ନୀଳଗିରି,୨୨/୬ : ଅଣସରବର ଦ୍ଵାଦଶୀ ତିଥିରେ ମହାପ୍ରଭୁଙ୍କ ରାଜ ପ୍ରାସାଦ ବିଜେ ନୀତି ପାଳନ ହୋଇଥାଏ । ତୃତୀୟ ଶ୍ରୀକ୍ଷେତ୍ର ନୀଳଗିରିରେ ଆଜି ଏହି ପରମ୍ପରା ପାଳନ ହୋଇଛି । ଦେବସ୍ନାନ ମଣ୍ଡପରୁ ଚତୁର୍ଦ୍ଧା ମୂର୍ତ୍ତି ଅଣସରବର ଗୃହକୁ ପ୍ରବେଶ ପରେ ଅସୁସ୍ଥ ଥିଲେ । ଅଣସରବର ତିଥିର ଷଷ୍ଠୀରେ ଫୁଲୁରୀ ତେଲ ଲାଗି ହେବା ପରେ ତିନିଠାକୁର ଆସ୍ତେ ଆସ୍ତେ ସୁସ୍ଥ ହୋଇଥିଲେ। ଦଶମୀରେ ରାଜବୈଦଙ୍କ ଘରୁ ଦଶମୂଳ ଲାଗି କରାଯିବା ପରେ ଏକାଦଶୀ ତିଥିରେ ମହାପ୍ରଭୁଙ୍କ ଖଳି ଲାଗି ନୀତି ସମ୍ପନ୍ନ ହୋଇଥିଲା।
ଆଜି ଦ୍ଵାଦଶୀ ତିଥିରେ ସକାଳ ଧୂପ ସରିବା ପରେ ଜୟବିଜୟ ଦ୍ବାର ବନ୍ଦ କରାଯାଇ ବେହରଣ ଦ୍ୱାର ଫିଟିବା ପରେ ମନ୍ଦିରରୁ ପୂଜକ ଓ ସେବକମାନେ ରାଜପ୍ରାସାଦ ବିଜେ କରିଥାନ୍ତି । ସୁସ୍ଥ ଖବରପାଇ ପାଟପଟୁଆରରେ ଘଣ୍ଟ, ଛତା, କାହାଳି ବଜାଇ ଚନ୍ଦନ ପାଟବସ୍ତ୍ର ଧରି ରାଜପ୍ରାସାଦରେ ପହଞ୍ଚିଥିଲେ। ମହାପ୍ରଭୁଙ୍କ ସୁସ୍ଥ ହେବା ଖବର ରାଜାଙ୍କୁ ସୂଚନା ଦେବାମାତ୍ରେ ଆଦିସେବକ ତଥା ରାଜା ଜୟନ୍ତ ଚନ୍ଦ୍ର ମର୍ଦ୍ଦରାଜ ହରିଚନ୍ଦନ, ଆଦି ସେବିକା ରାଣୀ ମନୋଜା ମଞ୍ଜରୀଦେବୀ ବେଶ ଖୁସି ଅନୁଭବ କରିଥିଲେ । ଖୁସି ଜାହିର କରି ରାଜା ବ୍ରାହ୍ମଣ ଭୋଜନ ଦେଇଥିଲେ। ଏହି ନୀତିପୂଜାରେ ତହସିଲଦାର ତଥା ଠାକୁର ମାହାଲ ନିର୍ବାହୀ ଅଧିକାରୀ ସୋନମ ଦାସ,ବିଡ଼ିଓ ବିକ୍ରମ କିଶୋର ପରିଡା,ରାଜଗୁରୁ ରବୀନ୍ଦ୍ର ମହାପାତ୍ର, ହରିବନ୍ଧୁ କର, ବ୍ରହ୍ମା ପୁଣ୍ୟଶ୍ଲୋକ ନନ୍ଦ, ବ୍ରହ୍ମା ସରୋଜ କୁମାର ନନ୍ଦ, ରୂପେଶ ଶତପଥୀ, ପୃଥ୍ୱୀନାଥ ଆଚାର୍ଯ୍ୟ, ଦେବେନ୍ଦ୍ର ନନ୍ଦ, ଘଣ୍ଟୁଆ, କାହାଳିଆ, ତ୍ରାସ, ଛତ୍ରଧାରୀ, ବାଜାଦାର ସମେତ ଠାକୁରମାହାଲ କର୍ମଚାରୀ ସାମିଲ ଥିଲେ।
