ମାଲକାନଗିରି, ୨୨/୦୬: ଆତ୍ମସମର୍ପଣ କରିଥିବା ନକ୍ସଲଙ୍କୁ ଟାର୍ଗେଟ୍ କରୁଛି ଲାଲ୍ ବାହିନୀ । ପୁଲିସ୍ ଇନଫର୍ମର କହି ଜଣକ ପରେ ଜଣଙ୍କୁ ହତ୍ୟା କରୁଛି । ମାଲକାନଗିରି ଛତିଶଗଡ ସୀମାନ୍ତ ବିଜାପୁର ଜିଲ୍ଲାରେ ପୁଣି ଏଭଳି ମାଓ ହିଂସା ଦେଖିବାକୁ ମିଳିଛି । ଦୁଇ ଜଣ ଗ୍ରାମବାସୀଙ୍କୁ ପୁଲିସ ଇନଫର୍ମର ସନ୍ଦେହରେ ହତ୍ୟା କରିଛି ମାଓ ସଂଗଠନ । ମୃତକଙ୍କ ମଧ୍ୟରେ ଜଣେ ଆତ୍ମସମର୍ପଣ କରିଥିବା ନକ୍ସଲ ରହିଛନ୍ତି ।
ସୂଚନା ମୁତାବକ, ପାମେଡ ଥାନା ଅନ୍ତର୍ଗତ ଯମପୁରମ ଗାଁରେ ମାଓବାଦୀ ମାନେ ଏହି ହତ୍ୟାକାଣ୍ଡ କରିଛନ୍ତି । ପୁଲିସ ଇନଫର୍ମର ସନ୍ଦେହରେ ଦୁଇ ଜଣଙ୍କୁ ନକ୍ସଲ ମାନେ ହତ୍ୟା କରିଥିବା ନେଇ ଏକ ହାତଲେଖା ପୋଷ୍ଟରରେ ଉଲ୍ଲେଖ ରହିଛି । ଶନିବାର ରାତିରେ ୧୫ରୁ ୨୦ ଜଣ ମାଓବାଦୀ ଯମପୁରମ ଗାଁରେ ପହଞ୍ଚି ଏହି ହତ୍ୟାକାଣ୍ଡ ଘଟାଇଛନ୍ତି । ହିଂସାକାଣ୍ଡ କରିଥିବା ମାଓବାଦୀଙ୍କୁ ଉଚିତ ଜବାବ ଦେବା ଲାଗି ସେଠାରେ ଅପରେସନ ଆରମ୍ଭ ହୋଇଥିବା ନେଇ ବିଜାପୁର ଏସ୍ପି ସୂଚନା ଦେଇଛନ୍ତି ।
