ନୂଆଦିଲ୍ଲୀ,୨୫/୦୪: ସମାଜସେବୀ ମେଧା ପାଟେକର ଗିରଫ ହୋଇଛନ୍ତି । ନର୍ମଦା ବଞ୍ଚାଅ ଆନ୍ଦୋଳନରେ ସକ୍ରିୟ ଭୂମିକା ଗ୍ରହଣ କରିଥିବା ସାମାଜିକ କର୍ମୀ ମେଧା ପାଟେକରଙ୍କୁ ଦିଲ୍ଲୀ ପୋଲିସ ଗିରଫ କରିଛି । ୨୪ ବର୍ଷ ପୁରୁଣା ମାନହାନୀ ମକଦ୍ଦମା ଆଧାରରେ ମେଧା ଗିରଫ ହୋଇଛନ୍ତି । ଏଲଜି ବିନୟ ସକ୍ସେନା ମେଧା ପାଟକରଙ୍କ ବିରୋଧରେ ମାନହାନୀ ମକଦ୍ଦମା କରିଥିଲେ । ମେଧାଙ୍କ ବିରୋଧରେ ଜାମିନ ବିହୀନ ୱାରେଣ୍ଟି ଜାରି କରିଥିଲେ କୋର୍ଟ । ଆଜି ସାକେତ କୋର୍ଟରେ ହାଜର ହୋଇଥିଲେ ମେଧା ।
ଫୌଜଦାରୀ ମାନହାନୀ ମାମଲାରେ ମେଧା ଦୋଷୀ ସାବ୍ୟସ୍ତ ହୋଇଥିଲେ । ଏହାପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଦିଲ୍ଲୀ ପୋଲିସ ତାଙ୍କୁ ଗିରଫ କରିଛି । ୨୦୦୧ରେ ଦିଲ୍ଲୀ ଲେଫ୍ଟନାଣ୍ଟ ଗଭର୍ଣ୍ଣର ବିନୟ ସକ୍ସେନାଙ୍କ ଦ୍ୱାରା କରାଯାଇଥିବା ମାନହାନୀ ମାମଲାରେ କୋର୍ଟ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ମେଧାଙ୍କ ବିରୋଧରେ ଏନବିଡବ୍ଲୁୟ ଅର୍ଥାତ ଜାମିନ ବିହୀନ ୱାରେଣ୍ଟି ଜାରି କରିଥିଲେ । ଆସନ୍ତା ମେ ୩ରେ ଏନବିଡବ୍ଲୁ ଏବଂ ଆଗାମୀ କାର୍ଯ୍ୟାନୁଷ୍ଠାନ ରିପୋର୍ଟ ପ୍ରକାଶ କରାଯିବ ।
ଗତବର୍ଷ ମାଜିଷ୍ଟ୍ରେଟ କୋର୍ଟ ଦେଇଥିବା ଦଣ୍ଡାଦେଶ ବିରୋଧରେ ଆବେଦନ କରିଥିଲେ । ଆବେଦନରେ ତାଙ୍କୁ ଜାମିନ ଦିଆଯାଇଥିଲା । ତାଙ୍କର ୫ମାସ ଜେଲଦଣ୍ଡ ସହ ୧୦ ଲକ୍ଷ ଟଙ୍କା ଜରିମାନା ସ୍ଥଗିତ ରଖାଯାଇଥିଲା । ଭାରତୀୟ ଦଣ୍ଡ ସଂହିତା ଧାରା ୫୦୦ ଅନୁଯାୟୀ ମାମଲା ରୁଜ୍ଜୁ ହୋଇଥିଲା । ୨୦୦୧ରେ ବିନୟ ସକ୍ସେନା ଓ ମେଧା ପାଟେକରଙ୍କ ମଧ୍ୟରେ ଆଇନଗତ ଲଢେଇ ଆରମ୍ଭ ହୋଇଥିଲା । ସେବେ ମେଧା ତାଙ୍କ ସହ ନର୍ମଦା ବଞ୍ଚାଅ ଆନ୍ଦୋଳନ ଏବିଏ ବିରୋଧରେ ବିଜ୍ଞାପନ ପ୍ରକାଶିତ କରିବା ନେଇ ବିନୟ ସକ୍ସେନାଙ୍କ ବିରୋଧରେ ମକଦ୍ଦମା କରିଥିଲେ ।
ଭିକେ ସକ୍ସେନା ବନାମ ମେଧା ପାଟେକର ମାନହାନି ମାମଲାରେ ଦିଲ୍ଲୀର ସାକେତ କୋର୍ଟରେ ସାମାଜିକ କର୍ମୀ ମେଧା ପାଟକର ହାଜର ହୋଇଥିଲେ । ବଣ୍ଡ ଦାଖଲ ଏବଂ କ୍ଷତିପୂରଣ ରାଶି ଜମା କରିବା ସର୍ତ୍ତରେ ମେଧାଙ୍କୁ ଜାମିନ ଦେବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ ।
