ନୂଆଦିଲ୍ଲୀ: ମହାରାଷ୍ଟ୍ରର ନାଗପୁରରେ ଏକ ବାଣ କାରଖାନାରେ ବିସ୍ଫୋରଣ ହୋଇଛି । ଏଥିରେ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି। ଜଣେ ବରିଷ୍ଠ ପୋଲିସ ଅଧିକାରୀ ଏହି ସୂଚନା ଦେଇଛନ୍ତି। ରବିବାର ଦିନ ଅପରାହ୍ନ ୧.୩୦ ସମୟରେ ବିସ୍ଫୋରଣ ଘଟଣା ଘଟିଥିଲା। ବିସ୍ଫୋରଣ ପରେ ନିଆଁ ବ୍ୟାପିଥିଲା। ଉଦ୍ଧାରକାରୀ ଦଳ ଘଟଣାସ୍ଥଳରେ ନିଆଁକୁ ନିୟନ୍ତ୍ରଣ କରିଥିଲେ ଏବଂ ବର୍ତ୍ତମାନ ପରିସ୍ଥିତି ନିୟନ୍ତ୍ରଣାଧୀନ ଅଛି।
ସୂଚନା ଅନୁଯାୟୀ, ନାଗପୁର ଜିଲ୍ଲା ମୁଖ୍ୟାଳୟରୁ ୫୦ କିଲୋମିଟର ଦୂରରେ ଥିବା କାଟୋଲ ତହସିଲର ଏସିଆନ୍ ଫାୟାରୱାର୍କସରେ ବିସ୍ଫୋରଣ ଘଟିଥିଲା। ଅଧିକାରୀ ଜଣକ କହିଛନ୍ତି ଯେ ଦୁଇ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଲୋକ ଆହତ ହୋଇଛନ୍ତି। ଘଟଣାର କାରଣ ଜାଣିବା ପାଇଁ ତଦନ୍ତ ଆରମ୍ଭ ହୋଇଛି।
ବିସ୍ଫୋରଣର ଏକ ଭିଡିଓ ଏବେ ସାମ୍ନାକୁ ଆସିଛି ,ଯେଉଁଥିରେ ଦେଖିବାକୁ ମିଳୁଛି ଯେ ଚାରିପାଖରେ ସବୁକିଛି ବିଛାଡ଼ି ପଡ଼ିଛି ଏବଂ ସେଠାରେ ବହୁ ସଂଖ୍ୟକ ପୋଲିସ ଫୋର୍ସ ମୁତୟନ କରାଯାଇଛି। ବିସ୍ଫୋରଣ ପରେ ଧୂଆଁ ବାହାରୁଥିଲା ଏବଂ ନିଶ୍ୱାସ ନେବାରେ କଷ୍ଟ ହେଉଥିବା ଅଭିଯୋଗ ଆସିଥିଲା। ତେଣୁ, ସେଠାରେ ଉପସ୍ଥିତ ସମସ୍ତ ପୋଲିସ କର୍ମଚାରୀଙ୍କ ମୁହଁ ମାସ୍କ କିମ୍ବା ରୁମାଲରେ ଘୋଡ଼ାଇ ଦିଆଯାଇଥିଲା।
କୁହାଯାଉଛି ଯେ ଘଟଣା ସମୟରେ କାରଖାନାରେ ୩୧ ଜଣ ଶ୍ରମିକ କାମ କରୁଥିଲେ। ପୋଲିସ, ଅଗ୍ନିଶମ ବାହିନୀ କର୍ମଚାରୀ, ଫୋରେନସିକ୍ ବିଶେଷଜ୍ଞ ଏବଂ ବିସ୍ଫୋରକ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
