଲାଗି କରାଯାଇଥିଲା । ଝୁଲଣ ମଣ୍ଡପ ନିକଟରେ ଠାକୁରେ ସୁନା ହରଡ଼ମାଳ ଓ ଚୂଳ ଲାଗି ହୋଇଥିଲେ । ଘଣ୍ଟ ଘଣ୍ଟାର ପଟୁଆରରେ ସୁଦର୍ଶନ ଦେବ ଶ୍ରୀମନ୍ଦିର ବେଢ଼ା କରି ନଗର ପରିକ୍ରମାରେ ବାହାରି ଥିଲେ । ରାତ୍ରରେ ଶ୍ରୀଜମ୍ୱେଶ୍ୱରଙ୍କ ମନ୍ଦିରରେ ଶ୍ରୀସୁଦର୍ଶନ ବିଜେ ହୋଇଥିଲେ । ସେଠାରେ ଶୀତଳଭୋଗ ଓ ପ୍ରସାଦ ଲାଗି ନୀତି ଅନୁଷ୍ଠିତ ହୋଇଥିଲା ।
ଯଥାବିଧି ନୀତି ଶେଷ ପରେ ସୁଦର୍ଶନ ଦେବ ଶ୍ରୀମନ୍ଦିରକୁ ବାହୁଡା ବିଜେ କରିଥିଲେ । ସନ୍ଧ୍ୟା ଆଳତୀ ସମ୍ପନ୍ନ ହୋଇଥିଲା । ଶ୍ରୀସୁଦର୍ଶନଙ୍କୁ ପ୍ରସାଦ ଲାଗି କରାଯାଇଥିଲା । ଭୋଗ ଶେଷ ହେବାପରେ ଶ୍ରୀବିଗ୍ରହଙ୍କ ବନ୍ଦାପନା ବିଧି ଶେଷ ହୋଇ ରାଧାଷ୍ଟମୀ ନୀତି ସମ୍ପନ୍ନ ହୋଇଥିଲା। ଏହି ଅବସରରେ ଶ୍ରୀକ୍ଷେତ୍ରର ପ୍ରସିଦ୍ଧ ଋଷି ଆଶ୍ରମ, ବିଭିନ୍ନ ମଠ, ଅନୁଷ୍ଠାନ ଓ ବ୍ୟକ୍ତି ବିଶେଷଙ୍କ ପକ୍ଷରୁ ଶ୍ରୀସୁଦର୍ଶନଙ୍କୁ ପନ୍ତି ଭୋଗ ଅର୍ପଣ କରାଯାଇଥିଲା ।
