ଭୁବନେଶ୍ୱର ୧୨/୧୧ : ଭୁବନେଶ୍ବର ପୃଥକ ପୃଥକ ସ୍ଥାନରେ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏହି ଦୁଇ ଦୁର୍ଘଟଣାରେ ଏକାଧିକ ଲୋକ ଆହତ ହୋଇଥିବା ଜଣାପଡିଛି । ସମସ୍ତ ଆହତଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ସୋମବାର ବିଳମ୍ବିତ ରାତିରେ ନୟାପଲ୍ଲୀ ଏକାମ୍ର ଭିଲା ଛକରେ ଏକ ଭୋଲବୋ କାରକୁ ପିଟିଥିଲା ସ୍ଵିଫ୍ଟ ଡିଜାର କାର। ଦୁର୍ଘଟଣା ଦୁଇ ଜଣ ଯାତ୍ରୀ ଆହତ ହୋଇଥିଲେ । ଘଟଣାସ୍ଥଳରେ ସ୍ଥାନୀୟ ଲୋକେ ଦୁଇ ଜଣଙ୍କୁ ଉଦ୍ଧାର କରି ପିସିଆର ଡାକିଥିଲେ । ପୋଲିସ୍ ପହଞ୍ଚି ଆହତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି । ତେବେ ଭୋଲବୋ କାରରେ ବସିଥିବା ଚାଳକ ଏବଂ ଅନ୍ୟ ଜଣେ ବ୍ୟକ୍ତିଙ୍କ ସଂପୂର୍ଣ୍ଣ ଭାବେ ସୁସ୍ଥ ଅଛନ୍ତି।
ସେହିପରି ରାଜଧାନୀର ଆଉ ସ୍ଥାନରେ ଭୟଙ୍କର ଦୁର୍ଘଟଣା ଘଟିଛି । ସହିଦନଗର ଥାନା ସମ୍ମୁଖ ଜାତୀୟ ରାଜପଥର ଓଭରବ୍ରିଜ ଉପରେ ଟ୍ରକ ଧକ୍କାରେ ଜଣେ ଯୁବକ ୫୦ ମିଟର ପର୍ଯ୍ୟନ୍ତ ଘୋଷାଡି ପଡିଥିଲେ। ଗୁରୁତର ଅବସ୍ଥାରେ ଛଟପଟ ହେଉଥିବାବେଳେ ସେହି ରାସ୍ତାରେ ଦେଇ ଯାଉଥିବା ବାଇକ୍ ଆରୋହୀ ଜଣଙ୍କ ଆମ୍ବୁଲାନ୍ସ ସହ ପୋଲିସଙ୍କୁ ଖବର ଦେଇଥିଲେ। ତୁରନ୍ତ ପୋଲିସ୍ ପହଞ୍ଚିବା ସହ ଆମ୍ବୁଲାନ୍ସ ପହଞ୍ଚି ଗୁରୁତର ଯୁବକଙ୍କୁ କ୍ୟାପିଟାଲ ହସ୍ପିଟାଲକୁ ନେଇଛନ୍ତି । ତାଙ୍କର ଅବସ୍ଥା ସଙ୍କଟାପନ୍ନ ରହିଥିବା ଜଣାପଡିଛି ।
