ବ୍ୟାଙ୍ଗକକ: ଥାଇଲାଣ୍ଡର ଉପ-ପ୍ରଧାନମନ୍ତ୍ରୀ ତଥା ଗୃହମନ୍ତ୍ରୀ ଫୁମଥାମ ବେଚାୟାଚାଇଙ୍କୁ ଗୁରୁବାର ଦିନ ଦେଶର କାର୍ଯ୍ୟକାରୀ ପ୍ରଧାନମନ୍ତ୍ରୀ ଭାବେ ନିଯୁକ୍ତ କରାଯାଇଛି। ଏହି ନିଯୁକ୍ତି ପ୍ରଧାନମନ୍ତ୍ରୀ ପାଏଟଙ୍ଗଟାର୍ନ ଶିନାବତ୍ରାଙ୍କୁ ସାମ୍ବିଧାନିକ ଅଦାଲତ ଦ୍ୱାରା ନିଲମ୍ବନ କରାଯିବା ପରେ ନିଆଯାଇଛି। ବର୍ତ୍ତମାନ ସେ ଏକ ନୈତିକତା ତଦନ୍ତ ଅଧୀନରେ ରହିଛନ୍ତି।
ଫୁମଥାମ ପୂର୍ବରୁ ମଧ୍ୟ ପ୍ରତିରକ୍ଷା ଓ ବାଣିଜ୍ୟ ମନ୍ତ୍ରୀ ଭାବେ କାର୍ଯ୍ୟ କରିଛନ୍ତି। ସେ ପୂର୍ଣ୍ଣ ପ୍ରଧାନମନ୍ତ୍ରୀଙ୍କ କ୍ଷମତା ଓ ଦାୟିତ୍ୱ ଗ୍ରହଣ କରିବେ। ଏହି ନିଷ୍ପତ୍ତି ଗୁରୁବାର ଏକ ବିଶେଷ ମନ୍ତ୍ରୀମଣ୍ଡଳ ବୈଠକରେ ନିଆଯାଇଥିଲା। ଯେଉଁଠାରେ ନୂତନ ମନ୍ତ୍ରୀମଣ୍ଡଳ ସଦସ୍ୟମାନେ ରାଜା ମହା ବାଜିରାଲଙ୍ଗକର୍ଣ୍ଣଙ୍କ ସମ୍ମୁଖରେ ଶପଥ ଗ୍ରହଣ କରିଥିଲେ।
ପାଏଟଙ୍ଗଟାର୍ନଙ୍କ ନିଲମ୍ବନ କାରଣ ହେଉଛି କମ୍ବୋଡିଆର ପୂର୍ବତନ ନେତା ହୁନ ସେନଙ୍କ ସହ ଏକ ଲିକ୍ ହୋଇଥିବା ଫୋନ୍ କଲ୍। ଯେଉଁଥିରେ ସେ ହୁନ ସେନଙ୍କୁ “ଅଙ୍କଲ” ଏବଂ ଜଣେ ଥାଇ ସାମରିକ କମାଣ୍ଡରଙ୍କୁ “ବିରୋଧୀ” ବୋଲି ସମ୍ବୋଧନ କରିଥିବା ଅଭିଯୋଗ ରହିଛି। ଏହା ଥାଇଲାଣ୍ଡ ଓ କମ୍ବୋଡିଆ ମଧ୍ୟରେ ଥିବା ସୀମା ବିବାଦକୁ ତୀବ୍ର କରିଥିଲା ଏବଂ ଏକ ରକ୍ଷଣଶୀଳ ଦଳ ପାଏଟଙ୍ଗଟାର୍ନଙ୍କ ସମର୍ଥନ ଛାଡ଼ି ମନ୍ତ୍ରୀମଣ୍ଡଳ ପୁନର୍ଗଠନକୁ ପ୍ରେରଣା ଦେଇଥିଲା।
୭୧ ବର୍ଷୀୟ ଫୁମଥାମ ପୂର୍ବରୁ ୧୯୭୦ ଦଶକରେ ଏକ ବାମପନ୍ଥୀ ଯୁବ ଆନ୍ଦୋଳନ ସହ ଜଡ଼ିତ ଥିଲେ। ଯାହା ତାଙ୍କୁ “ବିଗ୍ କମ୍ରେଡ୍” ଉପନାମ ଦେଇଥିଲା। ସେ ଥାକସିନ ଶିନାବତ୍ରାଙ୍କ ଟେଲିକମ୍ ସାମ୍ରାଜ୍ୟରେ କାର୍ଯ୍ୟ କରି ରାଜନୀତିରେ ପ୍ରବେଶ କରିଥିଲେ ଏବଂ ଥାକସିନଙ୍କ ଫେଉ ଥାଇ ଦଳର ଜଣେ ବିଶ୍ୱସ୍ତ ସହଯୋଗୀ ଭାବେ ପରିଚିତ।
ସୂର୍ଯ୍ୟ ଜୁଙ୍ଗରୁଙ୍ଗରେଙ୍ଗକିଟ୍ ଙ୍କୁ ଗୋଟିଏ ଦିନ ପାଇଁ କାର୍ଯ୍ୟକାରୀ ପ୍ରଧାନମନ୍ତ୍ରୀ ଭାବେ ଗତ କାଲି ଚୟନ କରାଯାଇଥିଲା। ତେବେ ଆଜିଠୁ ତାଙ୍କୁ ଦ୍ୱିତୀୟ କାର୍ଯ୍ୟକାରୀ ପ୍ରଧାନମନ୍ତ୍ରୀ ଭାବେ ନିଯୁକ୍ତ ଦିଆଯାଇଛି। ଏହି ରାଜନୈତିକ ଅସ୍ଥିରତା ମଧ୍ୟରେ ଥାଇଲାଣ୍ଡ ଅର୍ଥନୀତିକୁ ପୁନର୍ଜନ୍ମ ଦେବା ଏବଂ ଆମେରିକା ସହ ବାଣିଜ୍ୟ ଚୁକ୍ତି ସୁରକ୍ଷିତ କରିବା ପାଇଁ ସଂଘର୍ଷ କରୁଛି।
ଫୁମଥାମଙ୍କ ନିଯୁକ୍ତି ଦେଶରେ ରାଜନୈତିକ ସ୍ଥିରତା ଆଣିବା ପାଇଁ ଏକ ପ୍ରୟାସ ଭାବେ ଦେଖାଯାଉଛି। ଯେଉଁଠାରେ ଥାକସିନ ଶିନାବତ୍ରାଙ୍କ ରାଜନୈତିକ ପରିବାର ଦଶନ୍ଧି ଦଶନ୍ଧି ଧରି ଥାଇଲାଣ୍ଡରେ ପ୍ରଭାବ ବିସ୍ତାର କରିଆସୁଛି।
