ଫିରିଙ୍ଗିଆ, ୨୯/୪ : କିଛିଦିନର ନୀରବତା ପରେ ପୁଣି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅଧୀନରେ ଥିବା ଗୋଛାପଡ଼ା ପୋଲିସକୁ ମିଳିଛି ଏକ ବଡ଼ ସଫଳତା I ଚାଲାଣ ପାଇଁ କିଛି ଗଞ୍ଜେଇ ମାଫିଆ ପ୍ରସ୍ତୁତି ଚଳାଇଥିବାବେଳେ ଖବରପାଇ ଗୋଛାପଡ଼ା ଥାନା ଅଧୀନରେ ଥିବା ବନ୍ଧୁଲି ଜଙ୍ଗଲରେ ପୋଲିସ ଅତର୍କିତ ଚଢଉ କରିଥିଲା । ଫଳରେ ୭୩ଟି ପ୍ଲାଷ୍ଟିକ ବସ୍ତାରେ ଭର୍ତ୍ତି ହୋଇଥିବା ୧୮୨୫କିଲୋ ଗଞ୍ଜେଇକୁ ଜବତ କରିବାରେ ସଫଳ ହୋଇଥିଲେ । ମାତ୍ର ଘଟଣାସ୍ଥଳରୁ ପ୍ରସ୍ତୁତି ଚଳାଇଥିବା ମାଫିଆମାନେ ଫେରାର ହୋଇଯାଇଥିବା ପୋଲିସ ସୂଚନା ଦେଇଛି I ସୂଚନା ଅନୁସାରେ ବନ୍ଧୁଲି ଜଙ୍ଗଲରେ କିଛି ଗଞ୍ଜେଇ ମାଫିଆ ଚାଲାଣ ପାଇଁ ପ୍ରସ୍ତୁତି ଚଳାଇଥିଲେ । କୌଣସି ସୂତ୍ରରୁ ପୋଲିସ  ଖବରପାଇ ଫୁଲବାଣୀ ସଦର ଏସଡିପିଓ ଶୁଭ୍ରଜିତ ବିଶ୍ୱାଳଙ୍କ ସହ ଏକ ସ୍ୱତନ୍ତ୍ର ଟିମ୍ ଓ ଥାନା ଅଧିକାରୀ ଚିରଞ୍ଜୀବ ବେହେରାଙ୍କ ସହ ଗୋଛାପଡ଼ା ଥାନାର ଏକ ଟିମ୍ ତହସିଲଦାର ପୃଥ୍ୱୀରାଜ ମହାନନ୍ଦିଆଙ୍କ ଉପସ୍ଥିତିରେ ଏହି ବନ୍ଧୁଲି ଜଙ୍ଗଲରେ ଚଢ଼ଉ କରିଥିଲେ I 

ପୋଲିସ ଆସିବାର ଆଗୁଆ ସୂଚନାପାଇ ପ୍ରସ୍ତୁତି ଚଳାଇଥିବା ମାଫିଆମାନେ ତରବରିଆ ଭାବେ ଗଞ୍ଜେଇ ବସ୍ତା ଗୁଡ଼ିକୁ ଜଙ୍ଗଲ ଭିତରେ ଛାଡ଼ି ଦେଇ ଫେରାର ହୋଇଯାଇଥିଲେ I ପରେ ପୋଲିସ ଗଞ୍ଜେଇ ବସ୍ତା ଗୁଡ଼ିକୁ ଜବତ କରି ଥାନାକୁ ଆଣିଥିବାବେଳେ ମଙ୍ଗଳବାର ଏହି ଘଟଣାକୁ ନେଇ କେଶ୍ ନଂ ୯୫/୨୫ରେ ଏକ ମାମଲା ରୁଜୁ କରି କୋର୍ଟ ଚାଲାଣ କରାଯିବା ସହ ଫେରାର ମାଫିଆମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଥାନା ଅଧିକାରୀଙ୍କ ସହ ଏସଡିପିଓ ଶ୍ରୀ ବିଶ୍ୱାଳ ସୂଚନା ଦେଇଛନ୍ତି I ଅନ୍ୟପଟେ ଲଗାତର ଭାବେ ଗୋଛାପଡ଼ା ପୋଲିସ ଅଂଚଳରୁ ଗଞ୍ଜେଇ କାରବାରକୁ ସମୂଳେ ଧ୍ବଂସ କରିବାରେ ଲାଗି ପଡ଼ିଥିବାବେଳେ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିର୍ଦେଶ ଓ ଏସ୍ଡ଼ିପିଓଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ରିତିମତ ଭାବେ ବିଭିନ୍ନ ସ୍ଥାନରେ ଚଢଉ କରି ଚାଲିଛନ୍ତି I କୁଇଣ୍ଟାଲ କୁଇଣ୍ଟାଲ ଗଞ୍ଜେଇ ମଧ୍ୟ ଜବତ ହେଉଛି I