ବଲାଙ୍ଗିର,୨୪/୦୨: ପାରିବାରିକ କଳହକୁ ନେଇ ଜୀବନ ହାରିଦେଲେ ବୋହୂ । ଘର ଭିତରେ ରଶି ଲଗାଇ ଝୁଲିପଡ଼ିଲେ । ଅଘଟଣ ସମ୍ପର୍କରେ ପୁଅକୁ ଫୋନ୍ କରି ସୂଚନା ଦେଲେ ମା’ । ହେଲେ ପୁଅ ଘର ପହଞ୍ଚିବା ପୂର୍ବରୁ ହୃଦ୍ଘାତରେଚାଲିଗଲା ଜୀବନ । ବୋହୂର ଝୁଲନ୍ତା ଶବ ଦେଖି ହୃଦ୍ଘାତରେ ଶାଶୂ ଆଖି ବୁଜିଥିବା କୁହାଯାଉଛି । ବଲାଙ୍ଗିର ସହର ଇନ୍ଦିରାନଗରରେ ରବିବାର ଅପରାହ୍ନରେ ଘଟିଛି ଏଭଳି ଅଭାବନୀୟ ଘଟଣା ।
ଗୌରହରି ସାହୁଙ୍କ ସ୍ତ୍ରୀ ଆନନ୍ଦିନୀ ଅପରାହ୍ନରେ ଘରେ ରଶି ଲଗାଇ ଆତ୍ମହତ୍ୟା କରିଥିଲେ । ସେତେବେଳେ ଘରେ ଆନନ୍ଦିନୀଙ୍କ ଶ୍ୱଶୁର ଏବଂ ଶାଶୂ ଜମ୍ବୁବତୀ ଥିଲେ । ଗୌରହରି ଏବଂ ତାଙ୍କ ଭାଇ ସଲଣ୍ଡିରେ ଅନୁଷ୍ଠିତ ଏକ ବିବାହ କାର୍ଯ୍ୟକ୍ରମରେ ଯୋଗଦେବାକୁ ଯାଇଥିଲେ। ଆନନ୍ଦିନୀଙ୍କ ଝୁଲନ୍ତା ମୃତଦେହ ପ୍ରଥମେ ଦେଖିଥିଲେ ଜମ୍ବୁବତୀ । ମା’ଙ୍କଠାରୁ ଏ ବିଷୟରେ ସୂଚନା ପାଇବା ପରେ ଗୌରହରି ଶ୍ୱଶୁର ରମେଶ ସାହୁଙ୍କୁ ଫୋନ୍ କରି ଜଣାଇଥିଲେ । ମୃତ ମହିଳାଙ୍କ ବାପଘର ଲୋକେ ପହଞ୍ଚିବା ପୂର୍ବରୁ ଉଭୟଙ୍କ ମୃତଦେହ ଭୀମଭୋଇ ମେଡକାଲ କଲେଜ ଓ ହସ୍ପିଟାଲକୁ ଅଣାସରିଥିଲା । ଆନନ୍ଦିନୀଙ୍କ ଏଭଳି ମୃତ୍ୟୁକୁ ନେଇ ସନ୍ଦେହ ବ୍ୟକ୍ତ କରିଛନ୍ତି ବାପା ରମେଶ । ଝିଅ ଆତ୍ମହତ୍ୟା କରନି ବରଂ ତାକୁ ହତ୍ୟା କରାଯାଇଛି ବୋଲି ସେ ଅଭିଯୋଗ କରିଛନ୍ତି । ପୁଲିସ୍ ମୃତଦେହ ଦୁଇଟି ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି । ସୂଚନାଯୋଗ୍ୟ, ବରଗଡ଼ ଅଞ୍ଚଳର ଆନନ୍ଦିନୀଙ୍କ ବିବାହ ୧୧ବର୍ଷ ତଳେ ଗୌରହରିଙ୍କ ସହ ହୋଇଥିଲା । ତାଙ୍କର ଜମଜ ସନ୍ତାନ ଅଛନ୍ତି।
