ଲମତାପୁଟ,୨୧।୮ :  ଗାଧୋଇବା ବେଳେ ପୋଖରୀରେ ବୁଡି ମା’ ଝିଅ ମୃତ l ଏଭଳି ଦୁଃଖଦ ଘଟଣା ଘଟିଛି ଲମତାପୁଟ ବ୍ଲକ କୁମାରଗନ୍ଧନା ପଞ୍ଚାୟତ ବାଲିଆ ଗାଁରେ। ମୃତକମାନେ ହେଲେ ନନ୍ଦପୁର ବ୍ଲକ ଅରଗଣ୍ଡା ଗାଁର ନମିତା ମାଝୀ ଓ ଝିଅ ସୁମିତ୍ରା ମାଝୀ। 

ନମିତା ନିଜ ଝିଅ ସୁମିତ୍ରାଙ୍କ ସହ ବାପା ଘର ବାଲିଆ ଗାଁକୁ ବୁଲିବା ପାଇଁ ଆସି ଥିଲେ। ଘରେ କାମ ସାରି ଗାଁ ପୋଖରୀକୁ ଗାଧୋଇବା ପାଇଁ ଉଭୟ ମା’ ଓ ଝିଅ ଯାଇଥିଲେ । ଏହି ସମୟରେ ଝିଅ ପୋଖରୀରେ ବୁଡି ଯାଉ ଥିବା ଦେଖି ମା’ ଝିଅକୁ ଉଦ୍ଧାର କରିବା ପାଇଁ ଚେଷ୍ଟା କରିଥିଲେ । କିନ୍ତୁ ନିଜେ ମଧ୍ୟ ପୋଖରୀରେ ବୁଡି ଆଉ ବାହାରି ପାରି ନଥିଲେ। ଗାଁ ଲୋକେ ସଙ୍ଗେ ସଙ୍ଗେ ଘଟଣା ସମ୍ପର୍କରେ ଅଗ୍ନିଶମ ବାହିନୀକୁ ଖବର ଦେଇଥିଲେ l ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ଉଭୟ ମା’ ଝିଅଙ୍କ ମୃତଦେହ ଉଦ୍ଧାର  କରିଥିଲେ ।  ନନ୍ଦପୁର ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ କରୁଛି। ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି l