ଅମୃତସର: ପଞ୍ଜାବର ଅମୃତସରରେ ଥିବା ସ୍ୱର୍ଣ୍ଣ ମନ୍ଦିରରେ ଆକ୍ରମଣର ଘଟଣା ସାମ୍ନାକୁ ଆସିଛି । ଜଣେ ଯୁବକ ଶ୍ରଦ୍ଧାଳୁଙ୍କ ଉପେ ଲୁହା ରଡ୍ରେ ଆକ୍ରମଣ କରିଥିବା ଜଣାପଡ଼ିଛି । ଶିଖ ନବବର୍ଷ ପାଳନ କରୁଥିବା ପାଞ୍ଚ ଜଣ ଭକ୍ତଙ୍କ ଉପରେ ଏହି ଆକ୍ରମଣ ହୋଇଛି । ଏଥିରେ ତିନି ଜଣ ଭକ୍ତ ଏବଂ ସ୍ୱର୍ଣ୍ଣ ମନ୍ଦିରର ଦୁଇ ଜଣ ସେବାଦାର (ପରିଚାରକ) ସମେତ ପାଞ୍ଚ ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ଜଣେ ଭକ୍ତ ଏବଂ ଜଣେ ସେବାଦାରଙ୍କ ସମେତ ଦୁଇଜଣଙ୍କ ଅବସ୍ଥା ଗୁରୁତର ବୋଲି କୁହାଯାଉଛି । ସିସିଟିଭି ଫୁଟେଜ୍ ସାହାଯ୍ୟରେ ଅଭିଯୁକ୍ତକୁ ଧରି ପୋଲିସକୁ ହସ୍ତାନ୍ତର କରାଯାଇଛି ।
ପୋଲିସର ସୂଚନା ଅନୁଯାୟୀ, ସ୍ୱର୍ଣ୍ଣ ମନ୍ଦିର ପରିସରରେ ଥିବା ଶ୍ରୀ ଗୁରୁ ରାମଦାସ ସରାଇରେ ଏହି ଆକ୍ରମଣ ହୋଇଛି । ଏହି ଘଟଣା ପରେ ସ୍ୱର୍ଣ୍ଣ ମନ୍ଦିରରେ ଭକ୍ତଙ୍କ ସୁରକ୍ଷାକୁ ନେଇ ଆଲର୍ଟ ଜାରି ହୋଇଛି । ଅମୃତସର ଏସିପି ଜସପାଲ ସିଂହ କହିଛନ୍ତି ଯେ, ହରିୟାଣାର ଯମୁନା ନଗରର ବାସିନ୍ଦା ଜୁଲଫାନ ନାମକ ଜଣେ ବ୍ୟକ୍ତି ଗୁରୁ ରାମଦାସ ସରାଇ (କମ୍ପଲେକ୍ସ)ର ଦ୍ୱିତୀୟ ମହଲାକୁ ଚଢ଼ିଥିଲା । ତା’ ହାତରେ ଏକ ଲୁହା ରଡ୍ ଥିଲା। ଯେତେବେଳେ ଜଣେ କର୍ମଚାରୀ ତାକୁ ଅଟକାଇବାକୁ ଚେଷ୍ଟା କଲେ, ସେ ତାଙ୍କୁ ଆକ୍ରମଣ କରିଥିଲା। ଯେତେବେଳେ ଭକ୍ତ ଏବଂ ଅନ୍ୟ କର୍ମଚାରୀମାନେ ତାକୁ ଅଟକାଇବାକୁ ଚେଷ୍ଟା କରିଥିଲେ ସେ ସେମାନଙ୍କୁ ମଧ୍ୟ ଆକ୍ରମଣ କରିଥିଲା ।
ସେମାନେ ଜୁଲଫାନକୁ ପୋଲିସକୁ ହସ୍ତାନ୍ତର କରିଥିଲେ । ଜୁଲଫାଲ ବିରୋଧରେ ପୋଲିସ ମାମଲା ରୁଜୁ କରିଛି । ଏହି ମାମଲାରେ ଅଧିକ ତଦନ୍ତ ଚାଲିଛି । ଏହା ବ୍ୟତୀତ ଅଭିଯୁକ୍ତ ବିରୋଧରେ ପୂର୍ବରୁ କୌଣସି ମାମଲା ରହିଛି କି ନାହିଁ ସେନେଇ ମଧ୍ୟ ପୋଲିସ ତଦନ୍ତ କରୁଛି । ଶିରୋମଣି ଗୁରୁଦ୍ୱାରା ପ୍ରବନ୍ଧକ କମିଟି (SGPC) ସଚିବ ପ୍ରତାପ ସିଂହ କହିଛନ୍ତି ଯେ, ଶୁକ୍ରବାର ଦିନ ପ୍ରାୟ ୧୨ଟାରେ ଜଣେ ଆକ୍ରମଣକାରୀ ଶ୍ରୀ ଗୁରୁ ରାମଦାସ ନିବାସରେ ପ୍ରବେଶ କରି ଭକ୍ତ ଏବଂ ସେବାଦାରମାନଙ୍କୁ ଲୁହା ରଡ୍ ସାହାଯ୍ୟରେ ଆକ୍ରମଣ କରିଥିଲା । ଆକ୍ରମଣରେ ମୋହାଲି, ବଠିଣ୍ଡା ଏବଂ ପଟିଆଲାର ଜଣେ ଲେଖାଏଁ ଭକ୍ତ ଏବଂ ଦୁଇଜଣ ସେବାଦାର ଆହତ ହୋଇଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ଆହତମାନଙ୍କୁ ତୁରନ୍ତ ଚିକିତ୍ସା ପାଇଁ ଭାଲାହାରେ SGPC ଦ୍ୱାରା ପରିଚାଳିତ ଶ୍ରୀ ଗୁରୁ ରାମଦାସ ହସ୍ପିଟାଲକୁ ପଠାଯାଇଥିଲା। ସେ କହିଛନ୍ତି ଯେ, ବଠିଣ୍ଡାର ଜଣେ ସେବାଦାର ଏବଂ ଜଣେ ଭକ୍ତଙ୍କ ମୁଣ୍ଡରେ ଆଘାତ ଯୋଗୁଁ ସେମାନଙ୍କ ଅବସ୍ଥା ଗୁରୁତର ରହିଛି।
