ଭୁବନେଶ୍ୱର/ବ୍ରହ୍ମପୁର,୦୪/୧୧: ଓଡିଶାର ଫୁଲବାଣୀ, ଗଜପତିରୁ କୁଇଣ୍ଟାଲ କୁଇଣ୍ଟାଲ ଗଞ୍ଜେଇ ମୁମ୍ବାଇ ପଠାଉଥିଲେ । ସେଠାକାର ଦଲାଲମାନେ ଗଞ୍ଜେଇ ବିକୁଥିଲେ । ଡିମାଣ୍ଡରେ ଥିଲା ଶୀଳାବତୀ । ଆଉ ବଲିଉଡର ଅନେକ ସେଲିବ୍ରିଟି ଏହି ‘ଶୀଳାବତୀ’ ନିଶାରେ ଝୁମୁଥିଲେ । ସିଣ୍ଡିକେଟର ମାଷ୍ଟରମାଇଣ୍ଡକୁ ମୁମ୍ବାଇ ନାର୍କୋଟିକସ୍ କଣ୍ଟ୍ରୋଲ ବ୍ୟୁରୋ (ଏନ୍ସିବି)ର ଓଡିଶାରୁ କାବୁ କରିଛି ।
ମୁମ୍ବାଇ ଏନ୍ସିବି ଟିମ୍ ଗତକାଲି ରାତିରେ ଗଞ୍ଜାମ ଜିଲ୍ଲା ବେଗୁନିଆପଡ଼ା ବୁଲୁଆ ସାହିର ନିଲୁ ପରିଡ଼ାଙ୍କୁ ଉଠାଇଥିବା ସୂଚନା ମିଳିଛି । ରବିବାର ନିଲୁକୁ କ୍ୟାପିଟାଲ ହସ୍ପିଟାଲରେ ସ୍ୱାସ୍ଥ୍ୟ ପରୀକ୍ଷା କରାଯାଇଛି । ଭୁବନେଶ୍ୱର ସିଜିଏମ୍ ଅଦାଲତରେ ହାଜର କରିବା ପରେ ଟ୍ରାନଜିଟ୍ ରିମାଣ୍ଡରେ ମୁମ୍ବାଇ ନିଆଯାଉଛି ।
ଏନ୍ସିବିଠାରୁ ମିଲିଥିବା ତଥ୍ୟ ମୁତାବକ, ଦୁଇ ମାସ ତଳେ ମୁମ୍ବାଇରେ ଏକ ଗଞ୍ଜେଇ ଚାଲାଣ ମାମଲାରେ ଏନ୍ସିବି ସୁଫିଆନ ଖାନ୍ ସମେତ ଦୁଇଜଣଙ୍କୁ ଗିରଫ କରିଥିଲା । ମୁମ୍ବାଇ ଏନ୍ସିବିରେ ଏନେଇ ୨୩/୨୦୨୪ରେ ଏକ ମାମଲା ରୁଜୁ ହୋଇଥିଲା । ୨ଜଣଙ୍କୁ ଜେରା ବେଳେ ସେମାନେ ଗଞ୍ଜାମର ନିଲୁ ପରିଡ଼ା ଗଞ୍ଜେଇ ମଗାଉଥିବା ମାନିଥିଲେ । ସେବେଠୁ ଏନ୍ସିବି ନିଲୁକୁ ଖୋଜୁଥିଲା । କିନ୍ତୁ ନିଲୁ ଫେରାର୍ ହୋଇଯାଇଥିଲା । ଶନିବାର ବେଗୁନିଆପଡ଼ା ପୁଲିସ ସହଯୋଗରେ ତାଙ୍କୁ ଗିରଫ କରାଯାଇଛି । ନିଲୁ ନାଁରେ ପୂର୍ବରୁ ଗଞ୍ଜେଇ ଚୋରା ଚାଲାଣ ମାମଲା ରହିଛି ।
ସୂଚନାଯୋଗ୍ୟ, ଗତ ଫେବ୍ରୁଆରୀରେ ବେଗୁନିଆପଡ଼ା ଥାନା ଅଞ୍ଚଳରେ ଗଞ୍ଜେଇ ଚାଲାଣ ବେଳେ ପୁଲିସ ଦୁଇଜଣଙ୍କୁ ଗିରଫ କରିଥିଲା । ବେଗୁନିଆପଡ଼ା ଥାନାରେ ୮୦/୨୦୨୪ରେ ଏକ ମାମଲା ରୁଜୁ ହୋଇଥିଲା । ଏହି ମାମଲାରେ ଅନ୍ୟତମ ଅଭିଯୁକ୍ତ ନିଲୁ ଫେରାର ହୋଇଯାଇଥିଲା । ପରବର୍ତ୍ତୀ ସମୟରେ ସେ ହାଇକୋର୍ଟରୁ ଜାମିନ୍ ଆଣି କୋର୍ଟରେ ଆତ୍ମସମର୍ପଣ କରିଥିଲା । ଗଞ୍ଜାମ ଜିଲ୍ଲାର ଅନେକ ମାଫିଆ ଏବେ ବାହାର ରାଜ୍ୟକୁ ଗଞ୍ଜେଇ ଚାଲାଣ କରୁଛନ୍ତି । ବିଶେଷ ଭାବେ କୋଦଳା ଓ ବେଗୁନିଆପଡ଼ା ଥାନା ଅଞ୍ଚଳରେ ରହି ଦେଶର ବିଭିନ୍ନ ଅଞ୍ଚଳକୁ ଗଞ୍ଜେଇ ଚାଲାଣ କରୁଥିବା ଜଣାଯାଉଛି । କୋଦଳା ଅଞ୍ଚଳରେ ଦୁଇଜଣ ଗଞ୍ଜେଇ ମାଫିଆଙ୍କ ସମ୍ପତ୍ତି ବି ବ୍ୟାଜ୍ୟାପ୍ତ ହୋଇଛି ।
