ନୂଆଦିଲ୍ଲୀ: ଇରାନ ବର୍ତ୍ତମାନ ଏକାକୀ ଭାବରେ ଆମେରିକା ଏବଂ ଇସ୍ରାଏଲର ମୁକାବିଲା କରୁଛି। ଏହା ସାଉଦି ଆରବ, କତାର ଏବଂ ବାହାରିନ ଭଳି ଅନେକ ଉପସାଗରୀୟ ଦେଶକୁ ମଧ୍ୟ ଟାର୍ଗେଟ କରିଛି। ତଥାପି, ଯୁଦ୍ଧର ପଦ୍ଧତି ପରିବର୍ତ୍ତନ ହେଉଛି, ଏବଂ ଅସ୍ତ୍ରଶସ୍ତ୍ର ଅପେକ୍ଷା ବୁଦ୍ଧିର ଖେଳ ଅଧିକ ଗୁରୁତ୍ୱପୂର୍ଣ୍ଣ ହେଉଛି । ଜଣେ ଚୀନ୍ ପ୍ରଫେସର ଇରାନକୁ ଏକ ଆଶ୍ଚର୍ଯ୍ୟକର ପରାମର୍ଶ ଦେଇଛନ୍ତି। ପ୍ରଫେସର ଦାବି କରିଛନ୍ତି ଯେ, ଆମେରିକା କିମ୍ବା ଏହାର ସହଯୋଗୀ ମାନଙ୍କୁ ପରାସ୍ତ କରିବା ପାଇଁ ଇରାନକୁ ଗୋଟିଏ ବି ଗୁଳି ଚଳାଇବାକୁ ପଡିବ ନାହିଁ। ଇରାନ କେବଳ ଗୋଟିଏ ପଦକ୍ଷେପ ଦ୍ୱାରା ଲକ୍ଷ ଲକ୍ଷ ଲୋକଙ୍କ ମଧ୍ୟରେ ବିନାଶ ଘଟାଇପାରିବ। ଏହି ରଣନୀତି ଯେକୌଣସି କ୍ଷେପଣାସ୍ତ୍ର ଆକ୍ରମଣ ଅପେକ୍ଷା ବହୁତ ଅଧିକ ଘାତକ ପ୍ରମାଣିତ ହୋଇପାରେ।
ଉପସାଗରୀୟ ଦେଶ ଗୁଡ଼ିକର ଶୋଷ ସେମାନଙ୍କର ସବୁଠାରୁ ବଡ଼ ଦୁର୍ବଳତା ହେବ କି ?
ଚୀନ ପ୍ରଫେସର କହିଛନ୍ତି ଯେ, ଉପସାଗରୀୟ ଦେଶ ଗୁଡ଼ିକର ସବୁଠାରୁ ବଡ଼ ସମସ୍ୟା ହେଉଛି ସେମାନଙ୍କର କୌଣସି ପ୍ରାକୃତିକ ମଧୁର ଜଳ ଉତ୍ସ ନାହିଁ। ପ୍ରଫେସରଙ୍କ ଅନୁସାରେ, ସେମାନଙ୍କର ପାନୀୟ ଜଳର ୬୦ ପ୍ରତିଶତ ଡିସାଲିନେସନ୍(ଖାର ପାଣିକୁ ମିଠା ବନାଇବା) ପ୍ରକ୍ରିୟାରୁ ଆସେ । ସମଗ୍ର ଅଞ୍ଚଳ ଏହାର ଜଳ ଆବଶ୍ୟକତା ପୂରଣ କରିବା ପାଇଁ ବିଶାଳ ଯନ୍ତ୍ରପାତି ଏବଂ ପ୍ଲାଣ୍ଟ ଉପରେ ନିର୍ଭର କରେ। ଯଦି ଏହି ପ୍ଲାଣ୍ଟ ଗୁଡ଼ିକ କାମ କରିବା ବନ୍ଦ କରିଦିଏ, ତେବେ କିଛି ଘଣ୍ଟା ମଧ୍ୟରେ ପାଣି ପାଇଁ ଦଙ୍ଗା ସୃଷ୍ଟି ହୋଇପାରେ। ଏହା ଏକ ଦୁର୍ବଳତା ଯାହାକୁ ଏପର୍ଯ୍ୟନ୍ତ ଅଣଦେଖା କରାଯାଇଛି।
ଚୀନ ପ୍ରଫେସରଙ୍କ ବିଶ୍ଳେଷଣ ଅତ୍ୟନ୍ତ ଭୟଙ୍କର। ସେ କହିଛନ୍ତି ଯେ ଇରାନକୁ ଏକ ବଡ଼ ସେନାର ଆବଶ୍ୟକତା ନାହିଁ। କେବଳ ଗୋଟିଏ ଆତ୍ମଘାତୀ ଡ୍ରୋନ୍ ଏକ ପ୍ରମୁଖ ଜଳ ପ୍ଲାଣ୍ଟକୁ ଟାର୍ଗେଟ କରିପାରିବ। ଯଦି ଏକ ପ୍ରମୁଖ ପ୍ଲାଣ୍ଟ ନଷ୍ଟ ହୋଇଯାଏ, ତେବେ ଲକ୍ଷ ଲକ୍ଷ ଲୋକ ପାଣି ବିନା ରହିବେ।
ଉପସାଗରୀୟ ଦେଶ ଗୁଡ଼ିକରେ ୮୦ ପ୍ରତିଶତ ଖାଦ୍ୟ ବିଦେଶରୁ ଆସେ, ଯାହା ସମ୍ପୂର୍ଣ୍ଣ ଭାବରେ ଜଳ ଏବଂ ଯୋଗାଣ ଶୃଙ୍ଖଳ ଉପରେ ନିର୍ଭରଶୀଳ। ପାଣି ବିନା, ନା ଖାଦ୍ୟ ରନ୍ଧା ହେବ ଏବଂ ନା ଲୋକମାନେ ବଞ୍ଚିପାରିବେ। ଏହା କୌଣସି ପାରମ୍ପରିକ ଯୁଦ୍ଧ ବିନା ସମଗ୍ର ଜନସଂଖ୍ୟାକୁ ନଷ୍ଟ କରିବା ପରି।
ଆମେରିକା ଏହି 'ଜଳ ଯୁଦ୍ଧ'ରୁ ତା'ର ସୈନିକ ମାନଙ୍କୁ କିପରି ରକ୍ଷା କରିପାରିବ ?
