ଭୁବନେଶ୍ୱର,୨୫/୬ : ରାଜ୍ୟରେ ବଢ଼ିବ ଦୁଗ୍ଧ ଓ ଅଣ୍ଡା ଉତ୍ପାଦନ । ଆଗାମୀ ୧୦ ବର୍ଷରେ ଦୁଇ ଗୁଣା ଦୁଗ୍ଧ ଓ ୩ ଗୁଣା ଅଣ୍ଡା ଉତ୍ପାଦନ ହେବ । ଏମିତି ଲକ୍ଷ୍ୟ ରଖି କାର୍ଯ୍ୟ ଆରମ୍ଭ କରିଛନ୍ତି ରାଜ୍ୟ ସରକାର । ଉନ୍ନତ ତଥା ଶଙ୍କର ପ୍ରଜାତିର ଗୋରୁ ପାଇଁ ବାହାର ରାଜ୍ୟ ଉପରେ ଓଡ଼ିଶା ନିର୍ଭର କରିବନି । ପ୍ରଜନନ କ୍ଷମତା ହରାଇଥିବା ଗାଈ କିମ୍ବା ମଇଁଷିମାନେ ମଧ୍ୟ ଛୁଆ ଜନ୍ମ କରିପାରିବେ । ଏଥିପାଇଁ ଖୁବଶୀଘ୍ର ରାଜ୍ୟରେ ମଣିଷଙ୍କ ଭଳି ଗୋରୁଙ୍କ କ୍ଷେତ୍ରରେ ଇନଭିଟ୍ରୋ ଫର୍ଟିଲାଇଜେସନ (ଆଇଭିଏଫ୍) ପ୍ରଣାଳୀ ପ୍ରୟୋଗ କରାଯିବ । ସେଥିପାଇଁ ଅତ୍ୟାଧୁନିକ ପ୍ରୟୋଗଶାଳା ପ୍ରତିଷ୍ଠା ହେବ । ଆଇଭିଏଫ୍ ମାଧ୍ୟମରେ ଗାଈ, ମଇଁଷିମାନେ ଉନ୍ନତମାନର ବାଛୁରୀ ଜନ୍ମ ଦେବେ । ବର୍ତ୍ତମାନ ରାଜ୍ୟରେ ଦିନକୁ ୭୦ ଲକ୍ଷ ଲିଟର ଦୁଗ୍ଧ ଉତ୍ପାଦନ ହେଉଛି । ୫ ବର୍ଷ ମଧ୍ୟରେ ଦିନକୁ ୮୦ ଲକ୍ଷ ଲିଟର, ୨୦୩୬ ସୁଦ୍ଧା ୧୬୫ ଲକ୍ଷ ଲିଟର ଦୁଗ୍ଧ ଉତ୍ପାଦନ ପାଇଁ ଲକ୍ଷ୍ୟ ରହିଛି ।
ବର୍ତ୍ତମାନ ଦିନକୁ ଜଣେ ଲୋକ ପାଇଁ ୧୫୬ ଗ୍ରାମ ଦୁଗ୍ଧ ଦରକାର ପଡ଼ୁଥିବା ବେଳେ ୨୦୨୯ରେ ୧୭୫, ୨୦୩୬ରେ ୩୦୦ ଗ୍ରାମରେ ପହଞ୍ଚିବ । ଯଦ୍ଦ୍ୱାରା ଗୋପାଳକଙ୍କ ଆୟ ବଢିବା ସହ ଆମେ ଅନ୍ୟ ରାଜ୍ୟକୁ ଦୁଗ୍ଧ ପଠାଇପାରିବା । ଏବେ ବାର୍ଷିକ ୩୭୨ କୋଟି ଅଣ୍ଡା ଉତ୍ପାଦନ ହେଉଛି । ବର୍ଷକୁ ମୁଣ୍ଡ ପିଛା ୮୦ଟି ଅଣ୍ଡା ଆବଶ୍ୟକ ପଡ଼ୁଛି । ଆସନ୍ତା ୫ ବର୍ଷରେ (୨୦୨୯) ସୁଦ୍ଧା