ମୁମ୍ବାଇ ; ୩/୧୧ : ସମ୍ମାନ ପାଇଁ ଖେଳୁଥିଲା ହେଲେ ସେତିକ ବି ରଖିପାରିଲା ନାହିଁ ରୋହିତ ବାହିନୀ । ମାଟି କାମୁଡିଲା ଟିମ୍ ଇଣ୍ଡିଆ । ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଉଥିବା ତୃତୀୟ ତଥା ଅନ୍ତିମ ଟେଷ୍ଟ ମ୍ୟାଚରେ ଟିମ୍ ଇଣ୍ଡିଆର ଲଜ୍ୟାଜନକ ପରାଜୟ ହୋଇଛି । ୨୪ ବର୍ଷ ପରେ ଘରୋଇ ଗ୍ରାଉଣ୍ଡରେ ପରାସ୍ତ ହୋଇଛି ଭାରତ । ୩-୦ରେ ସିରିଜ କବ୍ଜା କରି ଇତିହାସ ରଚିଛି କିୱି ଦଳ । ୨୫ରନରେ ବିଜୟ ହାସଲ କରିଛି ନ୍ୟୁଜିଲାଣ୍ଡ ।
ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଅନ୍ତିମ ଟେଷ୍ଟ ମ୍ୟାଚ ଖେଳାଯାଉଥିଲା । ତୃତୀୟ ଟେଷ୍ଟ ମ୍ୟାଚରେ ଭାରତର ନୈରାଶ୍ୟଜନକ ପ୍ରଦର୍ଶନ ଦେଖିବାକୁ ମିଳିଥିଲା । ନ୍ୟୁଜିଲାଣ୍ଡ ବୋଲର ଏଜାଜ ପଟେଲଙ୍କ ଆଗରେ ତିଷ୍ଠି ପାରିନଥିଲା ଇଣ୍ଡିଆ । ଭାରତକୁ ଜିତିବା ପାଇଁ ୧୪୭ ରନ ଦରକାର ଥିଲା । ମାତ୍ର ୧୨୧ରନ କରି ଭାରତ ଅଲଆଉଟ ହୋଇଥିଲା । ୨୫ରନରେ ନ୍ୟୁଜିଲାଣ୍ଡ ବିଜୟ ହାସଲ କରିବା ସହିତ ୩-୦ରେ ସିରିଜ ସିଲ କରିଛି । କିୱି ଦଳ ଏହି ବିଜୟରେ ହିରୋ ସାଜିଥିଲେ ଏଜାଜ ପଟେଲ । ସେ ୫୭ ରନ ଦେଇ ମୋଟ ୬ଟି ୱିକେଟ ହାସଲ କରିଥିଲେ ।
୨୪ ବର୍ଷ ପରେ ଘରୋଇ ମାଟିରେ ଟେଷ୍ଟ ସିରିଜରେ ପରାସ୍ତ ହୋଇଛି ଭାରତ । ଏହା ପୂର୍ବରୁ ୨୦୦୦ ମସିହାରେ ଦକ୍ଷିଣ ଆଫ୍ରିକା ୨ ମ୍ୟାଚ ବିଶିଷ୍ଟ ଟେଷ୍ଟ ମ୍ୟାଚରେ ଭାରତକୁ ପରାସ୍ତ କରିଥିଲା । ତୃତୀୟ ତଥା ଅନ୍ତିମ ଟେଷ୍ଟ ମ୍ୟାଚର ପ୍ରଥମ ଇନିଂସରେ ନ୍ୟୁଜିଲାଣ୍ଡ ୨୩୫ ରନ କରିଥିଲା । ସେହିପରି ଦ୍ବିତୀୟ ଇନିଂସରେ ୧୭୪ ରନ କରିଥିଲା । ଭାରତ ପ୍ରଥମ ଇନିଂସରେ ୨୬୩ କରିଥିବାବେଳେ ଦ୍ବିତୀୟ ଇନିଂସରେ ୧୨୧ ରନ କରିବାରେ ସକ୍ଷମ ହୋଇଥିଲା ।
ଭାରତୀୟ ବ୍ୟାଟରଙ୍କ ବିଫଳତା ପରାଜୟର କାରଣ ହୋଇଛି । ମାତ୍ର ୩ ଜଣ ଖେଳାଳି ୨ ଅଙ୍କ ଛୁଇଁଥିଲେ । ବାକି ୮ ପ୍ଲେୟାର ୧୦ ରନରୁ ଅଧିକ କରି ନାହାନ୍ତି । ଶୁଭମନ ଗିଲ, ସର୍ଫରାଜ ଖାନ ୧ ରନ କରିଥିବା ବେଳେ ଜାଡେଜା ୬ ରନ, ୱାଶିଂଟନ ସୁନ୍ଦର ୧୨ ଓ ଆର ଅଶ୍ବିନୀ ୮ ରନ କରିଥିଲେ । ଆକାଶ ଦୀପ ଓ ସିରାଜ ଖାତା ଖୋଲିପାରି ନଥିଲେ । ନ୍ୟୁଜିଲାଣ୍ଡର ବିଜୟରେ ହିରୋ ସାଜିଥିବା ଏଜାଜ ପଟେଲ ତୃତୀୟ ଟେଷ୍ଟରେ ମୋଟ ୧୧ଟି ୱିକେଟ ନେଇ ପ୍ଲେୟାର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି । ଗ୍ଲେନ ଫିଲିପ୍ସ ୪ଟି ୱିକେଟ ନେଇଛନ୍ତି ।
