ଭୁବନେଶ୍ୱର,୦୯/୧୧: ‘ମୋ ବସ୍’ର ବେପାରୁୱା ଗାଡି ଚାଳନା ସୀମା ଟପିବା ଖବର ପ୍ରକାଶ ପରେ କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ଚେତିଛି । ଖୋଦ୍ କ୍ରୁଟ୍ ମହାପ୍ରବନ୍ଧକ ତଥା ପରିଚାଳନା ନିର୍ଦ୍ଦେଶକ(ଏମଡି) ଏମ୍. ତିରୁମାଲା ନାଏକ ଅଚାନକ ‘ମୋ ବସ’ ଯାଞ୍ଚରେ ଲାଗିଛନ୍ତି । ମଦ ପିଇବା ଅଭିଯୋଗରେ ‘ମୋ ବସ୍’ ଡ୍ରାଇଭର ଏବଂ କଣ୍ଡକ୍ଟର ବିଦା ହୋଇଛନ୍ତି । ଡ୍ରାଇଭରଙ୍କ ନାଁ ଅନାଦି ନାଥ । କଣ୍ଡକ୍ଟର ଜଣକ ହେଲେ ଅରବିନ୍ଦ ଜେନା । କ୍ରୁଟ୍ କାର୍ଯ୍ୟନିର୍ବାହୀ ଦଳ ଦ୍ୱାରା ହଠାତ୍ ମଦ୍ୟପାନ ଯାଞ୍ଚ ବେଳେ ଏହା ଚିହ୍ନଟ ହୋଇଥିଲା । ମାଷ୍ଟରକ୍ୟାଣ୍ଟିନ ସ୍ଥିତ ବସ୍ ଡିପୋରେ ଉଭୟେ ଡ୍ୟୁଟି ସମୟରେ ମଦ ପିଉଥିଲେ । ଏହାବାଦ୍ ବିଶୃଙ୍ଖଳିତ ଆଚରଣ ଅଭିଯୋଗରେ ଅନ୍ୟ ୨ କର୍ମଚାରୀ(ଡ୍ରାଇଭର ଓ କଣ୍ଡକ୍ଟର) ଙ୍କୁ ମଧ୍ୟ ନିଲମ୍ବନ କରାଯାଇଛି । ସେମାନଙ୍କ ନିଲମ୍ବନ ଦୁଇ ମାସ ପର୍ଯ୍ୟନ୍ତ ବଳବତ୍ତର ରହିବ ।
କ୍ରୁଟ୍ ସୂଚାଇଛି, ମୋ ବସ୍ କର୍ମଚାରୀଙ୍କ ନିୟମିତ ମଦ୍ୟପାନ ପରୀକ୍ଷଣ, ସ୍ୱତନ୍ତ୍ର ଡ୍ରାଇଭିଂ ତାଲିମ, ଯାତ୍ରୀ ଓ ସହକର୍ମୀଙ୍କ ପ୍ରତି ଆଚରଣ ଓ ବ୍ୟବହାରଗତ ତାଲିମ ସହିତ କାର୍ଯ୍ୟସ୍ଥଳରେ ସ୍ୱତନ୍ତ୍ର ତଦାରଖ କରାଯିବାର ବ୍ୟବସ୍ଥାକୁ ଆହୁରି କଡ଼ାକଡ଼ି କରାହେବ । କ୍ରୁଟ୍ ଅଧିକାରୀ ଏନେଇ ନିର୍ଦ୍ଦେଶ ଦେଇଛନ୍ତି ଯେ କୌଣସି ଡ୍ରାଇଭର ଯଦି ଗାଡ଼ି ଚାଳନା ସମୟରେ ମଦ୍ୟପାନ କରିଥିବା ଜଣାପଡ଼େ, ତୁରନ୍ତ ସେମାନଙ୍କ ଡ୍ରାଇଭିଂ ଲାଇସେନ୍ସକୁ ୬ ମାସ ପର୍ଯ୍ୟନ୍ତ ରଦ୍ଦ କରାଯିବ । କେବଳ ମୋ ବସ୍ ନୁହେଁ ଚାକିରିରୁ ବାହାରି ଅନ୍ୟ କୌଣସି ସ୍ଥାନରେ ଗାଡ଼ି ଚାଳନା କରିବାକୁ ସେମାନଙ୍କୁ ସରକାରଙ୍କ ପକ୍ଷରୁ ଅନୁମତି ଦିଆଯିବ ନାହିଁ ।
ସୂଚନାଯୋଗ୍ୟ, ମୋ ବସ୍ ଡ୍ରାଇଭର ଏବଂ ଏହାର କର୍ମଚାରୀଙ୍କ ଉତ୍ପାତରେ ଲୋକେ ଅତିଷ୍ଠ ହୋଇ ଯାଉଥିଲେ । ବିଭିନ୍ନ ଥାନାରେ, କ୍ରୁଟ୍ ଅଫିସରେ ବାରମ୍ବାର ଦୁର୍ଘଟଣା, ବେପାରୁୱା ଗାଡି଼ ଚାଳନାର ଅଭିଯୋଗ ଗଦା ହେଉଥିଲା । କିନ୍ତୁ ଏଭଳି ଅଭିଯୋଗକୁ କ୍ରୁଟ୍ ଗୁରୁତର ସହ ନେଉ ନଥିଲା । ଏମିତିକି ଯାତ୍ରୀମାନଙ୍କ ଅଭିଯୋଗକୁ ଭ୍ରୁକ୍ଷେପ କରୁନଥିଲେ । ଏହାକୁ ଦୃଷ୍ଟିରେ ରଖି ଶେଷରେ ହାଇକୋର୍ଟ ଏହି ମାମଲାରେ ହସ୍ତକ୍ଷେପ କରିଥିଲେ । ହାଇକୋର୍ଟରେ ଏକ ମାମଲାର ଶୁଣାଣି ବେଳେ ଡ୍ରାଇଭରମାନଙ୍କ ମଦ ପିଇବା ପ୍ରସଙ୍ଗ ଉଠିଥିଲା । ଏଭଳି ଡ୍ରାଇଭରଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ ।
