ନୂଆଦିଲ୍ଲୀ,୨୮/୦୬: ମୋ ବାପାଙ୍କୁ ସବୁବେଳେ ଲାଗୁଥିଲା ଗୋଟିଏ ଦିନ ମୁଁ ସୁପ୍ରିମକୋର୍ଟ ଚିଫ୍ ଜଷ୍ଟିସ ହେବି । ଏହା ତାଙ୍କର ସ୍ବପ୍ନ ଥିଲା । ଆଜି ତାଙ୍କ ସ୍ବପ୍ନ ପୂରଣ ହୋଇଛି । ହେଲେ ସେ ଏହାକୁ ଦେଖିବାକୁ ନାହାନ୍ତି । ସୁପ୍ରିମକୋର୍ଟ ପ୍ରଧାନ ବିଚାରପତି (ସିଜେଆଇ) ବିଆର ଗଭଇ ନାଗପୁର ଓକିଲ ସଂଘ ପକ୍ଷରୁ ଆୟୋଜିତ ସମ୍ମାନ ସମାରୋହରେ ସାମିଲ ହୋଇଥିଲେ । ଏହି କାର୍ଯ୍ୟକ୍ରମରେ ତାଙ୍କ ବାପାଙ୍କୁ ମନେ ପକାଇ ଭାବବିହ୍ୱଳ ହୋଇଥିଲେ ।

'ବାପା କହିଥିଲେ ମୁଁ CJI ହେବି'- କାର୍ଯ୍ୟକ୍ରମରେ ସାମିଲ ହୋଇ ଭାବବିହ୍ୱଳ ହୋଇଥିଲେ ସିଜେଆଇ । ବାପାଙ୍କୁ ମନେ ପକାଇଥିଲେ । ସେ କହିଥିଲେ, ମୋ ବାପା ସବୁବେଳେ କହୁଥିଲେ  ମୁଁ ସୁପ୍ରିମକୋର୍ଟ ଚିଫ୍ ଜଷ୍ଟିସ ହେବି । ଏହା ତାଙ୍କର ସ୍ବପ୍ନ ଥିଲା । ଆଜି ତାଙ୍କ ସ୍ବପ୍ନ ପୂରଣ ହୋଇଛି ହେଲେ ଦେଖିବାକୁ ସେ ନାହାନ୍ତି । ୨୦୧୫ରେ ତାଙ୍କର ଦେହାନ୍ତ ହୋଇଥିଲା । ତାଙ୍କର ଅନୁପସ୍ଥିତି ଅନୁଭବ ହୁଏ । ମୁଁ ଖୁସି ଯେ ଏହି ମୂହୁର୍ତ୍ତକୁ ଦେଖିବାକୁ ମୋ ମାଆ ମୋ ପାଖରେ ଅଛନ୍ତି ।

'ବିଚାରପତି ହେବା ୯ଟାରୁ ୫ଟାର ଚାକିରି ନୁହେଁ' - ସୁପ୍ରିମକୋର୍ଟର କଲେଜିୟମରେ ସର୍ବଦା ଯୋଗ୍ୟତା ଆଧାରରେ ଚୟନକୁ ଗୁରୁତ୍ୱ ଦିଆଯାଏ । କେବେ ବି ଜାତି, ଧର୍ମ, ସାମାଜିକ ପୃଷ୍ଠଭୂମି ବାବଦରେ ବିଚାର କରାଯାଏ ନାହିଁ । ଏହା କେବଳ ପ୍ରାର୍ଥୀଙ୍କ ଯୋଗ୍ୟତା ଦେଖିଥାଏ ଏବଂ ସେହି ବ୍ୟକ୍ତି ସମ୍ପୃକ୍ତ ପଦ ପାଇଁ ଯୋଗ୍ୟ କି ନା ତାହା ପରଖା ଯାଏ । ବିଚାରପତି ଏକା କାମ କରିପାରିବେ ନାହିଁ । ବିଚାରପତି ହେବା କୌଣସି ୯ରୁ ୫ ଚାକିରି ନୁହେଁ । ଏହା ଦେଶସେବା । କିନ୍ତୁ ବେଶ୍‌ କଠିନ । ସୁପ୍ରିମକୋର୍ଟର ସମସ୍ତ ବିଚାରପତି ସର୍ବୋଚ୍ଚ ନ୍ୟାୟାଳୟ ଭାବେ କାମ କରିବା ଉଚିତ ନା କି କେବଳ ଭାରତର ପ୍ରଧାନ ବିଚାରପତି । ସମସ୍ତ ନିଷ୍ପତ୍ତି ସର୍ବସମ୍ମତି କ୍ରମେ ନିଆଯିବା ଆବଶ୍ୟକ । ବିଚାରପତିଙ୍କୁ ସମାଜ ସହ ମିଶିବା ଉଚିତ । ଏହା ଦ୍ୱାରା ସମାଜର ସମସ୍ୟା ଏବଂ ପ୍ରଶ୍ନକୁ ବୁଝିବା ସହଜ ହୋଇଥାଏ ଏବଂ ନ୍ୟାୟ ମାଧ୍ୟମରେ ତାହାର ସମାଧାନ କରାଯାଇ ପାରିଥାଏ ବୋଲି କହିଛନ୍ତି ସିଜେଆଇ  ବିଆର ଗଭଇ ।