ଭୁବନେଶ୍ୱର,୦୭/୦୨: ଭଦ୍ରକ ଜିଲ୍ଲାରେ ଧାନ କିଣାକୁ ନେଇ ଆରମ୍ଭ ହୋଇଥିବା ବିବାଦ ଥମିବାର ନାଁ ନେଉନି । କଟନି ଛଟନିକୁ ନେଇ ଆରମ୍ଭ ହୋଇଥିବା ବିବାଦ ପାଇଁ ଚାଷୀର ଧାନ ଏବେ ଖରା କାକର ଖାଉଛି । ଚାଷୀ ଏବେ ଏକତ୍ରିତ ହୋଇ ପ୍ରତିବାଦ ଆରମ୍ଭ କରିଛନ୍ତି ।
ସୂଚନା ମୁତାବକ, ଭଦ୍ରକ ଜିଲ୍ଲା କଟସାହି ସେବା ସମବାୟ ସମିତିକୁ ଭଦ୍ରକ ଜିଲ୍ଲାପାଳ ଚାଷୀ ବେଶରେ ଯାଇଥିଲେ । ସେଠାରେ କଟନି ଛଟନି ନେଇ ସ୍ପଷ୍ଟ ହେବା ପରେ ସେବା ସମବାୟ ସମିତିର ସହକାରୀ ସଂପାଦକଙ୍କୁ ଧାନ କିଣା ଦାୟିତ୍ଵରୁ ଅପସାରଣ କରାଯାଇଥିଲା । କିନ୍ତୁ ସେହି ଦିନ ଠାରୁ ମଣ୍ଡି ଧାନ ନେଉ ନାହିଁ । ଚାଷୀଙ୍କ ଧାନ ମଣ୍ଡି ବାହାରେ ପଡ଼ି ରହିଛି । ଏମିତି ଅବ୍ୟବସ୍ଥାକୁ ନେଇ ଚାଷୀ ମାନେ ଏକତ୍ରିତ ହୋଇ ଏକ ସାମ୍ବାଦିକ ସମ୍ମିଳନୀ କରିଛନ୍ତି ।
ଚାଷୀଙ୍କ କହିବା ଅନୁଯାୟୀ, ମିଲର ମାନେ ବିନା କଟନି ଛଟନିରେ ଧାନ ନେଉ ନଥିବାରୁ ସମବାୟ ସମିତି ମଧ୍ୟ ବାଧ୍ୟ ହୋଇ କଟନି ଛଟନି କରୁଛି । ଜିଲ୍ଲାପାଳଙ୍କ କାର୍ଯ୍ୟନୁଷ୍ଠାନକୁ ସ୍ବାଗତ କରୁଛୁ । ସବୁ ମଣ୍ଡିରେ ସମାନ ଅବସ୍ଥା ଥିବାରୁ ଜିଲ୍ଲାପାଳଙ୍କୁ ତଦନ୍ତ ପାଇଁ ଅନୁରୋଧ କରିଛନ୍ତି । ସବୁ ବିବାଦ ପାଇଁ ସ୍ଥାନୀୟ କେତେକ ଲୋକ ପ୍ରତିନିଧିଙ୍କୁ ଦାୟୀ କରିଛନ୍ତି ଚାଷୀ । ତେବେ ସବୁ ବିବାଦର ସମାଧାନ କରି ଧାନକୁ ମଣ୍ଡିରୁ ଉଠାଇବା ପାଇଁ ଚାଷୀ ଅନୁରୋଧ କରିଛନ୍ତି ।
