ନୂଆଦିଲ୍ଲୀ,୦୯/୧୦: ବିଶ୍ୱର ବହୁ ଜଣାଶୁଣା ନିବେଶକ ମାର୍କ ମୋବିୟସ୍ ଭାରତକୁ ନେଇ ବଡ଼ ଭବିଷ୍ୟବାଣୀ କରିଛନ୍ତି । ସେ କହିଛନ୍ତି ଯେ, ଏ ବର୍ଷ ଶେଷ ସୁଦ୍ଧା ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ଲକ୍ଷେ ପାର୍ କରିବ ।
ମୋବିୟସ୍ ନିବେଶକଙ୍କୁ ପରାମର୍ଶ ଦେଇଛନ୍ତି ଯେ, ବର୍ତ୍ତମାନ କୌଣସି ପ୍ରକାର ହ୍ରାସକୁ ଏକ ସୁଯୋଗ ଭାବେ ଦେଖିବା ଉଚିତ । ୧ ଲକ୍ଷର ଲକ୍ଷ୍ୟ ବର୍ତ୍ତମାନର ବଜାର ମୂଲ୍ୟଠାରୁ ପ୍ରାୟ ୧୮% ସମ୍ଭାବ୍ୟ ବୃଦ୍ଧିକୁ ଦର୍ଶାଉଛି । ସିଏନ୍ବିସିରେ ଏକ ସାକ୍ଷାତ୍କାର ଅବସରରେ ମୋବିୟସ୍ କହିଛନ୍ତି ଯେ, ଚୀନ୍ର ଷ୍ଟକ୍ ବଜାରରେ ଇତିମଧ୍ୟରେ ଦେଖାଦେଇଥିବା ବୃଦ୍ଧି କ୍ଷଣସ୍ଥାୟୀ । ସେ ସଚେତନ କରିଛନ୍ତି ଯେ, ଚୀନ୍ର ପୁନଃରୁଦ୍ଧାର ପ୍ୟାକେଜ୍ ଯୋଗୁ ଧାତବ କ୍ଷେତ୍ରରେ ଦେଖାଦେଇଥିବା ବୃଦ୍ଧି ଅସ୍ଥାୟୀ ସାବ୍ୟସ୍ତ ହୋଇପାରେ ।
ମୋବିୟସ କହିଛନ୍ତି ଯେ, ଏହା ଏଥିପାଇଁ ଅସ୍ଥାୟୀ କାରଣ ବର୍ତ୍ତମାନ ଏହା ସ୍ପଷ୍ଟ ହୋଇନାହିଁ ଯେ, ଚୀନ୍ ସରକାର ବଡ଼ ଶିଳ୍ପଗୁଡ଼ିକ ସହ ସମ୍ପୂର୍ଣ୍ଣ ଭାବେ ଛିଡ଼ା ହୋଇଛନ୍ତି ଅବା ନାହିଁ । ସେ ଆହୁରି କହିଛନ୍ତି ଯେ, ଚୀନ୍ର ଉତ୍ତମ ପ୍ରଦର୍ଶନ ଯୋଗୁ ପ୍ରତ୍ୟେକ ବିକାଶମୁଖୀ ବଜାର ପାଇଁ ଉତ୍ତମ ସମ୍ଭାବନା ସୃଷ୍ଟି ହେବ । ଏସବୁ ବଜାରରେ ପୁଞ୍ଜି ପ୍ରବାହ ବଢ଼ିବ ।
ମୋବିୟସ କହିଛନ୍ତି ଯେ, ଯଦି ନିବେଶକଙ୍କ ପାଖରେ ନିବେଶ କରିବା ପାଇଁ ୧୦୦ ଡଲାର ଥାଏ ତେବେ ସେମାନେ ଭାରତୀୟ ବଜାରରେ ୫୦%, ଚୀନ୍ ଏବଂ ତାଇୱାନ୍ ବଜାରରେ ୨୫% ଏବଂ ଅବଶିଷ୍ଟ ୨୫% ତୁର୍କୀ, ଭିଏତ୍ନାମ ଓ ଅନ୍ୟ ବିକାଶଶୀଳ ବଜାରରେ ନିବେଶ କରିପାରିବେ । ତାଙ୍କ ଅନୁସାରେ, ପୋର୍ଟଫୋଲିଓର ୧୦% ଅଂଶ ସୁନାରେ ବି ଆବଣ୍ଟିତ କରାଯାଇପାରିବ ।
ଆଲୋଚନାବେଳେ ମୋବିୟସ କହିଲେ ଯେ, ବିକାଶମୁଖୀ ବଜାର ହେଉଛି ତାହା ଯେଉଁଠି ନିବେଶର ସୁଯୋଗ ଅନ୍ୱେଷଣ କରାଯିବା ଦରକାର । କାରଣ ଆଗକୁ ଯାଇ ଏହି ବଜାରଗୁଡ଼ିକ ଆମେରିକା ବଜାର ତୁଳନାରେ ଉତ୍ତମ ପ୍ରଦର୍ଶନ କରିବାର ସମ୍ଭାବନା ରହିଛି ।
ଗତ ବର୍ଷକରେ ବିଏସ୍ଇ ସେନ୍ସେକ୍ସରେ ୨୮.୫% ବୃଦ୍ଧି ଘଟିଛି । ସେହିଭଳି ଗତ ୬ ମାସରେ ଏଥିରେ ପ୍ରାୟ ୧୫% ବୃଦ୍ଧି ଦେଖିବାକୁ ମିଳିଛି । ଆଜି କାରବାର ଶେଷରେ ସେନ୍ସେକ୍ସରେ ୫୮୪.୮୧ ପଏଣ୍ଟ ବୃଦ୍ଧି ଘଟିଛି । ଫଳରେ ଏହା ୮୧,୬୩୪.୮୧ ପଏଣ୍ଟରେ ପହଞ୍ଚିଛି । ଅନ୍ୟପକ୍ଷରେ, ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ (ଏନ୍ଏସ୍ଇ) ନିଫ୍ଟିରେ ୨୧୭.୪୧ ପଏଣ୍ଟ ବୃଦ୍ଧି ଘଟିବା ଫଳରେ ଏହା ୨୫,୦୧୩.୧୫ ପଏଣ୍ଟରେ ପହଞ୍ଚିଛ
