ନୂଆଦିଲ୍ଲୀ ୧୯/୦୧: ପବିତ୍ର ମହାକୁମ୍ଭକୁ ପାକିସ୍ତାନରୁ ଆସିବେ ସାଧୁ । ପାକିସ୍ତାନର ସିନ୍ଧ ପ୍ରାନ୍ତ ସ୍ଥିତ ସିନ୍ଧୀ ସମାଜର ପ୍ରମୁଖ ଧାର୍ମିକ ସ୍ଥଳ ସଚ୍ଚୋ ସତରାମ ଧାମର ପୀଠାଧୀଶ୍ୱର ସାଈ ସାଧରାମ ମହାରାଜ ଓ ତାଙ୍କର ୫୦ରୁ ଅଧିକ ଅନୁଗାମୀ ମହାକୁମ୍ଭକୁ ଆସିବେ । ଏମାନେ ସମସ୍ତେ ମହାକୁମ୍ଭରେ ଗଙ୍ଗା ସ୍ନାନ କରିବେ । ଏଥିପାଇଁ ସମସ୍ତେ ଭିସା ଆବେଦନ କରିଛନ୍ତି । ସାଈ ସାଧରାମ ମହାରାଜ ସିନ୍ଧୀ ସମାଜର ଆରାଧ୍ୟ ଦେବ ଝୁଲେଲାଲଙ୍କ ପ୍ରାକଟ୍ୟ ସ୍ଥଳୀ ରହଡ଼କରେ ସ୍ଥିତ ସଚ୍ଚୋ ସତରାମ ଧାମର ପ୍ରମୁଖ । ଆସନ୍ତା ଫେବ୍ରୁଆରୀରେ ଶିଷ୍ୟ ଓ ଅନୁଗାମୀଙ୍କ ସହ ସେ ମହାକୁମ୍ଭରେ ସାମିଲ ହେବେ ।
ତୀର୍ଥରାଜ ପ୍ରୟାଗରାଜ ମହାକୁମ୍ଭରେ ସାଧୁ-ସନ୍ନ୍ୟାସୀ ଓ ଶ୍ରଦ୍ଧାଳୁଙ୍କ ପବିତ୍ର ସଙ୍ଗମ ହୋଇଛି । ଏହି ମହାପର୍ବର ଆନନ୍ଦ ନେବାକୁ ବିଶ୍ୱର ପ୍ରତ୍ୟେକ କୋଣରୁ ଧାଇଁ ଆସୁଛନ୍ତି ଶ୍ରଦ୍ଧାଳୁ । ଶନିବାର ଥିଲା ମହାକୁମ୍ଭର ୬ଷ୍ଠ ଦିନ । ରାତି ୮ଟା ସୁଦ୍ଧା ୪୨ ଲକ୍ଷ ଶ୍ରଦ୍ଧାଳୁ ବୁଡ଼ ପକାଇଥିଲେ । ଅଦ୍ୟାବଧି ୭.୭୨ କୋଟିରୁ ଅଧିକ ଶ୍ରଦ୍ଧାଳୁ ସଙ୍ଗମରେ ସ୍ନାନ କରିଛନ୍ତି । ଚଳିତ ମହାକୁମ୍ଭରେ ଆକର୍ଷଣର କେନ୍ଦ୍ର ହୋଇଛନ୍ତି ନାଗା ସାଧୁ ।
