ଭୁବନେଶ୍ୱର, ୨୪/୦୨: ମର୍ଡର ପ୍ଲାନ୍ କରି ବରଯାତ୍ରୀରେ ଆସିଥିଲେ ଦୁର୍ବୃତ୍ତ । ମଉକା ଦେଖି ବରକୁ କରିଥାନ୍ତେ ହତ୍ୟା । ହେଲେ ତା ପୂର୍ବରୁ ଦୁର୍ବୃତ୍ତଙ୍କ ଷଡଯନ୍ତ୍ରକୁ ଭଣ୍ଡୁର କରିଛି ପୋଲିସ । ଏହି ଘଟଣାରେ ୭ ଜଣ ଗିରଫ ହୋଇଥିବାବେଳେ ମୁଖ୍ୟ ଅଭିଯୁକ୍ତ ସହ ୩ ଫେରାର ହୋଇଯାଇଛନ୍ତି । ପୂର୍ବ ଶତ୍ରୁତାକୁ ନେଇ ହତ୍ୟା କରିବାକୁ ଷଡ଼ଯନ୍ତ୍ର ହୋଇଥିବା ଜଣାପଡ଼ିଛି । ବଲାଙ୍ଗୀର ଜିଲ୍ଲା ଦେଓଗାଁ ଥାନା ଅନ୍ତର୍ଗତ ଗାଈବାହାଲ ଗାଁରେ ଏଭଳି ଏକ ଚାଞ୍ଚଲ୍ୟକର ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ରବିବାର ରାତିରେ ବାଦୀଜୋରରୁ ଗାଈବାହାଲକୁ ଆସିଥିଲେ ବରଯାତ୍ରୀ । ତେବେ ପୂର୍ବ ଶତ୍ରୁତାରୁ ବରକୁ ମାରିବା ପାଇଁ ୧୦ରୁ ଅଧିକ ଯୁବକ ପ୍ଲାନ୍ କରି ବରଯାତ୍ରୀଙ୍କ ସହ ଆସିଥିଲେ । ସେମାନଙ୍କ ଗତିବିଧି ଉପରେ ଗାଁ ଲୋକଙ୍କର ସନ୍ଦେହ ହୋଇଥିଲା । ସନ୍ଦେହ ହେବାରୁ ପୋଲିସକୁ ଖବର ଦେଇଥିଲେ ଗାଁଲୋକେ । ଖବର ପାଇ ପୋଲିସ ତୁରନ୍ତ ପହଞ୍ଚି ଯୁବକମାନଙ୍କୁ କାବୁ କରିଥିଲା । ହେଲେ ଏହାରି ଭିତରେ ୩ ଜଣ ଫେରାର ହୋଇଯାଇଥିବାବେଳେ ୭ ଜଣଙ୍କୁ ଧରିବାରେ ସଫଳ ହୋଇଛି ଦେଓଗାଁ ପୋଲିସ । ସେମାନଙ୍କ ପାଖରୁ ଅନେକ ମାରଣାସ୍ତ୍ର ସହ ବନ୍ଧୁକ ଜବତ ହୋଇଛି । ସମସ୍ତ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି ପୋଲିସ ।
