ଭୁବନେଶ୍ୱର,୩୦/୧୦: କାର୍ତ୍ତିକ ପରି ମହା ପବିତ୍ର ଆଉ ଧର୍ମ ମାସରେ ଦେଖାଇଦେଇଛି ବିରାଟ ବିଭ୍ରାଟ । ବୁଧବାର ଦିନ ତମାମ ଏକାମ୍ର ଅଧିପତି ଶ୍ରୀଲିଙ୍ଗରାଜ ଉପାସରେ ରହିଛନ୍ତି । ଗୁରୁବାର ମଧ୍ୟ ସମାନ ପରିସ୍ଥିତି ହେବ ବୋଲି ଆଶଙ୍କା ପ୍ରକାଶ ପାଇଛି । ପହିଲି ଉପଚାର(ମଙ୍ଗଳ ଆଳତୀ ଓ ଅବକାଶ)ସାହଣମେଲା ବଢ଼ିବା ପରେ ସୂର୍ଯ୍ୟପୂଜା, ଦ୍ୱାରପାଳ ପୂଜା ସରି ରୋଷ ହୋମ ବେଳେ ପୂଜାପଣ୍ଡାଙ୍କୁ ସମର୍ଥା ସେବାୟତ ଆସି ପାଣି ଯୋଗାଇଲେ ନାହିଁ । ତେଣୁ ଆଉ ରୋଷ ଘରେ ଚୁଲି ଜଳିଲା ନାହିଁ କି ଚୁନା କୁଟା ହୋଇପାରିଲା ନାହିଁ । ଫଳରେ ବୁଧବାର ବହ୍ଲଭ ନୀତି ପରଠୁ ଦିନ ତମାମ ଉପାସରେ ରହିଛନ୍ତି ଶ୍ରୀଜିଉ ।
ସୂଚନା ଅନୁଯାୟୀ, ଠାକୁରଙ୍କ ସମର୍ଥା ସେବାୟତର ନିଅଂଶ(ଉତ୍ତରାଧିକାରୀ ନ ଥିବା)ପରିବାରର ୨ ଦିନ(ବୁଧ ଏବଂ ଗୁରବାର) ପାଳି ଥିଲା । ଯାହା ଆଗରୁ ନିଜ ମଧ୍ୟରେ ଆଲୋଚନା କରି ସମର୍ଥା ସେବାୟତମାନେ ନିଅଂଶ ପାଳି ତୁଲାଉ ଥିଲେ । କିନ୍ତୁ ଗତ ମାସ ୪ ତାରିଖରେ ବିଏମ୍ସି ଓ ମନ୍ଦିର ପ୍ରଶାସନ ମିଳିତ ଭାବେ କିଛି ସମର୍ଥା ସେବାୟତଙ୍କ ଫୁଲ- ଦୀପ ଦୋକାନ ସିଂହଦ୍ୱାର ସମ୍ମୁଖରେ ଉଚ୍ଛେଦ କରାଇଥିବାରୁ ସେହିଦିନଠାରୁ ସେମାନେ ନୀତିରେ ସହଯୋଗ କରିବେନି ବୋଲି କଡ଼ା ଚେତାବନୀ ଦେଇଥିଲେ । କିଛିଦିନ ପରେ ଅର୍ଥାତ ୯ ତାରିଖରେ ଏହି ନିଅଂଶ ପାଳି ପାଇଁ ଅସହଯୋଗର ଝଲକ ମଧ୍ୟ ଦେଖିବାକୁ ମିଳିଥିଲା । ସେଦିନ ନିଅଂଶ ପାଳିର ସେବାୟତ ନ ଆସିବାରୁ ସମସ୍ତ ନୀତି ଆଉ ଧୂପ ବେଳେ ବିନା ଘଣ୍ଟ ବାଦ୍ୟରେ କାମ ଚଳାଯାଇଥିଲା । ସେତେବେଳେ ଯଦି ପ୍ରଶାସନ ଘଟଣାକୁ ଗୁରୁତର ଭାବେ ବିଚାରକୁ ନେଇଥାନ୍ତା, ହୁଏତ ଆଜିର ପରିସ୍ଥିତିକୁ ଏଡାଇ ଦିଆଯାଇପାରିଥାନ୍ତା । ମାତ୍ର ପ୍ରଶାସନର ଉଚ୍ଚ କର୍ତ୍ତୃପକ୍ଷମାନେ କହିଲେ, ଆମେ ନିଅଂଶ ପାଳି ବାବଦରେ ତଦନ୍ତ କରିଛୁ । ଖୁବ୍ଶୀଘ୍ର ଏହି ଦ୍ୱନ୍ଦ୍ୱର ପୂର୍ଣ୍ଣଚ୍ଛେଦ ପଡ଼ିବ । କିନ୍ତୁ ୫୦ ଦିନ ବିତିଗଲା ପଛେ ସମସ୍ୟା ସମାଧାନ ହେଲାନି । ପ୍ରଶାସନ ଚାହିଁଥିଲେ ଏହି ସମୟ ମଧ୍ୟରେ ଜିଲ୍ଲାପାଳଙ୍କ ଅନୁମତି ନେଇ ଏକ ଜରୁରୀକାଳିନ ଟ୍ରଷ୍ଟ ବୋର୍ଡ ବୈଠକରେ ନିଷ୍ପତ୍ତି ନେଇପାରିଥାନ୍ତା ବୋଲି ବହୁ ବରିଷ୍ଠ ସେବାୟତ କହିଛନ୍ତି ।
ସେହିପରି ସମର୍ଥା ସେବାୟତମାନେ ମଧ୍ୟ ଅନ୍ୟ ପନ୍ଥା ଅବଲମ୍ବନ କରି ପେଟପାଟଣା ଓ ବୃତ୍ତି ପାଇଁ ପ୍ରଶାସନ ଆଗରେ ପ୍ରତିବାଦ କରି ପାରିଥାନ୍ତେ । କିନ୍ତୁ କାର୍ତ୍ତିକ ପରିକା ମାସରେ ଦିଅଁଙ୍କ ସେବା ବନ୍ଦ କରିବା ସମ୍ପୂର୍ଣ୍ଣ ଅଶୋଭନୀୟ ବୋଲି ଦିପହରେ ଅଭଡ଼ା ଭୋଗ ପାଇଁ ଆସି ନିରାଶ ହୋଇ ଫେରିଥିବା କିଛି ଶ୍ରଦ୍ଧାଳୁ କହିଛନ୍ତି । ଜଣେ ବରିଷ୍ଠ ସମର୍ଥା ସେବାୟତ କହିଛନ୍ତି, ପ୍ରଶାସନ ଆମ ନାକରେ ଦଉଡ଼ି ବେକରେ ପଘା ବାନ୍ଧି କଲବଲ କରୁଛି । ଶେଷରେ ଆମେ ନିରୁପାୟ ହେଲୁ । ଦୀର୍ଘବର୍ଷ ହେଲା ନିଅଂଶ ପାଳି ଦ୍ୱନ୍ଦ୍ୱ ତୁଟାଇଲେ ନାହିଁ । ତା’ସହିତ ପେଟ ପାଟଣା ପାଇଁ ଦୋକାନ ଟିଏ ଖୋଲିଲେ ରଖେଇ ଥୋଇ ଦେଲେନି । ତଥାପି ଆଜି ମଧ୍ୟ ପ୍ରଶାସନ କଥା ମାନି ମନ୍ଦିର କାର୍ଯ୍ୟାଳୟକୁ ଆଲୋଚନା ପାଇଁ ଆମ ପିଲା ଆସିଥିଲେ । କିନ୍ତୁ ସେମାନଙ୍କୁ ବିବାଦ ତୁଟାଇବା ଲାଗି ପ୍ରଶାସନ ଲିଖିତ ପ୍ରତିଶ୍ରୁତି ଦେଲାନି । କେତେଦିନ ଏମିତି ତୁଣ୍ଡରେ କାମ ଚଳିବ ।
ମନ୍ଦିର କର୍ତ୍ତୃପକ୍ଷ କହିଛନ୍ତି, ଆମେ ଏବେ ବି ଲଗାତାର ସମ୍ପୃକ୍ତ ସେବାୟତଙ୍କୁ ବୁଝାଇବାକୁ ପ୍ରୟାସ କରୁଛୁ । ଆଶା କରୁଛୁ ଗୁରୁବାର ସେମାନେ ନୀତିରେ ସହଯୋଗ କରିବେ । ଆମେ ନିଅଂଶ ପାଳି ବିବାଦ ତୁଟାଇବାକୁ ତଦନ୍ତ ସାରି ଆସନ୍ତା ମାସ ପହିଲା ସପ୍ତାହ ମଧ୍ୟରେ ଅନୁଷ୍ଠିତ ହେବାକୁ ଥିବା ଟ୍ରଷ୍ଟବୋର୍ଡ ବୈଠକରେ ଚୁଡାନ୍ତ କରିବୁ । ଏ ସବୁ ଜାଣି ଯଦି କୌଣସି ସେବାୟତ ଅମାନିଆ ହୁଅନ୍ତି, ତେବେ ପ୍ରଶାସନ ବି ଜମିବାଡୁଠୁ(ସେବା ପାଇଁ ଉର୍ଦ୍ଧିଷ୍ଟ) ନେଇ ସବୁ କିଛି ଖୋଳତାଡ଼ ଆରମ୍ଭ କରିବ ।
