ମୁମ୍ବାଇ: ମହାରାଷ୍ଟ୍ରର ନୂଆ ସରକାର ଶପଥ ନେବାକୁ ଯାଉଛି । ମୁମ୍ବାଇର ଆଜାଦ ମଇଦାନରେ ଶପଥ ଗ୍ରହଣ ଉତ୍ସବ ଆରମ୍ଭ ହୋଇଯାଇଛି । ସେପଟେ ଏକନାଥ ସିନ୍ଦେ ଉପମୁଖ୍ୟମନ୍ତ୍ରୀ ଭାବରେ ଶପଥ ନେବେ ବୋଲି ସ୍ପଷ୍ଟ ହୋଇଯାଇଛି । ଦେବେନ୍ଦ୍ର ଫଡ଼ନାଭିସ୍ ଶପଥ ନେବାର କିଛି ସମୟ ପୂର୍ବରୁ ସିନ୍ଦେଙ୍କୁ ନେଇ ଲାଗିରହିଥିବା ସସପେନ୍ସ ଦୂର ହୋଇଛି । ଏନେଇ ଶିବସେନା ନେତା ଉଦୟ ସାମନ୍ତ ସୂଚନା ଦେଇଛନ୍ତି ।
ଦୁଇ ସପ୍ତାହ ଧରି ଚାଲିଥିବା ଚର୍ଚ୍ଚା ଉପରେ ବିରାମ ଟାଣିଛନ୍ତି ସାମନ୍ତ । ଗତକାଲି (ବୁଧବାର) ସନ୍ଧ୍ୟାରେ ସୂଚନା ମିଳିଥିଲା ଯେ, ଏକନାଥ ସିନ୍ଦେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଭବାରେ ଶପଥ ନେଇପାରନ୍ତି । ବୁଧବାର ଏକ ସାମ୍ବାଦିକ ସମ୍ମିଳନୀରେ ଅଜିତ ପାଓ୍ବାର ସ୍ପଷ୍ଟ କରିଥିଲେ ସେ ଉପମୁଖ୍ୟମନ୍ତ୍ରୀ ଭାବରେ ଶପଥ ନେବାକୁ ପ୍ରସ୍ତୁତ ଅଛନ୍ତି । କିନ୍ତୁ ସିନ୍ଦେ ଏନେଇ କୌଣସି ପ୍ରତିକ୍ରିୟା ଦେଇନଥିଲେ । ହେଲେ ବର୍ତ୍ତମାନ ଶିବସେନା ନେତା ସିନ୍ଦେଙ୍କ ଶପଥ ଗ୍ରହଣ ନେଇ ସ୍ପଷ୍ଟ କରିଦେଇଛନ୍ତି ।
ଶିବସେନା ନେତା ସଂଜୟ ଶୀରସାତ କହିଛନ୍ତି ଯେ, ‘ଏକନାଥ ସିନ୍ଦେ ଆମର ଅନୁରୋଧ ରକ୍ଷା କରି ଉପମୁଖ୍ୟମନ୍ତ୍ରୀ ଭାବରେ ଶପଥ ନେବାକୁ ରାଜି ହୋଇଯାଇଛନ୍ତି । ଆମେ ମଧ୍ୟ ଚାହୁଁଛୁ ସେ ଶପଥ ଗ୍ରହଣ କରନ୍ତୁ ।’ ସେପଟେ ଆଉ ବଡ଼ ଖବର ସାମ୍ନାକୁ ଆସିଛି । ଶପଥ ନେବା ପରେ ପରେ ଏକନାଥ ସିନ୍ଦେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ସାକ୍ଷାତ କରିପାରନ୍ତି । ଏହି ସମୟରେ ଏକନାଥ ସିନ୍ଦେ ପୁଣି ଥରେ ଗୃହ ମନ୍ତ୍ରାଳୟ ଲାଗି ଦାବି କରିପାରନ୍ତି । ଯଦି ଗୃହ ମନ୍ତ୍ରାଳୟ ନମିଳେ ତେବେ ତାଙ୍କୁ ସହରୀ ବିକାଶ କିମ୍ବା ଅନ୍ୟ ଶକ୍ତିଶାଳୀ ମନ୍ତ୍ରାଳୟ ମିଳିପାରେ ।