ବାର୍ଷିକ ୫୦୦ କୋଟି ଓ ୨୦୩୬ ସୁଦ୍ଧା ୧୦୦୦ କୋଟି ଅଣ୍ଡା ଉତ୍ପାଦନ ପାଇଁ ପ୍ରସ୍ତୁତି ଆରମ୍ଭ ହୋଇଛି । ସେହିପରି ବର୍ତ୍ତମାନ ବାର୍ଷିକ ଦୁଇଲକ୍ଷ ମେଟ୍ରିକ ଟନ୍ ମାଂସ ଉତ୍ପାଦନ ହେଉଛି । ୨୦୨୯ ସୁଦ୍ଧା ବାର୍ଷିକ ୪ ଲକ୍ଷ ମେଟ୍ରିକ ଟନ୍ ଓ ୨୦୩୬ ସୁଦ୍ଧା ୬ଲକ୍ଷ ମେଟ୍ରିକ ଟନ୍ ମାଂସ ଉତ୍ପାଦନ ହେବ । ପ୍ରାଣୀ ସମ୍ପଦ କ୍ଷେତ୍ରକୁ ସୁଦୃଢ଼ କରିବା ପାଇଁ ଉପଖଣ୍ଡସ୍ତରରେ ଭେଟେରନାରୀ ପଲିକ୍ଲିନିକ୍ ଓ ଗ୍ରାମ ପଞ୍ଚାୟତରେ ପ୍ରାଣୀସମ୍ପଦ ସେବାକେନ୍ଦ୍ର ସଂଖ୍ୟା ବଢ଼ିବ । ଏବେ ୪ଟି ଉପଖଣ୍ଡରେ ପଲିକ୍ଲିନିକ୍ ରହିଛି ।
୨୦୨୯ରେ ୩୦ ଓ ୨୦୩୬ରେ ୫୮ଟି ପଲିକ୍ଲିନିକ୍ ଖୋଲାଯିବାକୁ ଲକ୍ଷ୍ୟ ରଖାଯାଇଛି । ଏବେ କୌଣସି ପଞ୍ଚାୟତରେ ପ୍ରାଣୀସମ୍ପଦ ସେବା କେନ୍ଦ୍ର ନଥିବା ବେଳେ ୨୦୨୯ରେ ୩୧୪ ଓ ୨୦୩୬ରେ ୧୦୦୦ ପଞ୍ଚାୟତରେ ଏହି କେନ୍ଦ୍ର ଖୋଲିବାକୁ ଯାଉଛି । କ୍ଷୀର ଉତ୍ପାଦନ ବୃଦ୍ଧି ପାଇଁ ରାଜ୍ୟରେ ଆଉ ଏକ ଫ୍ରୋଜେନ୍ ସିମେନ୍ ବ୍ୟାଙ୍କ ସହ ମାଂସ ଉତ୍ପାଦନ ଲାଗି ଏକ ଛେଳି ସିମେନ୍ ଷ୍ଟେସନ ପ୍ରତିଷ୍ଠା ହେବ । ଯଦ୍ୱାରା ଛେଳି ପ୍ରଜାତିଙ୍କ ସଂଖ୍ୟା ବଢ଼ିବ । ରାଜ୍ୟରେ ଏକ ମାଂସ ପ୍ରକ୍ରିୟାକରଣ ପ୍ଲାଣ୍ଟ ନିର୍ମାଣ ସହ ଗୋରୁଙ୍କ ଠାରେ ଦେଖାଯାଉଥିବା ଲାମ୍ପି ଚର୍ମ ରୋଗ ଓ ଗୋଟ୍ ପକ୍ସର ନିରାକରଣ ପାଇଁ ଅତ୍ୟାଧୁନିକ ଲାବୋରେଟୋରୀ ନିର୍ମାଣ ହେବ । ରାଜ୍ୟ ସରକାର ଖୁବ୍ଶୀଘ୍ର ସ୍ମଲ ଆନିମଲ ବ୍ରିଡିଂ ପଲିସି ଆଣିବେ ବୋଲି ଜଣାପଡ଼ିଛି ।