ଚୀନ୍ ପ୍ରଫେସରଙ୍କ ଅନୁଯାୟୀ, ମଧ୍ୟପ୍ରାଚ୍ୟରେ ନିୟୋଜିତ ଆମେରିକୀୟ ସୈନ୍ୟଙ୍କ ପାଇଁ ପାଣି ଯୋଗାଣ ମଧ୍ୟ ଏହି ସ୍ଥାନୀୟ ଉତ୍ସରୁ ଆସିଥାଏ। ପ୍ରଫେସର ଯୁକ୍ତି ଅନୁସାରେ, ଯେତେବେଳେ ଜନସାଧାରଣ ତୃଷାର୍ତ୍ତ ହେବେ ଏବଂ ଅରାଜକତା ସୃଷ୍ଟି ହେବ, ସେତେବେଳେ ଆମେରିକୀୟ ସେନାର ପରିଚାଳନା ସମ୍ପୂର୍ଣ୍ଣ ବିଫଳ ହେବ। ଏହା ନିଜ ସୁରକ୍ଷା ଅପେକ୍ଷା ନିଜ ଲୋକଙ୍କୁ ପାଣି ଯୋଗାଇବା ବିଷୟରେ ଅଧିକ ଚିନ୍ତିତ ହେବ। ଏହି ପରିସ୍ଥିତି ଯେକୌଣସି ଦେଶକୁ ଆୟତକୁ ଆଣିବା ପାଇଁ ଯଥେଷ୍ଟ।
ଡିସାଲିନେସନ୍ ପ୍ଲାଣ୍ଟ କାହିଁକି ସହଜ ଲକ୍ଷ୍ୟସ୍ଥଳ ପାଲଟିଛି ?
ଇରାନ ପାଖରେ ଉନ୍ନତ ଡ୍ରୋନ୍ ଟେକନୋଲୋଜି ଅଛି, ଯାହା ରାଡାର ଚିହ୍ନଟକୁ ଏଡ଼ାଇ ଦେଇପାରିବ ଏବଂ ସଠିକ୍ ଭାବରେ ସେମାନଙ୍କୁ ଟାର୍ଗେଟ କରିପାରିବ। ଡିସାଲିନେସନ୍ ପ୍ଲାଣ୍ଟ ଗୁଡ଼ିକ ସମୁଦ୍ର କୂଳରେ ଅବସ୍ଥିତ, ଯାହା ସେମାନଙ୍କର ସୁରକ୍ଷାକୁ ଅତ୍ୟନ୍ତ ଚ୍ୟାଲେଞ୍ଜିଂ କରିଥାଏ। ଏକ ଛୋଟ ବିସ୍ଫୋରଣ ମଧ୍ୟ ଏହି ପ୍ଲାଣ୍ଟ ଗୁଡ଼ିକରେ ଥିବା ମୂଲ୍ୟବାନ ଯନ୍ତ୍ରପାତିକୁ କ୍ଷତି ପହଞ୍ଚାଇପାରେ। ଏହି ମେସିନ ଗୁଡ଼ିକୁ ମରାମତି କରିବା ପାଇଁ ମାସ ମାସ ସମୟ ଲାଗିଯାଉଥିବାରୁ, ଆକ୍ରମଣ ହେବା ପରେ ପୁନରୁଦ୍ଧାର ପାଇଁ ବହୁତ କମ୍ ସୁଯୋଗ ଅଛି। ଏହା ଉପସାଗରୀୟ ଦେଶଗୁଡ଼ିକ ପାଇଁ ଏକ ବଡ଼ ବିପଦ ସାଜିଛି ।
