ନୂଆଦିଲ୍ଲୀ, ୧୪।୮: ଇଟାଲୀର ଲାମ୍ପେଡୁସା ଦ୍ୱୀପ ନିକଟରେ ଅନ୍ତର୍ଜାତୀୟ ଜଳସୀମାରେ ବୁଧବାର ପ୍ରାୟ ୧୦୦ ପ୍ରବାସୀଙ୍କୁ ନେଇ ଯାଉଥିବା ଏକ ଡଙ୍ଗା ବୁଡ଼ିଯାଇଛି । ଯେଉଁଥିରେ ଅତି କମ୍ରେ ୨୬ ଜଣଙ୍କର ମୃତ୍ୟୁ ହୋଇଛି ଏବଂ ପ୍ରାୟ ୧୨ ଜଣ ନିଖୋଜ ଥିବା ଇଟାଲୀୟ କର୍ତ୍ତୃପକ୍ଷ ଏବଂ ଜାତିସଂଘ ଏଜେନ୍ସିଗୁଡ଼ିକ ରିପୋର୍ଟ କରିଛନ୍ତି ।
ଇଟାଲୀରେ ଥିବା ଜାତିସଂଘ ଶରଣାର୍ଥୀ ସଂସ୍ଥା UNHCRର ମୁଖପାତ୍ର ଫିଲିପୋ ଉଙ୍ଗାରୋ କହିଛନ୍ତି ଯେ, ୬୦ ଜଣ ଲୋକଙ୍କୁ ଲାମ୍ପେଡୁସାର ଏକ ଅଭ୍ୟର୍ଥନା କେନ୍ଦ୍ରକୁ ନିଆଯାଇଛି । ଜାହାଜ ବୁଡ଼ିବା ପୂର୍ବରୁ ପାଖାପାଖି ୯୭ ଜଣ ପ୍ରବାସୀ ଲିବିଆରୁ ଯାତ୍ରା ଆରମ୍ଭ କରିଥିଲେ । ଅନ୍ତର୍ଜାତୀୟ ପ୍ରବାସୀ ସଂଗଠନ (IOM) ମୁଖପାତ୍ର ଫ୍ଲାଭିଓ ଡି ଜିଆକୋମୋ କହିଛନ୍ତି, ପ୍ରାୟ ୯୫ ଜଣ ପ୍ରବାସୀ ପ୍ରଥମେ ଦୁଇଟି ଡଙ୍ଗାରେ ଲିବିଆ ଛାଡ଼ିଥିଲେ । ଯେତେବେଳେ ଜାହାଜ ପାଣିରେ ବୁଡ଼ିବା ଆରମ୍ଭ କଲା, ସମସ୍ତ ଯାତ୍ରୀଙ୍କୁ ଏକ ଫାଇବରଗ୍ଲାସ୍ ଡଙ୍ଗାକୁ ସ୍ଥାନାନ୍ତରିତ କରାଯାଇଥିଲା, ଯାହା ପରେ ଓଭରଲୋଡିଂ ଯୋଗୁଁ ଏହା ଓଲଟି ପଡ଼ିଥିଲା । ଲାମ୍ପେଡୁସା ମେୟର ଫିଲିପୋ ମାନିନୋ କହିଛନ୍ତି ଯେ, ଗୁରୁବାର ଭୋର ସମୟରେ ଏହି ଦୁର୍ଘଟଣା ଘଟିଥିଲା ।
UNHCRର ରିପୋର୍ଟ ଅନୁଯାୟୀ, ବିପଜ୍ଜନକ କେନ୍ଦ୍ରୀୟ ଭୂମଧ୍ୟସାଗର ପାର୍ ହେବା ସମୟରେ ଚଳିତ ବର୍ଷ ମୋଟ୍ ୬୭୫ ଜଣ ପ୍ରବାସୀଙ୍କ ମୃତ୍ୟୁ ଘଟିଛି । ଆଇଓଏମ୍ ରିପୋର୍ଟ କରିଛି ଯେ, ଉତ୍ତର ଆଫ୍ରିକାରୁ ଦକ୍ଷିଣ ୟୁରୋପକୁ ଯାଉଥିବା ଏହି ପଥକୁ ବିଶ୍ୱର ସବୁଠାରୁ ବିପଦପୂର୍ଣ୍ଣ ପ୍ରବାସ ପଥ ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ । ଗତ ଦଶନ୍ଧି ମଧ୍ୟରେ ପ୍ରାୟ ୨୪, ୫୦୦ ଲୋକ ଭୂମଧ୍ୟସାଗର ପାର୍ ହେବା ସମୟରେ ମୃତ୍ୟୁବରଣ କରିଛନ୍ତି କିମ୍ବା ନିଖୋଜ ହୋଇଛନ୍ତି । ଅଧିକାଂଶ ମୃତ୍ୟୁ ଟ୍ୟୁନିସିଆ ଏବଂ ଲିବିଆ ଉପକୂଳରୁ ଯାଉଥିବା ଛୋଟ ଜାହାଜରେ ଘଟିଛି ।
ଲାମ୍ପେଡୁସା ନିକଟରେ ସବୁଠାରୁ ଭୟଙ୍କର ଜାହାଜ ବୁଡ଼ି ୨୦୧୩ ଅକ୍ଟୋବର ୩ରେ ଘଟିଥିଲା, ଯେତେବେଳେ ଇରିଟ୍ରିଆ, ସୋମାଲିଆ ଏବଂ ଘାନାରୁ ୫୦୦ରୁ ଅଧିକ ପ୍ରବାସୀଙ୍କୁ ନେଇ ଯାଉଥିବା ଏକ ଡଙ୍ଗାରେ ନିଆଁ ଲାଗି ଡଙ୍ଗାଟି ଓଲଟି ପଡ଼ିଥିଲା, ଯେଉଁଥିରେ ପାଖାପାଖି ୩୬୮ ଜଣ ପ୍ରାଣ ହରାଇଥିଲେ ।
ଇଟାଲୀୟ ସରକାରଙ୍କ ପ୍ରତିକ୍ରିୟା:
ଇଟାଲୀୟ ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି, ଦକ୍ଷିଣପନ୍ଥୀ ସରକାର ଅବୈଧ ପ୍ରବାସ ଉପରେ କଡ଼ା କାର୍ଯ୍ୟାନୁଷ୍ଠାନକୁ ସର୍ବୋଚ୍ଚ ପ୍ରାଥମିକତା ଦେଇଛି । ଅନିୟମିତ ପ୍ରସ୍ଥାନକୁ ରୋକିବା ଏବଂ ପ୍ରବାସ ପ୍ରବାହକୁ ପରିଚାଳନା କରି "ଅସାଧୁ ଚାଲାଣକାରୀ" ବିରୁଦ୍ଧରେ ଲଢ଼ିବା ଜାରି ରଖିବାକୁ ପ୍ରତିଶ୍ରୁତି ଦେଇଛନ୍ତି ।
