ଭଞ୍ଜନଗର,୧୪/୫: ଗଞ୍ଜାମ ଜିଲ୍ଲାର ଜଗନ୍ନାଥ ପ୍ରସାଦ ବ୍ଲକ କୁଡୁତାଇ ପଂଚାୟତ ଅନ୍ତର୍ଗତ ନେତେରେଇ ପାହାଡ଼ ତଳେ ଏକ ଘରୋଇ କମ୍ପାନୀର ପ୍ରସ୍ତାବିତ ଗୋଳା ବାରୁଦ କାରଖାନା ନିର୍ମାଣ ହେବାକୁ ଯାଉଛି। ଏହି ବାରୁଦ କାରଖାନା ନିର୍ମାଣ ହେଲେ ପ୍ରାୟ ୨୭ ଖଣ୍ଡ ରାଜସ୍ୱ ଓ ଜଙ୍ଗଲ ଗ୍ରାମ ଗୁଡିକ ଧ୍ଵଂସ ବିଧ୍ୱସ୍ତ ହେବା ସହିତ ନେତେରେଇ ପାହାଡ଼ ତଳେ ଦୀର୍ଘ ବର୍ଷ ଧରି ଚାଷ ଓ ବାସ କରି ଆସୁଥିବା ସାଧାରଣ ଲୋକଙ୍କ ଜୀବନ ଜୀବିକା ପ୍ରଭାବିତ ହେବ। ସାଧାରଣ ଲୋକ ବିଭିନ୍ନ ମାରାତ୍ମକ ରୋଗର ଶୀକାର ହେବେ। ପୁରୁଷ ପୁରୁଷ ଧରି ଚାଷ କରି ଆସୁଥିବା ଚାଷଜମି ଓ ଜଙ୍ଗଲ ଜମି ନଷ୍ଟ ହେବ।
ଏଣୁ ଏହାର ପ୍ରତିବାଦରେ ଚାଷୀ ମୁଲିଆ ସଂଘ, ଓଡିଶା ଓ ମାନବାଧିକାର ସୁରକ୍ଷା ମଞ୍ଚର ଆହ୍ବାନ କ୍ରମେ ଏକ ପ୍ରତିବାଦ ସଭା ନେତେରେଇ ପାହାଡ ନିକଟରେ ଆୟୋଜିତ ହୋଇଯାଇଛି। ଏଥିରେ ମାନବାଧିକାର ସୁରକ୍ଷା ମଞ୍ଚର ଆବାହକ ଅବନୀ କୁମାର ଗୟା, ଅଲ ଇଣ୍ଡିଆ କ୍ଷେତ ମଜଦୂର କିଷାନ ସଭାର ରାଜ୍ୟ ନେତା ନିରାକାର ନାୟକ, ବ୍ଲକ ସମ୍ପାଦକ ଶିବରାମ ନାଇକ, ଲଡ଼ୁ ନାଇକ, ବସନ୍ତ କୁମାର ନାଇକ, ଶମ୍ଭୁ ନାୟକ, ଚିତ୍ରସେନ ପଲ୍ଲାଇ,ପୀତବାସ ନାୟକ ପ୍ରମୁଖ ଯୋଗଦେଇ ବାରୁଦ କାରଖାନା ବିରୁଦ୍ଧରେ ବିଷୋଦଗାର କରିଥିଲେ। ଯଦି ଏହି ପ୍ରସ୍ତାବିତ ବାରୁଦ କାରଖାନା ନିର୍ମାଣ ବନ୍ଦ ନହୁଏ ତେବେ ଆଗାମୀ ଦିନରେ ଏହାକୁ ନେଇ ଜୋରଦାର ସଂଘର୍ଷ ହେବ ବୋଲି ଏହି ନେତାମାନେ ଚେତାବନୀ ଦେଇଛନ୍ତି।
