ନୂଆଦିଲ୍ଲୀ,୦୪/୦୮: ମହମ୍ମଦ ସିରାଜ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟ ସିରିଜରେ ଚମତ୍କାର ପ୍ରଦର୍ଶନ କରିଛନ୍ତି ଏବଂ ତାଙ୍କର ଘାତକ ବୋଲିଂ ଯୋଗୁଁ ଇଂଲିଶ ବ୍ୟାଟରମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଛି। ତାଙ୍କର ଉତ୍ସାହ, ଆଗ୍ରହ ଏବଂ ଉତ୍କଣ୍ଠା ସହିତ, ସେ ଭାରତୀୟ ଦଳକୁ ସିରିଜ ବରାବର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସେ ପଞ୍ଚମ ଟେଷ୍ଟ ମ୍ୟାଚରେ ଉତ୍କୃଷ୍ଟ ବୋଲିଂ ପ୍ରଦର୍ଶନ କରିଥିଲେ।
ପଞ୍ଚମ ଟେଷ୍ଟର ପ୍ରଥମ ଇନିଂସରେ ମହମ୍ମଦ ସିରାଜ ଚାରିଟି ଏବଂ ଦ୍ୱିତୀୟ ଇନିଂସରେ ପାଞ୍ଚଟି ୱିକେଟ ନେଇଥିଲେ। ମ୍ୟାଚ୍ରେ ମୋଟ ୯ଟି ୱିକେଟ ନେଇ ସେ ପ୍ଲେୟାର ଅଫ୍ ଦି ମ୍ୟାଚ୍ ହୋଇଥିଲେ। ସିରାଜ ଏବେ ଇଂଲଣ୍ଡରେ ୪୬ଟି ଟେଷ୍ଟ ୱିକେଟ୍ ନେଇଛନ୍ତି। ଏହା ସହିତ, ସେ ଇଂଲଣ୍ଡରେ ସର୍ବାଧିକ ୱିକେଟ୍ ନେବା କ୍ଷେତ୍ରରେ କପିଲ ଦେବଙ୍କୁ ପଛରେ ପକାଇ ଦେଇଛନ୍ତି। ଇଂଲଣ୍ଡରେ କପିଲଙ୍କ ନାଁରେ ୪୨ଟି ଟେଷ୍ଟ ୱିକେଟ୍ ରହିଛି।
ଇଂଲଣ୍ଡରେ ଭାରତୀୟ ବୋଲରମାନଙ୍କ ମଧ୍ୟରେ, କେବଳ ଇଶାନ୍ତ ଶର୍ମା ଏବଂ ଜସପ୍ରିତ ବୁମରାହ ଟେଷ୍ଟ ୱିକେଟ୍ ନେବା ମାମଲାରେ ମହମ୍ମଦ ସିରାଜଙ୍କଠାରୁ ଆଗରେ ଅଛନ୍ତି। ବୁମରାହ ଏବଂ ଇଶାନ୍ତ ଉଭୟ ଇଂଲଣ୍ଡରେ ଟେଷ୍ଟରେ ୫୧ଟି ଲେଖାଏଁ ୱିକେଟ୍ ନେଇଛନ୍ତି। ସିରାଜ ଇଂଲଣ୍ଡରେ ୧୧ଟି ଟେଷ୍ଟ ମ୍ୟାଚ୍ ଖେଳି ୪୬ ଟେଷ୍ଟ ୱିକେଟ୍ ନେଇଛନ୍ତି ଏବଂ ଏଥିସହିତ ସେ ଦୁଇଥର ପାଞ୍ଚ ୱିକେଟ୍ ହାସଲ କରିଛନ୍ତି।
ଇଂଲଣ୍ଡରେ ସର୍ବାଧିକ ଟେଷ୍ଟ ୱିକେଟ୍ ନେଇଥିବା ଭାରତୀୟ ବୋଲର:
* ଜସପ୍ରିତ ବୁମରାହ- ୫୧ ୱିକେଟ୍
* ଇଶାନ୍ତ ଶର୍ମା- ୫୧ ୱିକେଟ୍
* ମହମ୍ମଦ ସିରାଜ- ୪୬ ୱିକେଟ୍
* କପିଲ ଦେବ- ୪୩ ୱିକେଟ୍
* ମହମ୍ମଦ ଶାମି- ୪୨ ୱିକେଟ୍
ମହମ୍ମଦ ସିରାଜ ଏକମାତ୍ର ଭାରତୀୟ ଦ୍ରୁତ ବୋଲର ଥିଲେ ଯିଏକି ଇଂଲଣ୍ଡ ବିପକ୍ଷରେ ଚଳିତ ଟେଷ୍ଟ ସିରିଜର ସମସ୍ତ ପାଞ୍ଚଟି ମ୍ୟାଚ୍ ଖେଳିଥିଲେ ଏବଂ ସର୍ବାଧିକ ୱିକେଟ୍ ନେଉଥିବା ବୋଲର ଥିଲେ। ସେ ମୋଟ ୨୩ଟି ୱିକେଟ୍ ନେଇଥିଲେ। ସିରାଜ ପ୍ରତ୍ୟେକ ମ୍ୟାଚ୍ରେ ନିଜର ସର୍ବସ୍ୱ ପ୍ରଦର୍ଶନ ଦେଇଥିଲେ ଏବଂ ଯେତେବେଳେ ଦଳକୁ ତାଙ୍କର ଆବଶ୍ୟକତା ପଡ଼ିଥିଲା, ସେ ପ୍ରତ୍ୟେକ କ୍ଷେତ୍ରରେ ନିଜର ଦୃଢ଼ ଉପସ୍ଥିତି ଜାହିର କରିଛନ୍ତି। ମହମ୍ମଦ ସିରାଜ ୨୦୨୦ ରେ ଭାରତୀୟ ଦଳ ପାଇଁ ଟେଷ୍ଟ ଡେବ୍ୟୁ କରିଥିଲେ। ସେବେଠାରୁ, ସେ ମୋଟ ୪୧ ଟେଷ୍ଟ ମ୍ୟାଚ୍ ରେ ମୋଟ ୧୨୩ ୱିକେଟ୍ ନେଇଛନ୍ତି। ଏହା ବ୍ୟତୀତ, ତାଙ୍କର ଦିନିକିଆ କ୍ରିକେଟରେ ୭୧ ଏବଂ ଟି-୨୦ ଅନ୍ତର୍ଜାତୀୟ କ୍ରିକେଟରେ ୧୪ ୱିକେଟ୍ ଅଛି।
