ଅହମ୍ମଦାବାଦ,୧୭/୧୧: ଅକ୍ଟୋବର ୨୭ରୁ ନିଖୋଜ ଥିଲେ । ନଭେମ୍ବର ୧୦ ତାରିଖରେ ନିଖୋଜ ବ୍ୟକ୍ତିଙ୍କର ମୃତଦେହ ଚିହ୍ନଟ କଲେ ପରିବାର । ଶେଷକୃତ୍ୟ ସରିଲା । ଶୋକରେ ବୁଡିଥିବା ପରିବାର ଶଦ୍ଧାଞ୍ଜଳି ସଭାର ଆୟୋଜନ କରିଥିଲେ । ହେଲେ କିଛି ଏମିତି ଘଟିଲା ଯାହା ଆପଣଙ୍କୁ ଆଶ୍ଚର୍ଯ୍ୟ କରିବ । ନଭେମ୍ବର ୧୪ ତାରଖରେ ଶ୍ରଦ୍ଧାଞ୍ଜଳି ସଭାରେ ଅଚାନକ ଆସି ପହଞ୍ଚି ଯାଇଥିଲେ ମୃତ ବ୍ୟକ୍ତି ଜଣକ । ଯାହା ସମସ୍ତଙ୍କୁ ଚକିତ କରିଛି ।
ସୂଚନାଅନୁସାରେ, ଗୁଜୁରାଟ ମେହସାନା ଜିଲ୍ଲା ବ୍ରିଜେଶ ସୂତାର ନାମକ ଜଣେ ବ୍ୟକ୍ତି ଅକ୍ଟୋବର ୨୭ ତାରଖରୁ ନିଖୋଜ ଥିଲେ । ଷ୍ଟକ ମାର୍କେଟ ବ୍ୟବସାୟ ସହ ଜଡିତ ଆର୍ଥିକ ସମସ୍ୟା ଓ ମାନସିକ ସ୍ବାସ୍ଥ୍ୟ ସମସ୍ୟାରେ ପୀଡିତ ବ୍ରିଜେଶ ନାରୋଡାସ୍ଥିତ ନିଜ ଘରୁ କେଉଁ ଆଡେ ଚାଲିଯାଇଥିଲେ । ପରିବାର ଲୋକ ବହୁତ ଖୋଜାଖୋଜି କରିଥିଲେ । ଏ ନେଇ ନାରୋଡା ପୋଲିସ ଷ୍ଟେସନରେ ନିଖୋଜ ରିପୋର୍ଟ ଦାଖଲ କରିଥିଲେ । ପୋଲିସ ଘଟଣାର ତଦନ୍ତ ଆରମ୍ଭ କରି ବ୍ରିଜେଶଙ୍କୁ ଖୋଜଖୋଜି କରିଥିଲେ ।
ନଭେମ୍ବର ୧୦ ତାରିଖରେ ସାବରମତି ବ୍ରିଜ ନିକଟରେ ପୋଲିସ ଏକ ଅଜଣା ମୃତଦେହ ପାଇଥିଲା । ସାମ୍ଭାବ୍ୟ ଚିହ୍ନଟ ପାଇଁ ସୂତାର ପରିବାରକୁ ଡାକିଥିଲା । ମୃତଦେହଟି ଖରାପ ହୋଇଯାଇଥିବାରୁ ଚିହ୍ନିବାରେ ସମସ୍ୟା ଉପୁଜିଥିବା । ଏହା ପରେ ବି ବ୍ରିଜେଶଙ୍କ ପରିବାର ଭୁଲରେ ତାଙ୍କୁ ବ୍ରିଜେଶ ବୋଲି ଚିହ୍ନଟ କରିଥିଲେ । ଏହାପରେ ବ୍ରିଜେଶଙ୍କ ଉଦ୍ଦେଶ୍ୟରେ ଶୋକସଭାର ଆୟୋଜନ ହୋଇଥିଲା । ସମ୍ପର୍କୀୟ ପରିବାର ଏକାଠୀ ହୋଇଥିଲେ । ଏହି ସମୟରେ ଯାହା ଘଟିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ହଠାତ୍ ବ୍ରିଜେଶ ସୂତାର ଘରେ ଆସି ପହଞ୍ଚିଥିଲେ । ବ୍ରିଜେଶ ଏକଦମ ସୁସ୍ଥ ଥିଲେ । ତେବେ ପୋଲିସ ଯେଉଁ ମୃତଦେହ ବ୍ରିଜେଶଙ୍କ ପରିବାରକୁ ଦେଇଥିବା ତାକୁ ନେଇ ତଦନ୍ତ ଆରମ୍ଭ କରିଛି ।
