ନୂଆଦିଲ୍ଲୀ,୦୨/୦୬: କାହାକୁ ଗାଳି କରିବା ଅର୍ଥ ଆତ୍ମହତ୍ୟା ପାଇଁ ଉସୁକାଯାଇଛି ବୋଲି କୁହାଯାଇ ପାରିବ ନାହିଁ । ସୁପ୍ରିମକୋର୍ଟ ଏହି ଟିପ୍ପଣୀ ଦେବା ସହ ମାଡ୍ରାସ ହାଇକୋର୍ଟଙ୍କ ଆଦେଶକୁ ଖାରଜ କରିଦେଇଛନ୍ତି । ହାଇକୋର୍ଟ ନିଜ ରାୟରେ ତାମିଲନାଡୁ ସ୍କୁଲ୍ର ଜଣେ ହଷ୍ଟେଲ ୱାର୍ଡେନଙ୍କୁ ଆଇପିସି ଧାରା ୩୦୬ ଅନୁସାରେ ଛାତ୍ରଙ୍କୁ ଆତ୍ମହତ୍ୟା ପାଇଁ ଉସୁକାଇବା ନେଇ ଦୋଷୀ ସାବ୍ୟସ୍ତ କରିଥିଲେ । ତେବେ ସୁପ୍ରିମକୋର୍ଟଙ୍କ ରାୟ ଦ୍ୱାରା ସେ ଦୋଷମୁକ୍ତ ହୋଇଛନ୍ତି । ସୁ
ପ୍ରିମକୋର୍ଟରେ ଶୁଣାଣି ବେଳେ ଜଷ୍ଟିସ୍ ଅହସାନୁଦ୍ଦିନ ଅମାନୁଲ୍ଲାହ ଓ ପ୍ରଶାନ୍ତ କୁମାର ମିଶ୍ରଙ୍କ ଖଣ୍ଡପୀଠ କହିଛନ୍ତି, ଗାଳିଦେବା ଦ୍ୱାରା ଏଭଳି ଘଟଣା ଘଟିବା ନେଇ କେହି ଚିନ୍ତା କରିପାରିବ ନାହିଁ । ହଷ୍ଟେଲ ୱାର୍ଡେନ ଜଣକ ଅନ୍ୟ ଜଣେ ଛାତ୍ରଙ୍କ ଅଭିଯୋଗ ପରେ ପୀଡ଼ିତ ଛାତ୍ରଙ୍କୁ ଗାଳି କରିଥିଲେ । ଏହାପରେ ସେ ନିଜ ରୁମ୍ରେ ଫାଶୀ ଲଗାଇ ଆତ୍ମହତ୍ୟା କରିଥିଲେ । ୱାର୍ଡେନଙ୍କ ଯୁକ୍ତି ଥିଲା ଯେ ସେ ଅଭିଭାବକ ଦୃଷ୍ଟିରୁ ଗାଳି କରିଥିଲେ । ଯାହା ଦ୍ୱାରା ସେ ପୁନର୍ବାର ଭୁଲ କରିବେ ନାହିଁ । କିନ୍ତୁ ସେ ଏଭଳି ଚରମ ପଦକ୍ଷେପ ନେବେ ବୋଲି ୱାର୍ଡେନ ଭାବି ନ ଥିଲେ ।
ହଷ୍ଟେଲ ୱାର୍ଡେନଙ୍କ ପକ୍ଷରୁ ମାମଲା ଲଢ଼ୁଥିବା ଓକିଲ ନିଜ ଯୁକ୍ତିରେ ଦର୍ଶାଇଥିଲେ ଯେ ଛାତ୍ର ଜଣକୁ ପାଟି କରାଯିବା ପରେ ସେ ନିଜ ରୁମ୍କୁ ଚାଲିଯାଇଥିଲେ । ପରିସ୍ଥିତି ଶାନ୍ତ ପଡ଼ିଥିଲା । କିନ୍ତୁ ପରେ ଛାତ୍ର ଜଣକୁ ମୃତ ଅବସ୍ଥାରେ ଉଦ୍ଧାର କରାଯାଇଥିଲା । ତାଙ୍କ ମୁତାବକ ସ୍କୁଲ ଓ ହଷ୍ଟେଲ ଚଳାଉଥିବା ଲୋକଙ୍କର ଦାୟିତ୍ୱ ରହିଛି । ପିଲାମାନଙ୍କୁ କିଭଳି ଅଭିଭାବକ ସାଜି ଠିକ୍ ବାଟରେ ଯିବା ପାଇଁ କୁହାଯିବ, ତାହା ୱାର୍ଡେନଙ୍କ ଦାୟିତ୍ୱ । ପିଲାମାନେ ନିଜ ପିତାମାତାଙ୍କୁ ଛାଡ଼ି ହଷ୍ଟେଲରେ ରହୁଛନ୍ତି । ସେମାନେ ଯେମିତି ଭୁଲ ନ କରନ୍ତି, ସେଥିପାଇଁ ସେମାନଙ୍କୁ ତାଗିଦ୍ କରାଯାଏ । ତା’ଛଡ଼ା ହଷ୍ଟେଲ ୱାର୍ଡେନ୍ ଓ ସମ୍ପୃକ୍ତ ଛାତ୍ରଙ୍କ ମଧ୍ୟରେ କୌଣସି ବ୍ୟକ୍ତିଗତ ବିବାଦ ନ ଥିଲା ।
ତାମିଲନାଡୁ ସରକାରଙ୍କ ପକ୍ଷରୁ ମାମଲା ଲଢ଼ୁଥିବା ଓକିଲ ମଧ୍ୟ ସମାନ କଥା ଦର୍ଶାଇଥିଲେ । ହଷ୍ଟେଲ ୱାର୍ଡେନଙ୍କୁ ଦୋଷାରୋପ କରାଯିବା ନେଇ କୌଣସି ବୈଧ କାରଣ ନ ଥିବା ସେ କହିଥିଲେ । ଶୁଣାଣି ବେଳେ ଅଭିଯୋଗକାରୀ ତଥା ମୃତ ଛାତ୍ରଙ୍କ ପିତା ହାଜର ହୋଇ ନ ଥିଲେ । ଶେଷରେ ସୁପ୍ରିମକୋର୍ଟ ଖଣ୍ଡପୀଠ ହଷ୍ଟେଲ ୱାର୍ଡେନଙ୍କୁ ଦୋଷମୁକ୍ତ ଘୋଷଣା କରିଥିଲେ । ତାଙ୍କ ବିରୋଧରେ ଲାଗିଥିବା ଧାରା ୩୦୬କୁ ହଟାଇବା ଲାଗି କୋର୍ଟ ନିର୍ଦ୍ଦେଶ ଦେଇଥିଲେ । ରାଜ୍ୟ ପୁଲିସ ତରଫରୁ ଏହି ମାମଲା ରୁଜୁ ହୋଇଥିଲା । ଉଲ୍ଲେଖଯୋଗ୍ୟ, ଏହା ପୂର୍ବରୁ ୨୦୨୪ ଡିସେମ୍ବରରେ ମଧ୍ୟ ସର୍ବୋଚ୍ଚ ଅଦାଲତ ଏକ ମାମଲାରେ ସମାନ ଟିପ୍ପଣୀ ଦେଇଥିଲେ ।
