ହାଇଦ୍ରାବାଦ: ପୂର୍ବତନ କ୍ରିକେଟର ଏବଂ ଏମଏଲସି ମହମ୍ମଦ ଆଝାରୁଦ୍ଦିନ ଶୁକ୍ରବାର ତେଲେଙ୍ଗାନା ସରକାରରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଆଜି ରାଜଭବନରେ ତାଙ୍କର ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା। ପ୍ରକୃତରେ ତେଲେଙ୍ଗାନାର ଜୁବଲି ହିଲ୍ସ ବିଧାନସଭା ଆସନ ପାଇଁ ନଭେମ୍ବର ୧୧ ତାରିଖରେ ଏକ ଉପନିର୍ବାଚନ ହେବାକୁ ଯାଉଛି। ଏହି ନିର୍ବାଚନମଣ୍ଡଳୀର ୩୦% ମୁସଲିମ ଭୋଟର। ଆଝାରୁଦ୍ଦିନଙ୍କ ମନ୍ତ୍ରିମଣ୍ଡଳରେ ପ୍ରବେଶ କଂଗ୍ରେସକୁ ଲାଭ ଦେବ ବୋଲି ବିଶ୍ୱାସ କରାଯାଉଛି।
ଆଝାରୁଦ୍ଦିନ ୨୦୨୩ ମସିହାରେ ଏହି ଆସନରୁ ନିର୍ବାଚନ ହାରିଯାଇଥିଲେ। କିନ୍ତୁ ଏବେ କଂଗ୍ରେସ ଲାଗି ଆଝାରୁଦ୍ଦିନ ବେଶୀ ଗୁରୁତ୍ବପୂର୍ଣ୍ଣ। ତେଲେଙ୍ଗାନାର କଂଗ୍ରେସ ସରକାରରେ କେହି ମୁସଲିମ ମନ୍ତ୍ରୀ ନଥିଲେ। କ୍ୟାବିନେଟରେ କୌଣସି ମୁସଲିମ୍ ନେତା ନଥିବାରୁ ଏହାକୁ ନେଇ କଂଗ୍ରେସ ସରକାର ଉପରେ ଅଭିଯୋଗ ଆସିଥିଲା ।
ଏସବୁ ପରେ ଏବେ କଂଗ୍ରେସ ଆଝାରୁଦ୍ଦିନଙ୍କୁ ମନ୍ତ୍ରୀ ଭାବରେ କ୍ୟାବିନେଟରେ ସାମିଲ କରିଛି । ଆଝାରୁଦ୍ଦିନଙ୍କ ଏଣ୍ଟ୍ରି ପରେ ରେବନ୍ତ ରେଡ୍ଡୀଙ୍କ ମନ୍ତ୍ରିମଣ୍ଡଳରେ ମନ୍ତ୍ରୀଙ୍କ ସଂଖ୍ୟା ୧୬ କୁ ପହଞ୍ଚିଛି । ରାଜ୍ୟର ସର୍ବାଧିକ ୧୮ ଜଣ ମନ୍ତ୍ରୀ ରହିପାରିବେ ।
ସୂଚନାଯୋଗ୍ୟ, ୨୦୨୩ ତେଲେଙ୍ଗାନା ବିଧାନସଭା ନିର୍ବାଚନରେ କଂଗ୍ରେସ ୧୧୯ ବିଧାନସଭା ଆସନରୁ ୬୪ଟି ଜିତିଥିଲା । ଶାସକ ଭାରତ ରାଷ୍ଟ୍ର ସମିତି (BRS) ୩୯ଟି ଆସନ ଜିତିଥିଲା । ବିଜେପି ୮ଟି, AIMIM ୭ଟି ଏବଂ ସିପିଆଇ ଗୋଟିଏ ଆସନରେ ବିଜୟୀ ହୋଇଥିଲା ।
ଆଝାରୁଦ୍ଦିନ ୨୦୦୯ ଲୋକସଭା ନିର୍ବାଚନରେ କଂଗ୍ରେସ ଟିକେଟରେ ମୁରାଦାବାଦରୁ ବିଜୟୀ ହୋଇଥିଲେ। ପରେ ସେ ୨୦୧୪ରେ ରାଜସ୍ଥାନର ଟୋଙ୍କ-ସୱାଇ ମାଧୋପୁର ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ହାରି ଯାଇଥିଲେ। ୨୦୧୮ରେ ତାଙ୍କୁ ତେଲେଙ୍ଗାନା ପ୍ରଦେଶ କଂଗ୍ରେସ କମିଟିର କାର୍ଯ୍ୟକାରୀ ସଭାପତି ନିଯୁକ୍ତ କରାଯାଇଥିଲା।
