ମନମୁଣ୍ଡା ୨୭/୦୬: ଶତାବ୍ଦୀ ପୁରାତନ ମନମୁଣ୍ଡା ଶ୍ରୀ ଦଧିବାମନ ମନ୍ଦିରରେ ଆଜି ଘୋଷଯାତ୍ରା ହର୍ଷ ଉଲ୍ଲାସ ସହ ପାଳିତ ହୋଇଛି। ସକାଳ ସମୟରେ ମନ୍ଦିର ମୁଖ୍ୟ ପୂଜକ ଆଶୁତୋଷ ହୋତା ମଙ୍ଗଳ ଆଳତି, ପ୍ରଭୁଙ୍କ ନିତିକାନ୍ତି କରିଥିଲେ। ନବ ଦିନାତ୍ମକ ଜନ୍ମବେଦିକୁ ଯାତ୍ରା ପାଇଁ ପ୍ରଭୁଙ୍କ ଆଜ୍ଞାମାଳ ପାଇ ରଥ ସୁସଜ୍ଜିତ ଭାବେ ପ୍ରସ୍ତୁତ ହୋଇ ରହିଥିଲା। ଅପରାହ୍ନ ସମୟରେ ମଙ୍ଗଳାର୍ପଣ ପରେ ପହଣ୍ଡି ଆରମ୍ଭ କରାଯାଇଥିଲା। ଛେରା ପହଁରା ମଧ୍ୟ କରାଯାଇଥିଲା। ବ୍ରାହ୍ମଣ ଶିବ ରଥ,ନିରଞ୍ଜନ ହୋତା,ସ୍ଵାଧୀନ କୁମାର ହୋତା ପ୍ରମୁଖ ପହଣ୍ଡି କରି ରଥାରୂଢ଼ କରିଥିଲେ । ଆଗାମୀ ଦିନରେ ମନ୍ଦିର ଦାୟିତ୍ଵ ତଥା ପୂଜାର୍ଚ୍ଚନାକୁ ଇଛା ରଖିଥିବା ହୋତା ବଂଶର ଛୋଟ ବ୍ରାହ୍ମଣ ପ୍ରିୟାଂଶୁ ହୋତା ବଡ ମାନଙ୍କ ସହ ରହି ତାଲିମ ନେଇଥିଲେ।
ପହଣ୍ଡି ସମୟରେ ଭୁଲିଆ ସମାଜର ସଭ୍ୟ ମାନେ କୀର୍ତ୍ତନ କରି ପହଣ୍ଡି ଗୀତ, ଭଜନ ଇତ୍ୟାଦି ପରିବେଷଣ କରିଥିଲେ। ରଥଯାତ୍ରା ମିଳନର ଦିବ୍ୟ ମୂହୁର୍ତ୍ତରେ ଭକ୍ତ ଓ ଭଗବାନ ଏକାକାର ହୋଇଯାଇଥିବା ଦେଖିବାକୁ ମିଳିଥିଲା। କୈବର୍ତ୍ତ ସମାଜ ଚାରମାଳ ଫିଟାଇବା ସହ ଘୋଡ଼ା ଲଗାଇଥିଲେ। ତାପରେ ରଥଟଣା ଯାଇଥିଲା। ଏହି ଅବସରରେ ଛୋଟ ଛୁଆଙ୍କ ମଙ୍ଗଳ ପାଇଁ ପରମ୍ପରା ପ୍ରକାରେ ଛୋଟ ଛୁଆଙ୍କ ରଥ ଛୁଆଁ ଯାଇଥିଲା।
ମନମୁଣ୍ଡା ପ୍ରସିଦ୍ଧ ରଥଯାତ୍ରା ଦେଖିବାକୁ ଆଖପାଖ ଅଞ୍ଚଳରୁ ହଜାର ହଜାର ଭକ୍ତଙ୍କ ସମାଗମ ଦେଖିବାକୁ ମିଳିଥିଲା। ତାପରେ ମହାପ୍ରଭୁଙ୍କୁ ପୁନଃ ପହଣ୍ଡି କରି ମାଉସୀ ମା ମନ୍ଦିର (ଶ୍ରୀ ଭାଗବତ ମନ୍ଦିର)କୁ ତଥା ଜନ୍ମ ବେଦୀରେ ବିରାଜମାନ କରାଯାଇଥିଲା। ମାଉସୀ ମନ୍ଦିରକୁ ଭୁଲିଆ ସମାଜ ଆକର୍ଷଣୀୟ ଭାବେ ସଜାଇଥିଲେ ଏବଂ ମହାପ୍ରଭୁଙ୍କୁ ମାଉସୀ ମନ୍ଦିରକୁ ପାଛୋଟି ନେଇଥିଲେ। ଆଇ ଆଇ ସି ଅଞ୍ଜଳି ବିଶ୍ଵାଳଙ୍କ ନେତୃତ୍ୱରେ ପୁଲିସ ବଳ ଟ୍ରାଫିକ ଓ ଶାନ୍ତି ଶୃଙ୍ଖଳା ଉପରେ ଏବଂ ଶୃଙ୍ଖଳିତ ରଥ ଟଣା ଉପରେ ସହଯୋଗ କରିଥିଲା ବେଳେ ବିଦ୍ୟୁତ୍ ବିଭାଗ କର୍ମଚାରୀ ମାନେ ରଥ ଟଣା ବେଳେ ବିଦ୍ୟୁତ୍ ତାର ଟେକିବାରେ ସାହାଯ୍ୟ କରିଥିଲେ। ମନମୁଣ୍ଡା ବ୍ରାହ୍ମଣ ବିଜୟ କୁମାର ତ୍ରିପାଠୀ, ଚନ୍ଦ୍ରଶେଖର ରଥ, ମନ୍ଦିର କମିଟି ସଦସ୍ୟ ମାନେ ଶୃଙ୍ଖଳିତ ରଥଯାତ୍ରାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ।
